Yrǵyz aýdanyndaǵy Janys bı jáne Sheńbertal aýyldarynyń turǵyndary aýyz sýǵa zar bolyp otyr. Jergilikti halyq isher sýyn qoǵamdyq qudyqtan tasyp ishýge májbúr. Osyǵan oraı «AMANAT» Ortalyq apparaty Partııalyq baqylaý departamentiniń ınspektory Aıjan Ysqaqova aýyldarǵa arnaıy baryp, halyqtyń muń-muqtajyn tyńdady.
Atalǵan aýyldarǵa sý qubyryn tartý jumysy 2020 jyly bastalǵan. Uzyndyǵy 41 shaqyrymnan asatyn sý qubyrlarynyń qurylysyna 700 mln. teńgeniń ústinde qarjy bólindi. Tapsyrys berýshi – Ekologııa mınıstrligi Sý resýrstary komıtetiniń «Qazsýshar» sharýashylyq júrgizý quqyǵyndaǵy respýblıkalyq memlekettik kásiporny sý sharýashylyǵy komıteti. «Kólsaı Stroı» JShS merdiger retinde qurylys jumysyn óz moınyna alǵan. Bir jyldan keıin sý berile bastady. Alaıda kóptiń qýanyshy uzaqqa sozylmady. Sýdan tapshylyq kórip, ábigerge túsken aýyl turǵyndarynyń janaıqaıyn Jolan Ábenov jetkizdi.
«Sý 2021 jyly berilip edi. Qysta birtindep qatyp qaldy. Kún jylyǵan soń toń erip, sý qaıta aǵatyn bolar dep úmittendik. Alaıda sáýir aıynan beri sý sap tyıyldy. Aqshasy tólenbegendikten qıyp tastaǵan dep estidik. Jaǵdaıymyz qıyn. Qazir bir-bir qudyq qazyp alyp, sýyn súzip iship otyrmyz. Sýdyń qory azaıyp kele me, qazǵan jerden sý da shyqpaıdy», - dedi ol.
Aqsaqaldyń sózin aýdan ákimi Nurlan Qyzbergenov rastap otyr. Onyń aıtýynsha, sáýir aıynan bastap halyqqa sý berilmeı jatyr. Onyń birinshi sebebi 600 myń teńge bereshek tólenbeı, elektr energııasy qıylǵan. Al tapsyrys berýshi qurylysty áli qabyldamaǵan bolyp shyqty.
«Buǵan deıin de mundaı máseleler kezikti. Biraq biz muny 1-3 kúnniń kóleminde sheship, bereshek qarjyny merdigerge tólettirdik. Sý qubyry jarylyp, 4-5 kún sý berilmeı qalǵan kezder de boldy. Biraq aýyldyń halqy sýsyz otyrmasyn dep «Sý sharýashylyǵy» KMK mamandaryn jiberip, jarylǵan jerlerdi óz kúshimizben jamadyq. Bul jerde tapsyrys berýshi men merdiger birigip jumys isteýi kerek», - dedi aýdan ákimi.
Nurlan Qyzbergenov sý qubyrlaryn salý qurylys normalaryna sáıkes júrgizilmegenin atap ótti. Qurylys jumysyn tolyq aıaqtaý, kemshilikterdi qalypqa keltirý týraly merdigerge usynys hattar da jazylǵan. Alaıda kópshiliktiń úni jaýapsyz qalyp otyr.
Sheńbertal aýylynyń turǵyndary bolsa, qurylystyń sapasyz júrgizilgenine narazy. Aýyl turǵyny Amanbek Ysqaqov qurylys jumysynyń áýel bastan-aq durys júrgizilmegenin alǵa tartty.
«Kólsaı Stroı» JShS-nen jastar kelip, jumysty salǵyrt jasap ketti. Endi elektr jelisi de qıyldy. Halyq qınalyp otyr. Sý bar bolǵany úsh aı ǵana aqty. Talabymyz – sý qosylsyn», - dedi ol.
Osy aýyldyń taǵy bir turǵyny Sydyq Moldabekov jalǵyz qudyqtan sý ishken halyqtyń densaýlyǵyna, tazalyq jaǵdaıyna alańdaýly.
«Turǵyndardyń árqaısysy úıinen bir-bir shelek alyp barady. Bir qudyqqa júz shelek túskende qandaı tazalyq bolady? Sol sýdy biz iship otyrmyz. Qubyrmen kelgen sý qysta qatyp qaldy, artynan motory isten shyqty Qurylys jumystary durys júrgizilse bulaı bolmas edi. Osy máseleni sheship berýlerińizdi suraımyz. Bizdiń jaǵdaıymyzǵa beıjaı qaramaı, «AMANAT» partııasynan arnaıy kelgenderińizge rızashylyǵymyzdy bildiremiz», - dedi ol.
Partııalyq baqylaý departamentiniń ınspektory Aıjan Iskakova árbir turǵynnyń pikirin, ótinish-tilegin muqııat tyńdady. Bul másele partııalyq baqylaýǵa alynatynyn aıtty.
«Jınalǵan akt, bizge berilgen qujattyń barlyǵyn qaradyq. Aldaǵy ýaqytta komıtettiń otyrysyna jaýapty vedomstvo ókilderi, komıtet tóraǵalary shaqyrylady. Partııa bul máseleni sońyna deıin baqylaýǵa alady. Óıtkeni Óńirlerdi damytýdyń ulttyq jobasy aıasynda halyqty 100 paıyz taza aýyz sýmen qamtamasyz etý – Prezıdenttiń bergen tapsyrmasy. Sondaı-aq bul máseleni sheshý partııamyzdyń baǵdarlamasynda da kózdelgen. Ony oryndaý, qadaǵalaý – mindetimiz», - dedi Aıjan Ysqaqova.
