Aıtysker aqyndar men jyrshy-termeshiler saılaýda Toqaevty qoldaıdy

2401
Adyrna.kz Telegram

Búgin Almaty qalasyndaǵy Qazaqstan Jazýshylar Odaǵynyń konert zalynda "Aıtys aqyndary men jyrshy-termeshilerdiń halyqaralyq Odaǵynyń" II quryltaıy ótýde.

Serik Qusanbaev, Amanjol Áltaev, Serik Qalıev, Rınat Zaıytov, Erkebulan Qaınazarov syndy tanymal aqyndardan prezıdıým ókilderi saılanǵan bul quryltaıǵa Qazaqstannyń barlyq oblysynan tól ónerdiń ókilderi qatysýda.

Quryltaıdy ashyp, sóılegen Odaq Prezıdenti Júrsin Erman qazirgi bılikke degen narazylyǵyn da jasyryp qala almady. Aıtysqa únemi bılik tarapynan qysym jasalyp, telearnalardyń aıtysty qıyp, úzip-julyp beretinin  de aıtty. Aıtystyń ótken ketkenine toqtalǵan Júrsin Moldashuly eldegi saıası jaǵdaılardan aqyndardyń da tys qalmaýyn surady.

"Aldymyzda prezıdent saılaýy, parlament saılaýy kele jatyr. Parlament saılaýyna nege bizdiń  aqyndar da qatyspasqa? Jalǵyz Aıbek Qalıev qana Arqalyqta qalalyq máslıhattyń depýtaty bolyp júr. Parlamenttiń tórinde Amanjol Áltaev, Rınat Zaıytov, Baýyrjan Halıolla otyrsa Parlamenttiń qabyrǵasy qısaıyp qala ma eken?" degen Júrsin Erman aqyndar eldiń sózin qaı ortada da aıtatynyn tilge tıek etti.

Odan keıin sóz alǵan Qudaıberli Myrzabekov, Baqyt Jaǵyparuly, Erbol Qambatyrov, Serik Qalıev, Baýyrjan Halıolla, Muhtar Nııazovtar aıtystyń kem-ketigi men bolashaqtaǵy atqarylmaq isterge óz kózqarastaryn bildirdi. Jahandaný dáýirinde osy bir bekzat ónerdi qaıtsek ary qaraı damytsaq, qazirgi deńgeıinen de bıikke kótersek degen aqyndar oblystarmen tyǵyz jumys jasaý kerektigin aıtty.

Prezıdıým tizginin ustap otyrǵan Amanjol Áltaev Júrsin Ermannyń aıtysqa sińirgen eńbegine toqtala kelip, jas aqyndarǵa izdený kerektigin aıtty.

Sóz aıaǵynda "Aıtys aqyndary men jyrshy-termeshilerdiń halyqaralyq Odaǵynyń" Basqarma Tóraǵasy Júrsin Erman "elde saıası naýqan bastalǵanyn, sol saılaýǵa bizdiń Odaqtyń da at salysyp, qatyssaq degen oıy bolǵanyn" jasyrmady. Bul oıy bıliktiń Odaqqa degen nazaryn aýdarsa dedi.

Quryltaı sońynda Odaq tóraǵasy aıtysker aqyndar men jyrshy-termeshilerdiń aldaǵy saılaýda Elbasy Nazarbaev usynǵan kandıdat Q. Toqaevty qoldaıtynyn aıtty.

 

 

 

 

 

Pikirler