Rıng
(áńgime)
I-raýnd.
Rıngke kóterilip kele jatyp, kók buryshtaǵy qarsylasyma urlana qaradym. Joq, burynǵydaı emes. Denesiniń shıyrshyq atyp jınala túskendigi kózge birden uryp tur. Býyltyq-býyltyq bilegi, qoladan quıǵandaı tyrsıyp turǵan keýdesi zaldyń aıqysh-uıqysh jaryǵyna erkin shomyla jaltyldap, adamnyń úreıin ushyratyn erekshe bir serpinmen julqynady. Rezeńkeli arqannan óte bere rıngke shyǵar aldyndaǵy jattyqtyrýshymnyń sońǵy pysyqtap aıtqan sózin esime aldym. «Al, armanyń oryndaldy. Eń bastysy, júregińe qorqynysh pen ózińe degen senimsizdik uıalamasyn. Ol - aýrý. Boıyńa bir kirip alsa qutylýyń qıyn bolady. Men seniń taktıkańa, tehnıkańa min taqpaımyn. Tek ashýǵa berilme!». Aqyryn ǵana sekirip, qol-aıaǵymdy erkin silkilep aldym. Ol bolsa qolǵabymen aýany osqylap, ersili-qarsyly júr. Júrisi nyq. Senimdi. Osy turysynyń ózi meniń boıyma qorqynysh dertiniń dánin seýip ketkendeı edi. Qaımyǵyp turmyn. Bilemin bul jigitti. Esimi - Mahmýd. Tipti jaqsy tanımyn desem de bolady. Menen bes-alty jasqa úlkendigi bar. Ulty basqa. Áıteýir, qazaq emes. Shamasy, taý ultynyń birine jaqyn. Biz birinshi kýrsqa kelip túsken saryaýyz balapan kezimizde «sport sheberi» degen ataqqa qol jetkizgen. Qazirgi baǵyndyrǵan bıigi de bes batpan. «Eki dúrkin álem chempıony». Tym maqtanshaq. Adamgershilikten sál adalaý jigit. Kózim kórgen.
Qarsylasyńnyń ózińnen ústem ekenin jan-júıkeńmen sezinýden asqan qorlyq joq. Ol ekeýmizdiń bir salmaqta olımpıada júldesine talasatynymyzdy estigende, alǵashynda qatty qýanǵam. Artynan sál basyldym. Óıtkeni, basqa salmaqtaǵylardaı emes, bizdiń salmaqta bir ǵana joldama. Kim utady, erteńgi olımpıada alaýy astynda baǵyn synaý quqyǵyna sol ıe. Bunyń aldynda olımpıada joldamasyn sarapqa salǵan Tashkenttegi týrnırge qolymdaǵy jaraqatym jazylmaı qatysa almaı qalǵan edim. Bul jolǵy maıdan - sońǵy múmkindik.
Meniń salmaǵymda baq synasatyn boksshilerdiń aty-jóni belgili bolǵanda asa qobaljı qoıǵan joqpyn. Kóbi áli tájirıbesi azdaý, úlken dodalarǵa endi-endi qatysyp júrgen, esimi kópke belgili bola qoımaǵan jastar edi. Ózimniń de daýyl turǵyzar ataǵym shamaly. Búgingi synda tóreshilerdiń bir aýyzdan júldeni qanjyǵasyna esh kúmánsiz baılaý baqytyna ıe bolǵan tek Mahmýd qana. Shappaı alady degen. Ataǵymen at úrkitip júrgen onyń ázirge mereıi ústem, salmaq ólsheýge, zalǵa jattyǵýǵa kelgende baıqap qalamyn, ózin tym joǵary baǵalaıtyn aqsúıektik kelbetpen pań basyp júr. Fınalda basty qarsylasym bolýy múmkin degen oımen azýly boksshiniń sharshy alańda ótkizgen oıyndary túsirilgen taspany qarap shyqtym. Muqııat zerttedim. Bizdiń elden ketkennen keıingi onyń oıyn órnekteri tipti de qulpyra túsipti. Qımyl-qozǵalysyn, taktıkasyn tolyq ashyp kórsetpeıdi. Birtúrli, jumbaq.
Buryndary ekeýmiz bir judyryqtasyp alǵanbyz. Rıngte emes. Jataqhanada. Judyryqtasqanda... men oǵan tipti qolymdy da tıgizip úlgermegem. Ol meni kúrzi judyryǵymen bir perip, taldyryp ketken. Biraq men ol kezde bul jigitpen baılanysam degen oıda emes edim, aıqasa ketýge de daıyndyǵym joq-tyn. Sodan meniń keýdemde oǵan degen kektiń qara daǵy qatyp qalǵan. Taıaq jegenim úshin emes. Áńgime basqada...
