Jazıra AHMETOVA: Qazaqtyń biz biletin jigitteri,Qyz qumar, Qyzyq qumar, Qyrym qumar…

349

KÁRI QYZDYŃ KÚNDELIGINEN

I
Aq tósim albyraǵan shandyr boldy,
Kún sanap kúmis daýsym tarǵyldandy.
Uqsatyp turýshy edi balǵyn júzim,
Alaýlap jańa pisken tandyr nandy.

Minezim bylaı qalyp jibek jeldeı,
Kúzdegi kúrsinemin kúreń beldeı.
Elestiń erbeńdegen kóleńkesi,
Eńsemdi ezip-shanshyp jibergendeı.

Kóz emes,
Qarashyǵym qap-qara muń!
Kórinbeı kóp ishinde qap baramyn.
Janymnyń jazylmaǵan shejiresi –
Jas shýǵan aıǵyz-aıǵyz aq paraǵym.

Jalǵyzdyń kimge kerek muń nalasy?
ózimnen ózim qorqam tún balasy.
…Tereńi telegeıdiń kórine me –
Kózime toqtaı qalyp bir qarashy?

II

Keshe meni
Jigitter ańdýshy edi kóshedegi,
Anaýsy aqpa aryndy aqyn edi,
Mynaýsy shekten shyqqan sheshen edi!..

Qaısysyn taba alarsyń qaıdan izdep?
Japanǵa jaıaý tartqan jaıdaq iz kóp…
Shesheni sheneýnikke aınaldy da,
Aqyny áýrelendi Láıláni izdep.

Búgin meniń
Tań atqansha kirpigim ilinbedi.
Sheshenim shekpen jaýyp ıyǵyma,
Aqynym áldene dep kúbirledi.

Tań bilindi… úmitim talǵa ilindi,
Taǵy kórdim túsimde bal kúnimdi…
Kim tabady, qudaı-aý, qupııamdy?..
Kim tańdaıdy, qudaı-aý, taǵdyrymdy?..

III
Jigit joq!
Esesine migit qansha!
Kilt joq,
Ashylmaǵan qulyp qansha…
Qýysy biz degende qýyqtaı bop,
Qaıtersiń qý dúnıe quryp qalsa.

Dámeli bolmasaq ta seri-saldan,
Seri sal joq degenge kelise alman.
Torǵaıǵa Toty basym qor bola ma,
Jol qaıda Perishte men Peri salǵan?

Shynymen tabylmaı ma «Men» degen ul?
Kimge unap,
Kimdi qalap teń kóremin?
Jeligi qyz balanyń jeń ishinde,
Qaıda júr jeztańdaıly jeńgelerim?

Kúz kelse kúnmen qosa qaıyń jylar,
Qyz muńlyq joq nárseni ýaıym qylar…
Basynyń balǵyn jastan básin bilgen,
Baqytty-aý bizden góri baıyrǵylar!

Qalasyn bóriktiler, qalamasyn,
Saýdaǵa satylmaıdy Sara basym!
Qasynan qaraıǵany tabylmasa,
Qara qyz qaıda soǵar qara basyn?

Dersiń-aý kózden ushty burymdylar,
Burymdy qaısyń barsyń yrym qylar?
Qazaqtyń biz biletin jigitteri
Qyz qumar,
Qyzyq qumar,
Qyrym qumar…

…Jigit joq!
Úmit tapshy,
Kúdik basym.
Kúdikpen kúbirlesip kim uıyqtasyn?!
Umtylǵan el bolmaqqa ult pen ulys,
Aldymen qyz balasyn ulyqtasyn!!!

 

Jazıra AHMETOVA

"Adyrna" ulttyq portaly

Pikirler