Almatyda belgili teatr jáne kıno akteri Iýrıı Pomeranevtiń qurmetine eskertkish ashyldy, dep jazady Almaty.tv telearnasynan Ulaǵat Arǵyn men Ernat Bolatbek.
Ańyz adam – sahna sańlaǵy kórermenge «Ivan Groznyı», «Bizdiń súıikti dáriger», «Atameken» fılmderi arqyly jaqsy tanys. Ónerge ómiriniń 77 jylyn arnaǵan azamat ómiriniń sońyna deıin sahnadan túsken joq. Saltanatty is-sharaǵa shyǵarmashylyq zııaly qaýym ókilderi men qoǵam qaıratkerleri qatysty.
Ǵasyrǵa jýyq ǵumyr jasaǵan Iýrıı Pomeranev ómiriniń sońyna deıin kórermenniń ystyq yqylasyna bólenip ketti. Kınoda somdaǵan 300-den astam túrli obrazy keńestik kınematografııanyń altyn qorynda saqtaýly. Kópshilik rejısserlik etken qoıylymdaryn da jaqsy biledi. Búgingi eskertkishtiń ashylý saltanatyna qala ákimi Erbolat Dosaev ta kelip, quttyqtaýyn jetkizdi.
«Bul – Almaty qalasy men onyń mádenıeti úshin mańyzdy oqıǵa. Iýrıı Borısovıch Pomeranevke arnalǵan eskertkishtiń ashylýyna qatysý men úshin erekshe qurmet. Ol – óz kásibine, kórermenine, teatrǵa adal bola bildi. Búgingi qýanyshtaryńyz qutty bolsyn», – dedi Almaty qalasynyń ákimi Erbolat Dosaev.
97 jasyna deıin spektalde oınaǵan Pomeranevke mátin jaǵy qıynǵa túspeıtin deıdi biletinder. Jattap ta almaıtyn. áriptesteri «sahnaǵa shyqqanda, ol aıtar sózin jan dúnıesinen shyǵaratyn» dep eske aldy.
«Men oǵan tańǵalatynmyn, ol ǵajap adam edi. 98-99 jasynda sahnada turyp 3 saǵat sóıleıtin. 100 jasyna deıin sahnada oınady. Búgingi eskertkish – jaqsy bastama», – dedi Qazaqstannyń eńbek eri Asanáli Áshimov.
Qol músin qaladaǵy Lermontov atyndaǵy Ulttyq orys drama teatry ǵımaratynyń aldyna qoıyldy. Pomeranev osy óner ordasynda ómiriniń sońyna deıin eńbek etken edi. Músin Nurlan Smaǵulov qorynyń qoldaýymen ornatyldy. Bul qazaqstandyq meenattyń Almaty jurtshylyǵyna syılaǵan tórtinshi eskertkishi.
«Men Iýrıı Pomeranevpen 60 jyl birge jumys istedim. Ol rejısserlik etken 5 spektaklde basty róldi somdadym. Ómirin túgeldeı sahnaǵa, teatrǵa arnaǵan tulǵalar neken-saıaq. Iýrıı sol sırekterdiń qatarynda. Men ony týma talant dep baǵalar edim», – deıdi QR Eńbek sińirgen ártisi Gennadıı Balaev.
Iýrıı Pomeranev – Uly Otan soǵysyna da qatysqan ardager. Kózi tirisinde «Erligi úshin» medalimen, II dárejeli Otan soǵysy ordenimen marapattalǵan. Búgingi saltanatty jıynǵa jergilikti áskerı basqarý organdarynyń áskerı qyzmetshileri men Radıo-elektronıka áskerı ınjenerlik ınstýttyń kýrsanttary da qoldap keldi.
