Almaty oblysynda 600 adam dalada qalýy múmkin. Kókózek aýylyna qysymy joǵary gaz qubyry túsetindikten, 137 úı súrilmek, dep habarlaıdy «Adyrna» tilshisi Almaty.tv-ge silteme jasap.
Shatyryn qurap, shańyraǵyna ornalasyp alǵan jurt qýanyshynyń uzaqqa barmaǵanyn aıtady. «Qonys toıyn endi jasaımyz» degen olar kórshilerimen tanysyp ta úlgermepti. Jańadan kóship kelgender bul jer teliminiń qyzyl syzyqqa engenin jaqynda bilgen. Al zań boıynsha ondaı aýmaqqa qurylys nysany túspeýi kerek.
«Almaty-Baıserke-Talǵar gaz magıstraliniń ekinshi tarmaǵy ótetindikten búkil úıdi súrmekshi. Bul jerde múgedek otbasy, jalǵyzbasty analar, kópbalaly analar bar. Endi 137 úıde 600-den asa turǵyn bar, biz qaıda baramyz?» – dedi Kókózek aýylynyń turǵyny Janar Seıitqojaeva.
Al aýyl ákimi turǵyndarǵa bir jyl buryn eskertý berilgenin alǵa tartyp otyr.
«Qarasaı aýdany jer qatynastar bólimimen tender berildi. Baǵalaýshylar osy mańaıdaǵy turǵyn úıdiń qunyn anyqtaıdy. Soǵan sáıkes shyǵyn óteledi. Al kelispese, sot arqyly júzege asyrylady. Kelisip jatqan otbasy bar, olardyń sanyn qazir naqty aıta almaımyn. Jumys júrip jatyr», – dedi Eltaı aýyldyq okýrginiń ákimi Birjan Mahatov.
Kópshiliktiń aıtýynsha, qyzyl syzyqqa úılerden bólek, mektep pen dári-dármek shyǵaratyn zaýyt ta túsip tur. Biraq ákimdik ókilderi mekteptiń qaýipti aımaqtan alys jatqandyǵyn aıtyp otyr. Dári shyǵaratyn zaýyttyń da tek qosalqy ǵımaraty súrilmek. Al alańdaýly aýyl adamdarynyń taǵdyry tenderge qarap tur.
