Reseılikterdiń 70 paıyzy Stalınniń tarıhtaǵy róline oń baǵa beredi. "Levada-entr" ortalyǵy júrgizgen saýalnamaǵa sáıkes, jaýap bergen azamattardyń teń jartysyna jýyǵy Stalın repressııasyn aqtaýǵa daıyn.
2019 jyly naýryzda ortalyq júrgizgen saýalnamaǵa qatysqan árbir ekinshi adam (51 paıyz) Stalınge súısinetinin ne qurmetpen qaraıtynyn aıtqan. "Atyn estigende titirkenemin", "qorqamyn" ne "jıerkenemin" dep Stalınge negatıvti qaraıtyndar sany úsh ese az - 14 paıyz.
Saýalnamaǵa qatysqandardyń 19 paıyzy Stalınniń Reseı tarıhyndaǵy róline teris baǵa bergen.
Stalın men onyń tarıhtaǵy róline oń baǵa beretinder arasynda Reseı kommýnıstik partııasyn jaqtaıtyndar ǵana emes, prezıdent saılaýynda Vladımır Pýtın men Vladımır Jırınovskııge daýys bergender de bar. Áleýmettanýshylar sózinshe, barlyq jas sanaty boıynsha Stalınge oń baǵa beretinder basym túsken.
Saýalnama qorytyndysy boıynsha, "Stalın tusynda azamattardyń repressııaǵa ushyraýyn aqtaýǵa bolmaıdy" degen oıdy reseılikterdiń 45 paıyzy qoldaıdy. 2008 jyly bul kórsetkish 60 paıyz edi.
2017 jyly "Levada-entr" sońǵy 27 jylda Stalınge oń qaraıtyn adamdar sany úsh ese artqanyn habarlaǵan.
2019 jyly SSSR-da jappaı qyryp-joıý repressııasynyń bastalǵanyna 82 jyl tolady. Qazaqstan da odan tys qalmady. Zertteýshilerdiń aıtýynsha, sovet bıligi kezinde Qazaq SSR-inde 3,5 mıllıon adam repressııaǵa ushyraǵan. Tutqyndaý men atý jazasynyń basym kóbi bılikte Iosıf Stalın otyrǵan kezde boldy.
"Azattyq" radıosy
