Prezıdent Qasym-Jomart Toqaevtyń tóraǵalyǵymen Ulttyq quryltaıdyń otyrysy bastaldy. Qazir Quryltaı músheleri sekııalarda aıtylǵan usynystar men bastamalardy ortaǵa salyp, óz oılarymen bólisip jatyr, dep habarlaıdy «Adyrna» tilshisi.
«Alǵashqy otyrys Ult uıasy Ulytaý jerinde ótse, byltyr kıeli Túrkistanda jınaldyq. Búgin taǵy bir tarıhı ólke – Atyraý oblysyna kelip otyrmyz. Úshinshi otyrystyń Jaıyq jaǵasynda ótip jatqany tegin emes. Áıgili Saraıshyq qalasy osy jerge tıip tur. Bul shahar Ulyq ulystyń, keıin Qazaq handyǵynyń mańyzdy ákimshilik jáne saýda ortalyǵy bolǵany tarıhtan belgili»,—dep sózin bastady prezıdent.
Qasym-Jomart Toqaev qazaq tiline degen suranystyń jyl ótken saıyn artyp kele jatqanyn aıtty.
«Tilimizdiń qoldaný aıasyn keńeıte túsý memlekettik saıasattyń basty baǵyty bolyp qala beredi. Bul – biz úshin myzǵymas ustanym.
Elimizde qazaq tiline degen suranys jyl ótken saıyn artyp keledi. Qazaq tili bıznestiń, ǵylym men tehnıkanyń tiline aınala bastady. Bul úrdisti odan ári damytýdyń eń tıimdi ári tóte joly – aǵartýshylyq.
Qazir iri kitap dúkenderinde qazaq tilindegi týyndylardyń úlesi arta tústi. Sońǵy kezde baspagerlerdiń jańa býyny álemdik bestsellerge aınalǵan shyǵarmalardy aýdaryp júr. Kóptegen kitaptardy shyǵaryp jatyr. Aýdarylǵan kitaptardyń ishinde kórkem ádebıet qana emes, iskerlik baǵyttaǵy týyndylar da kóp. Memlekettik saıasattyń máni – osynda.
Eshkimdi májbúrlemeı, kúndelikti ómirdegi qajettilikti arttyrý arqyly tilimizdiń tuǵyryn nyǵaıta beremiz. Memlekettik tilge qatysty qur sózden eshteńe shyqpaıdy. Eń bastysy, naqty is bolýy kerek»,—dedi ol.
