Ómir boıyna bas bostandyǵynan aıyrylyp, jazasyn ótep jatqan almatylyq Rýslan Kúlekbaev alǵash ret jýrnalısterge suhbat berdi, - dep habarlaıdy «Adyrna» ulttyq portaly.
Qazir Rýslan Kúlekbaev jazasyn Qostanaı oblysyndaǵy «Qara qyran» qatań rejımdegi kolonııasynda ótep jatyr. Ol qazir jalǵyz adamdyq kamerada, oǵan kitap oqýǵa jáne anasy men balalaryn kórýge ruqsat etilgen.
«Kúlekbaev bul kolonııaǵa túskende jylpos minezdi edi. Ol kezde onyń radıkaldy kózqarastary belgili bir deńgeıde bolmady. Ol oqshaýlanǵan kamerada otyryp, eshkimmen baılanys ornatqan joq. Tek kolonııa qyzmetkerlerimen, keıde psıhologtarmen, teologtarmen sóılesedi», – deıdi kolonııa basshysy Darhan Nurekeshev.
Jýrnalıstermen suhbatynda Kúlekbaev kúnásin moıyndady. Jýrnalısterdiń suraqtaryna jaýap bergen ol kózine jas aldy.
«Sot kezinde ne aıtqanymdy bári biledi. Men sol kezde: «Ýa, Alla, Sýbhanallah, olar meni atyp tastasa da, odan da aýyr jaza berse de, báribir» dedim. Ol kezde men eshteńeden qoryqpadym. Osyny esime túsirgende, «Men óte qatygez boldym dep oılaımyn. Kúná jasaǵanda júregim qatyp, qara bolyp ketti. Munyń úlken kúná ekenin kesh túsindim», - deıdi Kúlekbaev.
Ol sondaı-aq Almatyda adamdardy jappaı atyp óltirgen kezdegi jaǵdaıy týraly aıtyp, qaza tapqan adamdardyń týystarynan keshirim surady.
«Bolar is boldy. Men olardy qaıtara almaımyn. Biraq olardyń júrekteri tynysh bolýy úshin, eger meni kórip, tyńdasańyz, meni keshirseńiz, bul sizdiń maǵan jasaǵan jaqsylyǵyńyz bolady. Alla sizge eki dúnıede de jaqsylyq bersin», - dedi Kúlekbaev.
7 jyl buryn Rýslan Qúlekbaev Almaty kóshelerinde 10 adamdy atyp óltirgen. Negizinde, olar polıııa qyzmetkerleri boldy. Sot úkimi boıynsha, onyń múlki tárkilenip, ólim jazasyna kesildi. Alaıda ólim jazasyna moratorıı jarııalanýyna baılanysty, Qúlekbaev ómir boıyna bas bostandyǵynan aıyrylady.
Aıta keteıik, 2018 jyly Qúlekbaev kolonııada óz-ózin eki ret óltirmek bolǵan.
«Adyrna» ulttyq portaly
