Elimizde bolyp jatqan saıası ózgerister búgingi reformalardyń temirqazyǵyna aınalýy kerek. Bul týraly búgin «AMANAT» partııasynan saılanǵan barlyq deńgeıdegi máslıhattar depýtattarynyń alǵashqy respýblıkalyq forýmynda partııa Tóraǵasy Erlan Qoshanov aıtty.
Onyń sózinshe, osynaý reformalar bolashaqta el damýynyń kepili bolady.
«Ótken bir jyldyń ishinde bes birdeı taǵdyrsheshti saıası naýqan ótkizdik. Eldegi saıası ózgerister búgingi reformalardyń temirqazyǵyna, bolashaqtaǵy el damýynyń kepiline aınaldy. Biz osy joldan aınymaımyz», – dedi ol.
Aıta keteıik, atalǵan forýmǵa elimizdegi máslıhattardan 2,5 myń depýtat kelip qatysty.
«Mundaı basqosýlar bılik tarmaqtarynyń ózara baılanysyn nyǵaıtyp, ortaq konstrýktıvti sheshimder qabyldaýǵa jol ashady. Búgingi Forýmnyń basty maqsaty – memleket pen qoǵam aldynda turǵan, halyqty tolǵandyryp otyrǵan ózekti de ótkir máselelerdi birlesip, ashyq talqylaý, olardyń sheshý joldaryn izdeý. Bul – ýaqyt talaby», – dedi Erlan Qoshanov.
