QR Prezıdentiniń keńesshisi Erlan Qarın elimizde partııalar úshin shynaıy básekelestik orta qalyptasqanyn aıtty, dep habarlaıdy «Adyrna» tilshisi.
«Aldaǵy saılaýdyń alǵysharty 2022 jyldyń naýryz aıynda, ıaǵnı, Prezıdent óz Joldaýynda saıası reformalardyń jan-jaqty baǵdarlamasyn usynǵanda qalanǵan bolatyn. Bir jylǵa jetpeıtin ýaqytta partııalar úshin shynaıy básekelestik orta qalyptasty, azamattardyń Parlament pen máslıhattarǵa ózin-ózi usynýyna jol ashyldy. Muny qolda bar statıstıka da dáleldep otyr. Mysaly:
1) Parlament saılaýyna barlyq jeti saıası partııa qatysyp jatyr. Onyń ekeýi partııa týraly zańnamaǵa ózgerister engennen keıin tirkeldi.
Sondyqtan partııalar arasyndaǵy básekelestik bul saılaý kampanııasynyń negizgi elementi bolmaq.
2) Májilis depýtaty bolýǵa partııalyq tizim jáne bir mandatty okrýgter boıynsha barlyǵy 892 azamattyń kandıdatýrasy usynyldy (ortasha eseppen 1 mandatqa 9 úmitkerden keledi).Saılaýǵa qoǵam qaıratkerleri men azamattyq belsendilerdiń kóptep qatysyp jatqany (onyń ishinde, ádette bılikti synap júrgen azamattar da bar) olardyń júrgizilip jatqan reformalarǵa senimi men qoldaýyn bildiredi.
Elimizde sońǵy jyldary oryn alǵan barlyq ózgeristerdi, barlyq jańashyldyqtar men reformalardy jurtshylyqtyń qyzý qoldap otyrǵanyn halyq arasynda júrgizilgen áleýmettik zertteýler de kórsetip otyr.Qazaqstannyń strategııalyq zertteýler ınstıtýtynyń málimetinshe, qazaqstandyqtardyń 71,7 paıyzy elimiz durys baǵytta damyp kele jatyr dep sanaıdy»,—dedi ol.
