Oralbek Qojageldın, Asqar Shaıhıev, Qonys Jetpisov, Erbolat Baıbatyrov-taı balýandary men Danııar Eleýsinov, Dáýren Eleýsinovteı boksshylary Batys Qazaqstan óńiriniń ǵana emes, kúlli Qazaq Eliniń maqtanyshtary edi. Edi dep ótken shaqpen eske alyp otyrǵanymyz búgingi Oral sportynyń jaǵdaıyna qarap qarnyńnyń ashqanyna emes, qadirińniń qashqanyna jylaıdy ekensiń.
Jaqynda ǵana ulttyq sport túrlerinen Qyzylordada jastar arasynda el chempıonaty márege jetti. Batys Qazaqstan oblysy osy baıraqty básekede komandalyq esepte segizinshi orynǵa ilindi. Ilingenine táýbá deýge bolady. Aty aıtyp turǵandaı ulttyq sport bolǵandyqtan bunda salmaq pen kúsh atqa túsedi. Al, batystyq sportshylar osy jarysqa 21 adam 7 atpen barǵan. 3 adam bir atqa mingesken soń jaǵdaı belgili ǵoı. Kókpardan Mańǵystaýdan 12:0 esebimen oısyraı utylsa, Qyzylorda quramasynan 12:3 esebimen tas-talqan boldy.
Negizi, Oraldaǵy at sporty mektebinde 38 at pen attardy tıep aparatyn KAMAZ kóligi de bar. Biraq, aqsha únemdeý maqsatymen (!) 7 ǵana at aparyp, qalǵan attardy Qyzylordadan jalǵa alypty. Júgen ustaǵan shabandozdar jarysqa daıyndalýdyń ornyna aýyl-aýyldan at izdegen!
Jamby atýdan irikteýden de ótpeı qalǵan.
Burynnan qurysh bilekti balýandardyń mekeni sanalatyn Batys Qazaqstan dzıýdodan jasóspirimder arasyndaǵy Atyraýdaǵy el birinshiliginde 15 komandanyń ishinen 15 oryn aldy.
Jaqynda ǵana Shymkent qalasynda ótken kúres túrlerinen ótken el chempıonatynda Batys Qazaqstan oblysy taǵy kósh sońynan kórindi.
Negizinde, byltyr Mańǵystaýda ótken QR Prezıdenti N. Nazarbaevtyń júldesine arnalǵan VI Halyq sporty oıyndarynan nátıje shyǵarý kerek edi. Sol kezde BQO 17 oblys pen qalalardyń ishinen 17 oryn alǵan bolatyn.
Bıylǵy kúres túrleri Spartakıadasynda da sońǵy ózderiniń «menshiktep» alǵan oryndarynda kele jatyr.
«Aqjaıyq» fýtbol klýby jaıly jazatyn bolsaq jankúıerleri jylaǵandy qoıyp, joqtaý aıtýǵa bar. Byltyr el chempıondary «Astanany» Aqsaıda 3:0-men tizerletip, «Ertis» pen «Qaıratty» upaısyz qaldyrǵan aıaqdopshylar Jaıyq jaǵasyn tik turǵyzyp edi. Basshylyqpen kelispegen ýkraınalyq bapker Vladımır Mazıar maýsym ortasy bolmaı ornynan ketti. «Aqjaıyq» ta óziniń taz qalpyna túsip, Premer-Lıgadan ushyp ketken bolatyn.
Kezinde, kezinde bolǵanda osydan 10 jyl buryn BQO sporty túlep sala berdi. Sambodan Álem Kýbogy da Aqjaıyq jaǵasynda ótkenin kózi qaraqty sport jankúıerleri jaqsy biledi. Batys sportynyń kúre tamyryna qan júgirtken Músilim Ońdaǵanov bolatyn.
Bári de basshyǵa baılanysty ekenin qazirgi menedjerlik-uıymdastyrýshylyq júıege kóshken sport salasy dáleldep otyr.
Batys Qazaqstan oblysynyń dene shynyqtyrý jáne sport basqarmasynyń basshysy qyzmetine Amanbaeva Ásııa Rahymqyzy kelgenine bıyl eki jyl toldy. Osy eki jyldyń ishinde bilikti bapkerlerdiń kóbi «óz erkimen» qyzmetten ketti. Durysy, ketirdi. Kadrlardyń qadirine jetpegen basshynyń kesirinen kóptegen bilikti mamandar basqa jerge qyzmetke aýyssa, biraz sportshylar ózge aımaqtyń atynan synǵa túsip júr.
BQO dene shynyqtyrý jáne sport basqarmasy Amanbaeva Ásııa Rahymqyzynyń qolynan "oqqa" ushqandar:
- BQO dene shynyqtyrý jáne sport basqarmasy basshysynyń orynbasary Dınara Esenǵalıeva
- BQO dene shynyqtyrý jáne sport basqarmasynyń bas býhgalteri Nurbolat Qylyshev
- Bas maman býhgalter ekonomıst Sáýle Batyrǵalıeva
- Sport boıynsha bas maman Jaısań Ǵubaıdýllın
- Aqjaıyq fýtbol klýbynyń dırektory Azat Qazıhanov
- Boks mektebiniń dırektory Nurjan Kárimjanov
- Olımpıada rezervin daıarlaý ortalyǵynyń dırektory Galıb Djafarov
- Sport-ınternat dırektory Qanat Jańǵalıev
- At sporty mektebiniń dırektory Dastan Myrzaǵalıev
- Boks sport mektebi dırektorynyń orynbasary Lılııa Qurmanova
- Múgedekter sport klýby dırektorynyń orynbasary Dáýren Qabdolov
- Avıaııa sport mektebiniń dırektory Ergen Orynbasarov
«Aqjaıyq» fýtbol klýbyna dırektor bolyp Azat Qazıhanovtyń ornyna kelgen Nurtaza Ábilhanovty da osy tizimge qosýǵa bolady. Muz sport saraıynyń dırektory Esqabyl Jalmurzıevti densaýlyǵyna baılanysty em qabyldap júrgen kezinde jumystan shyǵaryp, arty daýǵa aınalyp, zań oryndaryna júgingen Jalmurzıev qaıtadan jumysyna oraldy. Joǵarydaǵy azamattar da qazaqshylyqqa salynbaı zań oryndaryna aryzdansa qyzmetterinde qalatyn edi.
Jalpy, Batys Qazaqstan oblysy sportynyń sońǵy kezdegi «jetistikterine» óńir sportynyń ardagerleri men jankúıerleri de alańdaýly. Sport – ol oblystyń ekonomıkalyq jáne áleýetiniń aınasy ekenin eskersek, Oral sportynyń aınasynyń shańyn súrtetin basshy kánekeı? Qazaq "áıel bastaǵan kósh ońbas" deıdi. Sport er-azamattyń qyzmeti. Osy salany dóńgelentip áketetin aıbyndy azamat, jigerli jigitter Jaıyqtyń jaǵasynda da jetip artylady.
Erkin Orazbaev
