Ekologııa jáne tabıǵı resýrstar mınıstri Erlan Nysanbaev buǵan deıin Álııa Nazarbaevamen baılanysy bar kompanııa qoqys shyǵarýmen aınalyspaıdy degen sózine jaýap berýge qınaldy, dep habarlaıdy "Adyrna" ulttyq portaly.
«Birden aıta ketkim keledi, bul másele bizdiń quzyrymyzdan tys, jergilikti atqarýshy organdardyń quzyrynda. Ótken joly berilgen aqparatqa kelsek, mende odan ózge basqa aqparat joq dep aıta alamyn. Maǵan sonda Álııa Nazarbaevanyń bul kompanııaǵa esh qatysy joq degen aqparat berildi. Men budan artyq eshteńe aıta almaımyn», - dedi Nysanbaev seısenbi kúni úkimet otyrysynda.
Jýrnalıst saýal qoıý barysynda atap ótkendeı, Astana ákimi Jeńis Qasymbek eks-prezıdent Nursultan Nazarbaevtyń qyzyna qatysy bar «Clean City NC» JShS qalada qyzmetin jalǵastyryp jatqanyn aıtqan.
Aqyrynda senimsiz bolyp shyqqan aqparatty Nysanbaevqa kim berdi degen suraqqa ol bul aqparatty qaramaǵyndaǵylar bergenin aıtty.
«Demek, olar sizge qate aqparat berdi me?» – dep naqtylady jýrnalıst.
«Biz muny anyqtaýymyz kerek», - dedi mınıstr.
Eske salaıyq, buǵan deıin Álııa Nazarbaeva reıderlik jolǵa túsip, 170 mıllıon dollardyń múlkin urlaǵany úshin aıyptalǵan bolatyn. Sonymen qatar, sońǵy ýaqytqa deıin eks-prezıdenttiń qyzymen baılanysy bar Instant Payments kompanııasynyń reıderlik shabýylda mańyzdy ról atqarǵany belgili. Dál osy kompanııa 2022 jylǵy qańtar oqıǵasyna deıin «Qazaqtelekom» ulttyq kompanııasymen tyǵyz jumys istegen.