Túrkistanda 19 jańa kópqabatty úı jylýsyz qaldy. Úılerdiń birinde qubyrlar jarylyp, 7 qabatty sý basty, dep habarlaıdy «Adyrna» ulttyq portaly KTK telearnasyna silteme jasap.
Qatty jeldiń saldarynan bir úıdiń shatyry julynyp, qubyrlar sýyqqa shydamaı, jarylyp ketken. Turǵyndardyń aıtýy boıynsha, 12-shi qabattan 5-shi qabatqa deıingi páterlerdi sý basqan. Arna tilshileriniń málimetinshe, mundaǵy «qymbat» úıler paıdalanýǵa bıyl berilgen.
Bul úılerdi salǵan merdigerler qazirdiń ózinde kelip, erteń bárin qalpyna keltiremiz dep halyqqa ýáde berdi. Sondaı-aq olar keltirilgen shyǵyndy óteýden bas tartqan joq. Biraq oblys ákimine qarama-qarsy turǵyzylǵan 13 kópqabatty úıdiń jaǵdaıy jaqsy emes. Mundaǵy páterler kezekte turǵandarǵa taratylǵan. Jel úılerdiń qasbetterin (fasad) julyp áketken. Turǵyndardyń aıtýynsha, olardyń úıleri óte sýyq.
«Bir jerde qubyr jarylyp ketipti, sony jóndeımiz, sosyn jylý beremiz dep ýáde berdi. Ázirshe kıinip júrmiz. Mine, osylaı qalpaqpen sabaq beremiz. Sondaı-aq uıyqtaǵanda da qalpaqpen uıyqtaımyz», - deıdi Azamat Jurnabaev.
Bul úılerdiń turǵyndary balalarynyń densaýlyǵyna alańdaýly. Al sheneýnikter úılerde tek bir táýlikke ǵana jylý joq dep sendiredi. Biraq qazirgi jaǵdaıdyń yńǵaıly emes ekenine de kelisedi. Olar nelikten jylýdyń halyqqa jetpeı jatqanyn anyqtap jatyr, múmkin, sapasyz qurylystyń saldarynan dep boljaıdy. Sonymen qatar úılerdiń jelden jyrtylǵan jabyndary qalpyna keltirilgende, jyly bolady dep sendiredi.
«Adyrna» ulttyq portaly
