Búgin Jańaózende qalanyń munaı óndirýshi jáne munaı servıs kásiporyndarynyń qyzmetin taldaý maqsatynda «QazMunaıGaz» qyzmetkerlerinen qurylǵan arnaıy jumys toby óz jumysyna kirisedi, dep habarlaıdy “Adyrna” ulttyq portaly.
Quramyna 33 maman kirgen topqa QMG basqarma tóraǵasynyń orynbasary Dáýletjan Hasanov jetekshilik etedi.
Keshe QMG basqarma tóraǵasy Maǵzum Myrzaǵalıev Astanada arnaıy top qatysýshylarymen kezdesý ótkizdi. Olarǵa qalanyń eńbek ujymdarymen kezdesý ótkizý, jumysshylardyń eńbek jaǵdaıymen, satyp alý qyzmetimen jáne kásiporyndar jumysynyń basqa da tustarymen tanysý mindetteri qoıyldy. Jergilikti kompanııalar qyzmetkerleriniń kelisimshart talaptarynyń buzylǵany jónindegi shaǵymdary, sonyń ishinde Astanada ótken arnaıy komıssııa jumysy kezinde «BerÁli Mańǵystaý Company» kompanııasynyń burynǵy qyzmetkerleri málimdegen shaǵymdar jeke qaralatyn bolady, - delingen QMG taratqan habarlamada.
Budan basqa, kásiporyndardyń qyzmet túrlerin satyp alý rásimderinde sybaılas jemqorlyq qaýpin anyqtaý men jolyn kesýge erekshe nazar aýdarylady.
Jumys komıssııasy usynǵan taldaý qorytyndysy boıynsha ekonomıkalyq jáne áleýmettik sıpattaǵy ózekti máselelerdi sheshýge arnalǵan is-qımyl jospary jasaqtalady.
