Ükımet jūmysynan kettı... Bıraq özınıŋ jasap ketken reformalaryndaǧy artyqşylyqtar men kemşılıktırıne jauap berıp ketken joq. Bızde «täuelsızdık» alǧan künnen bastap on retke jaqyn ökımettıŋ korpusy men qūramy auysty. Sol ökımettıŋ barlyǧyn da Prezident jasaqtady. Prezident sol ökımettıŋ qūramyn jasaqtaǧanda bır de bır ret bolsyn halyqtyŋ pıkırımen sanasqan joq.
Prezident jasaqtaǧan ökımettıŋ bır de bır qūramy özınıŋ jasaǧan reformalaryndaǧy kemşılıkterı üşın halyqtan keşırım sūraǧan emes. Nege Saǧadiev özınıŋ jasaǧan reformalaryndaǧy kemşılıgı üşın elden keşırım sūramaidy? Ol nege halyqtan keşırım sūraidy eken? Ony halyq otyrǧyzǧan joq. Ony Prezident otyrǧyzdy. Ol sondyqtan Prezidentten ǧana keşırım sūraidy. Sebebı, ol halyq üşın otyrǧan joq, ol Prezident üşın ǧana otyrdy.
Ärbır ministrge qatysty osylai aita alamyz. Būǧan dälelder jetıp artylatynyn el bıledı. Bızdıŋ elde kadr mäselesın Prezident qana şeşetının bärıŋız bılesızder. Sonda kadr mäselesı tek Prezidentke ǧana kerek şarua ma?
Kadr mäselesı naǧyz ūlttyq mäsele. Kadr mäselesı qaşanda köpşılıkpen kelısıp şeşıluı kerek! Sebebı, ol halyqtyŋ igılıgıne jūmys jasau üşın kelıp jatyr. Örkeniettı elderdıŋ barlyǧynda osylai şeşıledı. Bızdıŋ halyqqa kadr mäselesın şeşude örkeniettı sana kerek. Äitpese bız aldaǧy uaqytta şaş etekten asqan äleumettık mäselelerımızdı şeşe almai tyǧyryqqa tırelemız. Qazaqtyŋ ūlttyq kadr daiyndau mäselesıne bırtūtas el bolyp atsalysatyn uaqyty kelıp, esık qaǧyp tūr. Mūnyŋ halyqtyŋ, eldıŋ bolaşaǧy üşın sonşalyqty maŋyzdy ekenıne bız de nemqūraily qarap keldık. Ony moiyndauymyz kerek. Endı nemqūraily bolmauymyz kerek. Osynyŋ soŋy şeksız jemqorlyqqa aparyp soqty.
Bır adamnyŋ qūzıretındegı tırlık dep qaraǧannan soŋ, onyŋ soŋy jemqorlyqqa aparyp, toqyraitynyna män bergen joqpyz. Sebebı, bız özımızdıŋ halyqtyq kadrlardy sailap aluǧa qūlyqsyz boldyq, nemqūraily boldyq, älsız boldyq. Sol sebepten olar sony özerınıŋ müddesıne aiausyz paidalanyp kettı. Küştınınıŋ arty diırmen tartady, auzy qisyq bolsa da bai balasy sen söile degen sanadan arylmasaq, bız eşqaşan da öspeimız. Osy saiasi astary bar maqaldy sanamyzǧa äbden sıŋırıp tastaǧan. «Oi, bızdıŋ qolymyzdan ne keledı, özderı şeşedı ǧoi» degen prinsipten auytqymai keldık. Būl nenı bıldıredı? Būl bızdıŋ saiasi belsendılıgımızdıŋ öte tömen ekenın bıldıredı. Halyqtyŋ özı osyndai bolsa, ärine, olar bılgenın jasai beredı. 30 jylǧa juyqtady, öz degenın jasap keldı.
Bızdıŋ saiasi qozǧalysymyz endı bastaldy. Halyq özınıŋ janyna äleumettık auyrtpalyqtyŋ qatty batqanyn endı anyq sezındı. Aşy dauysyn kötere bastady. Qazırgı qazaq būrynǧy qazaq emes. Osy uaqytqa deiın eldıŋ estımegen dauysyn ökımet te, prezident te estıdı. Olar özderı bilık jasap otyrǧan halyqty äbden zerttegen. Aqyr soŋynda eşqandai konfliktıge jol bergısı kelmeidı. Soǧan baryn salyp, ökımettı taǧy da jasaqtap jatyr. Bıraq būl olardyŋ eŋ soŋǧy şeşımderınıŋ bırı siiaqty közge ūryp tūr. Basqa eşqandai jol men saiasi tehnologiialyq şeşım qalmaǧan da siiaqty. Nätije qai kezde bolady? Nätije eldıŋ saiasi bılımı men belsendılıgı küşıne mıngende bolady.
Bekbolat Qarjan
"Adyrna" ūlttyq portaly
