Toqaev Teńiz eldi mekeninde bolǵan jaǵdaıdyń qaıtalanýyna jol bermeý kerek ekenin aıtty
Qazaqstannyń prezıdenti Qasym-Jomart Toqaev sheteldik kompanııalarda jergilikti mamandarǵa laıyqty jalaqy tóleý máselesin kóterdi, dep habarlaıdy Sputnik Qazaqstan tilshisi.
"Men Atyraýda jergilikti jáne sheteldik jumysshylarǵa laıyqty jalaqy tólep, ádilettilikti saqtaýdy tapsyrdym. Úkimetke osy máseleniń anyq-qanyǵyna jetip, sheshýdi tapsyramyn. Asqar Uzaqbaıuly úkimet basshysy - Sputnik Qazaqstan), osy jaǵdaıdy egjeı-tegjeıli zertteńiz. Sonyń ishinde jumysshylardyń eńbek jaǵdaıy men jalaqysyna baılanysty saraptama jasańyz. Eger ınvestorlarmen jasalǵan kelisimsharttarǵa ózgertýler engizý qajet bolsa, bul máseleni kún tártibine qoıý qajet. Árıne, bul – ońaı sharýa emes, muny túsinemin", - dedi Toqaev úkimettiń keńeıtilgen otyrysynda.
Prezıdenttiń aıtýynsha, barlyq memlekettik organnyń basty mindeti – ulttyq múddeni qorǵaý. Budan bólek, memleket basshysy otandyq mamandardyń kásibı daıyndyǵyna jáne eńbek tártibin saqtaý máselesine basa nazar aýdarýdy júktedi.
"Ókinishke qaraı, "bizdiń jumysshylarymyz jumys istegisi kelmeıdi, tártip saqtamaıdy" degen pikirler de joq emes", - dedi Toqaev.
Otyrys kezinde prezıdent Teńiz ken ornyndaǵy jaǵdaı týraly oblys ákimi Nurlan Noǵaevtan da surady. Ákimniń aıtýynsha, búginde arnaıy komıssııa qurylǵan. Árbir kásiporynnyń usynysy negizinde tıisti sharalar qolǵa alynady. Memleket basshysy bolsa, bul jaǵdaıdyń "bárine sabaq bolǵanyn" jetkizdi.
"Bolǵan oqıǵa bárimizge úlken sabaq bolady. Bul qaıtalanbaýy tıis. Mundaı oqıǵa bizdiń elimizdiń bedeline nuqsan keltiredi. Sondyqtan bul másele barlyq óńirge, sondaı-aq, barlyq memlekettik organǵa, solardyń ishinde eńbek jáne halyqty áleýmettik qorǵaý, energetıka, ındýstrııa jáne ınfraqurylymdyq damý mınıstrligine, "Samuryq-Qazyna" ulttyq qoryna qatysty. Bul – óte mańyzdy másele. Ony únemi baqylaýda ustaý kerek", - dedi Toqaev.
Teńizdegi tóbeles
29 maýsym kúni Teńizdegi 3GI zaýytynyń myńǵa jýyq jumysshysy ereýilge shyqqan bolatyn. Buǵan áleýmettik jelidegi sýret sebep bolǵan. Fotoǵa Lıvııa azamaty Elı Daýd (Eli Daoud) pen qazaq qyzy birge túsken.
Sýrettegi kórinisti namysqa tıedi dep eseptegen jumysshylar ereýilge shyǵyp, arab qyzmetkerlerin soqqynyń astyna aldy.
Al Atyraý oblysynyń ákimi Nurlan Noǵaev oqıǵaǵa iri munaı kompanııasynda jumys isteıtin qazaqstandyqtar men sheteldikterdiń eńbek jaǵdaıynyń teń emestigi sebep bolǵanyn aıtty.
Oqıǵadan keıin 45 adam dáriger kómegine júgingen. Oqıǵaǵa qatysty birneshe qylmystyq is qozǵaldy.
