Áskerı qyzmet – kez-kelgen er jigittiń ómirindegi mańyzdy kezeń. Eldi, jerdi qorǵaý jolynda atqaratyn áskerı qyzmet árbir azamattyń qasıetti boryshy. Memlekettiń qorǵanys qabiletin únemi arttyrý elimizdiń strategııalarynyń biri bolyp tabylady. Sebebi, elimizdiń árbir áskerı qurylymy el egemendiginiń tiregi, tutastyǵynyń senimdi kepili, halqymyzdyń erteńgi kúnine degen seniminiń myzǵymas tiregi desek te artyq etpes.
Sondyqtan árbir er azamat Otan qorǵaýdy abyroıly mindet retinde sezinip el aldynda bergen antyna adal bolyp bıik shyńdardy baǵyndyrýy tıis. Qazirgi tańda memleketimizde 18-27 jas aralyǵyndaǵy «saıdyń tasyndaı» el azamattary mindetti túrde áskerge shaqyrylatynyn eskere ketkenimiz durys. Sebebi densaýlyǵy jaramdy árbir azamat mindetti túrde Otan aldyndaǵy boryshyn oryndaýy kerek. Oral qalasyndaǵy 5517 áskerı bóliminde 400 ge jýyq azamat Otan aldyndaǵy boryshyn oryndaýda.
5517 áskerı bólim komandıriniń Tárbıe jáne áleýmettik quqyqtyq jumystar jónindegi orynbasary podpolkovnık Jánibek Sársenovtiń aıtýynsha, elimizdiń aýmaǵynan jyl saıyn Otan aldyndaǵy boryshyn óteýge tepse temir úzetin jigitter keledi. Elimizdiń tiregi bolǵan Ulttyq ulannyń ózine jylyna eki márte elimizdiń patrıottaryn áskerge shaqyrý júzege asyrylady. Dese, de «ásker» sózin estigende denelerinde úreı paıda bolyp áskerden qashatyn jandar da az emes. Biri – joǵary bilim alyp júrse, biri ár qalada jumys jasap júr, endi biri úıiniń jalǵyz asyraýshysy bolyp keledi. Degenmen, ár azamat Otan aldyndaǵy boryshty óteý – paryzy ekenin bilýi tıis.
– Búginde jastardyń boıyndaǵy patrıottyq sezimdi oıatý maqsatynda áskerı qurylymdar aıanbaı eńbek etýde. Solardyń biri – el aıbynyna aınalǵan Qazaqstan Respýblıkasynyń Ulttyq ulany. Áskerı qurylym jastardyń boıyndaǵy patrıottyq rýhty arttyrý maqsatynda ashyq esik kúnderin, mektep oqýshylaryna arnalǵan úgit nasıhat jumystaryn ótkizedi.
Qazirgi tańda jastardyń áskerı salaǵa degen qyzyǵýshylyǵyn arttyrý úshin Ulttyq ulannyń áskerı qyzmetkerleri elimizdiń barlyq aımaqtarynda úgit nasıhat jumystaryn júrgizdi. Aqpan aıynda Aqtóbe qalasynda Ahmet Baıtursynuly atyndaǵy lıngvıstıkalyq mektep-gımnazııasy jáne №28 jalpy bilim beretin orta mektep oqýshylarymen Ulttyq ulan qyzmetkerleri kezdesý ótkizdi.
Atalmysh kezdesýdiń basty maqsaty – joǵarǵy synyp oqýshylaryn Qazaqstan Respýblıkasynyń Ulttyq ulan akademııasyna jáne áskerı joǵarǵy oqý ornyna túsýge úgitteý, qoǵamdaǵy áskerı qyzmetti dáripteý, jastardy otanshyldyqqa tárbıeleý. Kezdesýge Aqtóbe qalasyndaǵy 6655 áskerı bóliminiń qyzmetkerleri men Ulttyq ulan akademııasynyń 4 kýrs stýdentteri qatysty. Kezdesý barysynda áskerı qyzmetkerler oqýshylarǵa áskerı qyzmettiń artyqshylyqtary, áskerı áleýmettik paket jaıly mardymdy aqparattar berdi, sonymen qatar mektep bitirýshi túlekterge Ulttyq ulan akademııasyna qalaı túsý kerektigi jaıly túsindirdi. Áskerde bolǵandar kóbine baıypty, ustamdy, shydamdy kórinedi. Óıtkeni olar temirdeı tártipten ótken. Sózdiń de qadirin biledi. Jaýapkershilikti júregimen sezinedi. Osyny jasóspirim shaqtan sanalaryna quıýymyz kerek, – deıdi Jánibek Qaıyrbekuly.
Qazirgi tańda elimizdiń barlyq aýmaǵynda bul tektes is-sharalar legi kóp ótýde. Sonymen qatar ásker bólimde mektep oqýshylaryna arnalǵan ashyq esik kúnderi de uıymdastyrylýda. Mektep oqýshylary kúni boıy áskerı ómirdiń qyr-syrymen tanysyp, alǵashqy kómek kórsetý,arnaıy quraldardy qoldanýdy meńgerip, daıarlyq sabaqtaryna qatysady. Jas patrıottarǵa áskerı kazarmalar men sarbazdar tamaqtanatyn ashanalar kórsetiledi. Osyndaı is-sharalar arqyly Ulttyq ulan qyzmetkerleri jas býynǵa áskerı salanyńmańyzdylyǵy týraly aqparattar jetkizýde.
Búgingi tańda mektep oqýshylarymen birlese«Jas búrkit» áskerı patrıottyq klýby qurylǵan. Uıym músheleri jas sarbazdardyń áskerı ant qabyldaý rásimderi, áskerı boryshyn ótegen jaýyngerlerdi qurmetteý keshteri, merekelik saltanatty jıyndar, taqyryptyq vıktorınalar men baıqaýlar, «Erlik sabaqtary», «Ashyq esik kúnderi» akııalary sııaqty áskerı-patrıottyq mazmundaǵy kóptegen is-sharalarǵa óz úlesterin qosady.
Osylaısha, elimizde áskerı qyzmettiń abyroıly mindet ekenin uqqan jastar el qaýipsizdiginiń myzǵymas tiregi bolyp, Otan aldyndaǵy boryshtaryn adal atqarýda.
Iá, ásker – ómir mektebi. Onyń qazanynda qaınap, synaǵyna shyńdalyp shyǵý kez kelgen azamat úshin ómirlik olja bolatyny sózsiz. Sebebi áskerde tapsyrma oryndalýy kerek. «Joq» degen olar úshin jaramsyz jáne qısynsyz jaýap. Sonymen qatar áskerde bolǵan azamat ómirde de problemalarmen betpe-bet kelgende, sheshýdiń jolyn izdeıdi. Kez kelgen synaqqa synbaıdy, kerisinshe qarsy turady. Búgingi azamattarda osyndaı qasıet baıqala bermeıdi. Sol úshin úlken ómirdiń alǵashqy baspaldaǵynan ár azamat ótýi kerek.
Káýsar BAIǴALIEVA
