Aqtóbe oblysynyń Yrǵyz aýdanyndaǵy Janys bı jáne Sheńbertal aýyldarynda 1500-ge jýyq adam turady. Búginde olardyń barlyǵy qudyqtyń sýyn iship otyr. Al sýdyń sapasy men sanıtarlyq jaǵdaıy kóńil kónshitpeıdi. Onyń ústine, qudyqtyń sýy aýyq-aýyq tartylyp ketedi. Máseleniń mán-jaıy «AMANAT» Partııalyq baqylaý komıtetinde talqylandy.
Partııalyqtar anyqtaǵandaı, atalǵan aýyldarda «Kólsaı Stroı» JShS-y uzyndyǵy 42,3 km bolatyn sý qubyryn salýy kerek edi. Alaıda, qubyr paıdalanýǵa qabyldanbady. Sebebi ony salý kezinde qurylys talaptary buzylǵan.
«Sý keledi dep úmittengen kóptegen turǵyn óz ýchaskesine qubyr júrgizip, qajetti qural-jabdyqtar satyp alǵan, tipti sol kerek-jaraq zattardy alý úshin qaryzǵa da batty. Alaıda, qazirgi ýaqytta naqty merdigerdiń bolmaýyna jáne kóptegen kemshilikterdiń oryn alýyna baılanysty sý qubyryn paıdalanýǵa berý múmkin emes. Sheńbertaldaǵy sý sorǵy stansasy – osy aýylda alǵash ret salynǵan nysan. Jumysyna júrdim-bardym qaraıtyn sheneýnikter turǵyzǵan sý munarasy búginde sybaılas jemqorlyqtyń sımvolyna aınaldy», – dedi partııalyq baqylaý ınspektory Aıjan Ysqaqova.
Buǵan jaýap retinde Ekologııa mınıstrligi Sý resýrstary komıtetiniń tóraǵasy Nurlan Aldamjarov «Kólsaı Stroıǵa» qatysty sotqa talap aryz joldanǵanyn habarlady.
«Aıta ketý kerek, 2022 jyly sý qubyry synaq rejıminde qosyldy. 1 sáýirden bastap elektr energııasynyń bereshegine baılanysty sý berýdi toqtatty. «Kólsaı Stroı» eki aıdyń ishinde barlyq kemshilik joıylady dep sendirip otyr. Qyrkúıek aıyna deıin tolyq paıdalanýǵa berip, oblystyq kommýnaldyq menshikke ótkizemiz. Bizdiń komıtet búkil respýblıka boıynsha osyndaı nysandardyń tapsyrys berýshi bolyp tabylady, sondyqtan da barlyq jerdegi qurylys jumystaryn qadaǵalap úlgermeımiz. Bizde osy jumyspen aınalysatyn tek 4 maman bar», - dedi ol.
Májilis depýtaty Nurjan Áshimbetov tapsyrys berýshiniń atqaratyn qyzmeti Sý resýrstary komıtetine tán emes ekenin alǵa tartty. Óıtkeni olar Astanadaotyryp qurylys sapasyn baqylaı almaıdy. Sondyqtan ol qoldanystaǵy jumys tártibin qaıta qaraýdy usyndy.
«Bul máseleni eshkim kótergen joq, tipti, partııanyń aýdandyq fılıaly da únsiz otyr. Jeke ózińiz baryp, sý qubyryn paıdalanýǵa bergenshe sol jerde otyryńyz. Adamdardyń sýsyz qalaı ómir súrip jatqanyn óz kózińizben kórip, sol jerde turyp kórińiz. Shilde aıynyń sońyna deıin aýyl turǵyndary qubyrmen keletin sýdyń ıgiligin kórýi kerek», - dedi PBK múshesi Maıra Aısına.
Jıynǵa qatysýshylar qoǵamdyq rezonansqa qaramastan máseleni sheshýge asyqpaǵan «AMANAT»-tyń Yrǵyz aýdandyq fılıalynyń sylbyr áreketin de synǵa aldy.
«Atalǵan másele óńirlik saılaýaldy baǵdarlamaǵa jáne ony iske asyrý jónindegi Jol kartasyna engizilmegen. Bul jergilikti halyqtyń problemalaryn zerdeleý boıynsha oblystyq jáne aýdandyq fılıaldardyń jumysynda aıtarlyqtaı kemshiliktiń bar ekenin dáleldeıdi. Sonymen qatar partııanyń aýdandyq fılıaly bir jarym jyl ishinde is júzinde tıisti memlekettik organdarǵa birde-bir hat jibermegen, al partııanyń Ortalyq apparatyna oryn alǵan jaǵdaı týraly aqparat ýaqtyly jetkizilmedi», - dep atap ótti partııa hatshysy Erjan Jylqybaev.
Jıyn sońynda Komıtet «AMANAT»-tyń Yrǵyz aýdandyq fılıalynyń Atqarýshy hatshysyn, Yrǵyz aýdandyq partııalyq baqylaý komıssııasynyń tóraǵasyn jáne Aqtóbe oblystyq partııalyq baqylaý komıssııasynyń tóraǵasyn partııalyq jaýapkershilikke tartýǵa qaýly etti.
