ULTTYQ KADR MÁSELESI TEK NAZARBAEVQA ǴANA KEREK EMES, OL ELDIŃ BOLAShAǴY MEN KELEShEGINE KEREK

2054
Adyrna.kz Telegram

Úkimet jumysynan ketti... Biraq óziniń jasap ketken reformalaryndaǵy artyqshylyqtar men kemshiliktirine jaýap berip ketken joq. Bizde «táýelsizdik» alǵan kúnnen bastap on retke jaqyn ókimettiń korpýsy men quramy aýysty. Sol ókimettiń barlyǵyn da Prezıdent jasaqtady. Prezıdent sol ókimettiń quramyn jasaqtaǵanda bir de bir ret bolsyn halyqtyń pikirimen sanasqan joq.

Prezıdent jasaqtaǵan ókimettiń bir de bir quramy óziniń jasaǵan reformalaryndaǵy kemshilikteri úshin halyqtan keshirim suraǵan emes. Nege Saǵadıev óziniń jasaǵan reformalaryndaǵy kemshiligi úshin elden keshirim suramaıdy?  Ol nege halyqtan keshirim suraıdy eken? Ony halyq otyrǵyzǵan joq. Ony Prezıdent otyrǵyzdy. Ol sondyqtan Prezıdentten ǵana keshirim suraıdy. Sebebi, ol halyq úshin otyrǵan joq, ol Prezıdent úshin ǵana otyrdy.

Árbir mınıstrge qatysty osylaı aıta alamyz. Buǵan dálelder jetip artylatynyn el biledi. Bizdiń elde kadr máselesin Prezıdent qana sheshetinin bárińiz bilesizder. Sonda kadr máselesi tek Prezıdentke ǵana kerek sharýa ma?

Kadr máselesi naǵyz ulttyq másele. Kadr máselesi qashanda kópshilikpen kelisip sheshilýi kerek! Sebebi, ol halyqtyń ıgiligine jumys jasaý úshin kelip jatyr. Órkenıetti elderdiń barlyǵynda osylaı sheshiledi. Bizdiń halyqqa kadr máselesin sheshýde órkenıetti sana kerek. Áıtpese biz aldaǵy ýaqytta shash etekten asqan áleýmettik máselelerimizdi sheshe almaı tyǵyryqqa tirelemiz. Qazaqtyń ulttyq kadr daıyndaý máselesine birtutas el bolyp atsalysatyn ýaqyty kelip, esik qaǵyp tur. Munyń halyqtyń, eldiń bolashaǵy úshin sonshalyqty mańyzdy ekenine biz de nemquraıly qarap keldik. Ony moıyndaýymyz kerek. Endi nemquraıly bolmaýymyz kerek. Osynyń sońy sheksiz jemqorlyqqa aparyp soqty.

Bir adamnyń quziretindegi tirlik dep qaraǵannan soń, onyń sońy jemqorlyqqa aparyp, toqyraıtynyna mán bergen joqpyz. Sebebi, biz ózimizdiń halyqtyq kadrlardy saılap alýǵa qulyqsyz boldyq, nemquraıly boldyq, álsiz boldyq. Sol sebepten olar sony ózeriniń múddesine aıaýsyz paıdalanyp ketti. Kúshtininiń arty dıirmen tartady, aýzy qısyq bolsa da baı balasy sen sóıle degen sanadan arylmasaq, biz eshqashan da óspeımiz. Osy saıası astary bar maqaldy sanamyzǵa ábden sińirip tastaǵan. «Oı, bizdiń qolymyzdan ne keledi, ózderi sheshedi ǵoı» degen prınıpten aýytqymaı keldik. Bul neni bildiredi? Bul bizdiń saıası belsendiligimizdiń óte tómen ekenin bildiredi. Halyqtyń ózi osyndaı bolsa, árıne, olar bilgenin jasaı beredi. 30 jylǵa jýyqtady, óz degenin jasap keldi.

Bizdiń saıası qozǵalysymyz endi bastaldy. Halyq óziniń janyna áleýmettik aýyrtpalyqtyń qatty batqanyn endi anyq sezindi. Ay daýysyn kótere bastady. Qazirgi qazaq burynǵy qazaq emes. Osy ýaqytqa deıin eldiń estimegen daýysyn ókimet te, prezıdent te estidi. Olar ózderi bılik jasap otyrǵan halyqty ábden zerttegen. Aqyr sońynda eshqandaı konflıktige jol bergisi kelmeıdi. Soǵan baryn salyp, ókimetti taǵy da jasaqtap jatyr. Biraq bul olardyń eń sońǵy sheshimderiniń biri sııaqty kózge uryp tur. Basqa eshqandaı jol men saıası tehnologııalyq sheshim qalmaǵan da sııaqty. Nátıje qaı kezde bolady? Nátıje eldiń saıası bilimi men belsendiligi kúshine mingende bolady.

Bekbolat Qarjan

"Adyrna" ulttyq portaly

Pikirler