* * *
Tóreshi ekeýmizdi ortaǵa shaqyrdy. Jaqyndadyq. Súzegen buqaǵa uqsap maǵan qalyń qabaǵynyń astynan janaryn qadap tur. Sýyǵyn-aı, kóziniń! Tóreshi birnárselerdi byldyrlady. Bizdegideı «Bir-birińdi syılańdar! Tyıym salynǵan ádisterdi qoldanbańdar! Belden tómen urýǵa bolmaıdy! Tartymdy oıyn ótkizińder!» degen bolar. Ekeýmiz óz buryshymyzǵa qaraı jylystadyq. Endi taǵy da qarsylasyma durystap qaradym. Jep jiberetindeı. Gong úni. «Boks!». Alańnyń ortasyna qaraı umtyldyq. Tizginge talas. Ol erkin júr. Shamasy, ózin men úshin alynbaıtyn qamalǵa balaıdy. Kórermiz, kimniń-kim ekenin! Kijinip qaldym. Ańdysý bastaldy. Oń qolym sál tómenge túse berip edi, kózdi ashyp-jumǵansha onyń sol jaq judyryǵy ashyq qalǵan jaǵyma saq ete qaldy. Teńselip kettim. Kelesi judyryǵy ekinshi jaǵymdy janap ótti. 2:0. Arqanǵa tireldim. Dereý qorǵanysqa kóshtim.
Ol meniń eseńgiregenimdi paıdalanyp, tuqyrtyp almaqshy bolǵan oıyn aıqyndap qaıta-qaıta shabýylǵa kóshti. Tipti, eki-úsh soqqysy dittegen jerine tıip, delebesi qoza túsip edi. Ekeýmiz qushaqtasyp turyp qalǵandyqtan, tóreshi bizdi ajyratyp, ortaǵa shaqyryp, oıyndy qaıta bastaýǵa múmkindik berdi.
Tynysym aýyrlap bara jatyr, biraq, bul ýaqytta men sanamdy serpiltip úlgergen edim. Tipti oǵan degen ashý-yzany da boıymnan qýyp shyqtym da bul aıqasty jáı kúnderi ótkizetin sparrıng retinde qabyldadym. Onyń maǵan dúrse qoıa bermek oıynyń tas-talqanyn shyǵaryp, oń qolymmen aldaı otyryp, búırek tusynan aýyr eki soqqy berdim. Tabloǵa kózim tústi: 5:2. Zaldaǵy kórermenderdiń de shýyly bir sátke tynshı qalǵan. Endi alystan ańdysa bastadyq.
Resmı rıngten tys kúnderi men óz zalymda kúmbirli kúıdiń barynsha daýysyn shyǵaryp qoıyp, bıleı jattyǵatynmyn. Bı yrǵaǵymen terbele júrip, shapshań qımyldarmen qarsylasyńnyń júıkesin sharshatýǵa bolady. Birde ońǵa, birde sol jaq tusyna shyǵa júrip, alystan oraǵyta soǵyp ketip te ashýlandyrasyń. Al ashýlansa, onda onyń qorǵanysy syr bere bastaıdy. Kórermenderdiń aıqaı-shýyn, qolpashtaǵan, keketken sózderin sanańnan sylyp tastaýǵa mýzykanyń áseri mol.
Bul raýndta ekeýmiz de tolyqtaı qorǵanys shebinde boldyq. Tek, sońǵy ondaǵan sekýndtyń ishinde bir-birimizge eki-ekiden «sybaǵa» berip úlgerdik.
Óz buryshyma kelgende jattyqtyrýshym:
- Tym jaqyn qashyqtyqqa tartylma. Onyń fýndamenti bizde qalanǵan. Seniń syryńdy tolyqtaı biledi, - dedi.
Iıa, onyń qoly qysqa. Ishińe kirip alsa, toqtaýsyz soqqynyń astyna alady.
Betime sýyq sý shashyp, oramalmen ter bolǵan denemdi jelpidi, artynan moıyn tusymdy súrtti. Sekýndant.
- Alystan usta, - dedi jattyqtyrýshym. - Kúshińdi kóp saryqpa! Kýbalyq ádisti paıdalan!
Gong.
* * *
Jataqhananyń turmystyq bólmesinde tamaq ishken ydystarymyzdy jýyp jatqam. Kezek meniki bolatyn. Saǵat shamasy túngi 12-den ketken. Bul - stýdentter úshin jata qoıatyn ýaqyt emes. Bireýleriniń keshki aýqattaryn endi iship jatqan, endi biriniń tamaq jasaýdyń áýresine túsip jatqan mezgili. Kenet dálizden qyz balanyń qulyndaǵan daýysy estildi. Tanys sııaqty. Qarsylyqty, ári shoshyna shyqqan ún. Uzyna bitken zal ishin jańǵyrtyp áketti. Sanamnyń saqqulaq túısigi álgi únniń Jazıranyń daýysy ekenin uqtyryp úlgergen edi. Biraq ta ne úshin shyńǵyrǵanyn túsine almadym. Múmkin bir nárseden shoshyp ketken bolar degen oı keldi basyma. Dereý turmystyq bólmeden júgirip shyqqam. Shyqtym da, sileıip qatyp qaldym.
