El şyǧysynan tigen ört qoǧamdy bei-jai qaldyrmady. Erıktıler qol ūşyn sozuǧa attanyp, qalyŋ el qolynda barymen bölısuge tyrysyp jatyr. Jalpyūlttyq Aza künı jariialanyp, halyqty jūmyldyruǧa talpynys baiqalady. Aqyndar, jalpy osy oqiǧaǧa qatardai jai retınde qarai almaityn adamdar köŋıl, yqylasyn öleŋmen de bıldırgen.
Abai oblysyndaǧy alapat örttı auyzdyqtau üşın mümkın bolǧan tehnikanyŋ bärı jūmyldyrylyp otyr. Odan bölek, tılsız jaudyŋ saldarynan zardap şekken Semeige elımızdıŋ är aimaǧynan kömek körsetılude. Äleumettık jelılerde halyqtan aqşa jinap, qol ūşyn sozyp jatqan belsendıler de jeterlık. Qarjylai kömekten bölek ruhani azyq berıp, halyqqa sözderımen demeu bolyp, eldı bırlıkke şaqyrǧan aqyndar da barşylyq.
«ŞARASYZ JATYR KÜIIP JANYM MENIŊ»
Parlament mäjılısınıŋ deputaty, aitysker aqyn Rinat Zaitov tuǧan jerın bylai dep jyrǧa qosty:
Semeiım — syrly qalam, biık törım.
Tuystarym, dostarym, süiıktı elım.
Tılsız jaudy jeŋe almai saǧan tigen
Şarasyz jatyr janym küiıp menıŋ...
Aqyn jerlesterın osyndai qiyn-qystau künde synbai, bırlıkte boluǧa şaqyrady:
Aitarym barşa tuys, bar dosyma
Bırlık kerek, jau kelse el qasyna.
Ruhyŋ syna körmesın, semeilıkter
Aǧaiyn, sen qūlama, sen jasyma!
«QANDAI JOQTAU AITAIYN ERIM ÜŞIN?!.»
Daryn jastar syilyǧynyŋ laureaty, aitysker aqyn Sara Toqtamysova da özınıŋ instagram paraqşasynda Semeilıkterdı qoldauǧa arnalǧan öleŋ joldaryn jariia ettı.
Semeiım, jüregımnıŋ bölıgısıŋ,
Qazaqqa bölıp bergen köp yrysyn.
Qanatymen su sepken qarlyǧaştai
Qandai söz tapsam eken elım üşın?
Şarasyzdan şarq ūrǧan şaǧaladai,
Nendei kömek bere alam jerım üşın?
Bozdalada şyryldap boztorǧaidai
Qandai joqtau aitaiyn erım üşın?
Azamatyn joqtaǧan analardyŋ
Köru qiyn köz jas pen körınısın...
Alladan järdem sūraǧan Sara Toqtamysova jaŋbyrmen barlyq auyrtpalyqtyŋ jaŋa oblystan ketuın tıleidı.
«SEP BOLAR MA EKEN KÖZ JASYŊ...»
Qaza tapqandardyŋ jaqyndarymen kezdesu barysynda közıne jas alǧan Ekologiia ministrı Zülfiia Süleimenovanyŋ videosy keŋınen tarady. Osyǧan bailanysty aqyn Töreǧali Täşenov özınıŋ feisbuk paraqşasynda «O, Zülfiia, Zülfiia» öleŋımen bölıstı.
Aqyn öleŋınde el basqaru jauapkerşılıgın moiynǧa alǧandardy
Bilıgıŋ otyr myŋqiia,
Şırengen öŋşeŋ şyrtiia, - dep synaidy.
Ünsız egılıp jylaǧan ministrge myna öleŋ joldaryn arnady:
Jylai tüs, şyŋǧyr, şyrqyra!
Sep bolar ma eken köz jasyŋ,
Qara ormanyŋ —
Ūltyŋa!...
«TAǦY IZDEŊDERŞI...»
Aitys aqyny ärı jurnalist Bekjan Äşırbaev ta elımızdıŋ basyna tüsken jaidy jyryna arqau ettı. «Ot biı» dep atalatyn öleŋ ört söndıruşılerdıŋ örlıgıne arnalǧan:
Bozdaq bop kettı bota jasynda,
Üreilı köŋıl—aqböken.
Taǧy ızdeŋderşı ot arasynda
Adasyp jürgen joq pa eken?.. degen joldary oqyǧan jannyŋ jüregın tebırentpei qoimasy anyq. Qyzmetın atqaryp jürıp qaza tapqan bügıngı künnıŋ batyrlaryna degen qūrmetın «orman qorǧady perıştesındei, peiışten bolǧai mekenı!» degen sözderınen aŋǧaramyz.
«JANDARY JARLY BALASY QALDY»
Aqyndardan bölek el tūrǧyndary da tılsız jaudy jyrǧa qosyp, qaiǧysyn öleŋmen jetkızude. Sonyŋ bırı İsgül Erbaeva.
Dalamnyŋ tösın jailaǧan ört,
Qaraǧailardy jaipaǧan ört,
Jandaryn mynau şyrqyratyp,
Batyrlarymdy jalmaǧan ört.
Balasyn joqtap analar qaldy,
Jartysyn joqtap jarlary qaldy,
Äkesın kütıp jolyna qarap,
Jandary jarly balasy qaldy.
İnstagram jelısınde avtory Ramazanov dep körsetılgen «Semei ormany» dep atalatyn qaza tapqandardyŋ ruhyna baǧyştalǧan orys tılındegı öleŋ jariialandy.
Merei Myrzaǧaliqyzy
Ūqsas jaŋalyqtar