Bizdiń fakýltettiń sońǵy kýrsynda oqıtyn, osydan bir apta buryn ǵana ótken halyqaralyq týrnırde altynnan alqa taǵynyp, rektordyń qolynan marapattaý qaǵazyn ıemdengen jigit... Atyn esime túsire almadym. Onyń qasynda men tanymaıtyn, uzyn qara súrtigi tizesinen tómen túsken keń ıyqty qara-sur jigit. Myjyq qulaqty. Shamasy kúrespen aınalysatyn bolýy kerek. Ekeýi Jazırany kúshtep kóterip alǵan. Nıetteriniń oń emestigin uqtym. Jeńimpaz onyń aýyzyn bir qolymen jaýyp alǵan. Uzyn súrtigi tizesin soqqan jigit tynymsyz erbeńdegen aıaqtaryn qysa ustapty.
Jazıranyń sińilisi pedagogıkalyq ınstıtýtta oqıtyn. Qalada týys-týǵany bolmaǵasyn ápkesi ekeýi bizdiń jataqhanadaǵy bir bólmeni jaldap turatyn. Jazıra bolsa osyndaǵy balabaqshada tárbıeshi. Aýyldyń súp-súıkimdi qara qyzy. Ashyp aıtpaǵanmen ony unatatynmyn.
Osy kúzde ǵana jataqhanaǵa ornalasqan birinshi kýrstyń stýdentterin túngi saǵat tórtte ózimizben birge oqıtyn Jasulandardyń bólmesine jınap, «obıagtyń» jazylmaǵan zańdaryn úıretken, «starshaktyń» aıtqany ámanda zańdy ári durys ekendigin birneshe márte jýan judyryǵymen pysyqtap «túsindirgen» boksshy Mahmýd biz qatarlas «saryaýyzdar» turatyn 13-bólmeniń esigin asyǵystaý ashty. Demek, olardy da bólmesinen qýyp jibergen boldy. Jazırany kótergen ekeýi lyp berip ishke enip ketti. Ol janushyra taǵy da shyńǵyryp jibergen.
Taǵylyq kóriniske tańdana qarap, sostıyp turyp qalyppyn. Ay aıqaı dir etkizdi. Shamam jetpesin uǵynǵanymmen, qashan da erkektiń kómegin qajet etip turatyn qyzdy qutqarý kerek degen oı sanamdy osyp ótkesin tura júgirdim. Esikti jaba bergen Mahmýd meni kórgen. Dalbalaqtap jetip barǵanymda onyń oń qoly kóterile berdi de, kózimniń aldy qaraýytyp, ýaqytsha uıqy qushaǵyna tarta jóneldi. Daýystar kúńgirlep estildi. Jaǵymsyz qarqyl uzaqqa sozylyp baryp, birjolata sóndi.
...Esimdi ózimniń tósegimde jıdym. Mańdaıymda sýlanǵan oramal.
- Murynyń synyp ketken sııaqty.
- Tynystaǵanda aýyrmaı ma?
Ekeýi tóne qarap tur. Sataı men Nurym.
Aınalama maǵynasyz ǵana kóz tastaǵam. Ne bolǵany endi esime túse bastady.
- Analar qaıda?
- Ketip qalǵan, - dedi Sataı.
- Jazıra she? Jazıra... Ol qaıda?
- Ol... ol bólmesinde bolýy kerek.
Aqyryn kóterildim. Murynymnan bastalǵan shanshý joǵary kóterilip, mańdaıyma jetip, mıyma birtindep jaıylyp bara jatqandaı solqyldatyp jiberdi. Teńsele basyp esikke jettim. Jazıra bizge qabyrǵalas kórshi bólmede turatyn. Esikteri jabyq. Soqqylaı bastap edim ishten: «Kim?» degen dirilge toly aıanyshty ún shyqty.
- Jazıra, Jázók, bul men ǵoı, esikti ashshy.
Ókinish pen óksik tamaǵyma keptelip, kózim jasaýraı bastaǵandaı.
- Joq, ótinem senen, ketshi. Kirmeshi.
- Ash deıim!
- Ketshi... ket! - Ol jylap jatqan edi.
Vahtaǵa qatar ornalasqan komendant Shýhrattyń bólmesine keldim. Qyryqqa taıaǵan, qatyny joq, sánqoılaý, maıysyp qalǵan erkek.
Vahtanyń jaryǵy sóndirýli. Shýhrattyń esigin tún túgili kúndizdiń ózinde bekitip alatynyn jaqsy bilemin. Jataqhanaǵa keshke taqyr bastar kelgende jaryǵyn sóndirip, shyqpaı qoıatyn ádeti bar. Qorqatyny bar nesine basqarady eken?! Zyǵyrdanym qaınaǵan. Ishki tártipke sol jaýapty. Sál shegine berip esigin aıamaı teptim. Zaldyń mol jaryǵy menen buryn toǵandy buzyp ótken asaý ózendeı ishke qaraı lap qoıǵanda kúńgirt tartqan bólmeniń tereze túbindegi keń kereýetinen eki adamnyń basy kórindi. Komendent atyp turǵan. Ústinde lypasy da joq. Maǵan bir, tómengi jaǵyna bir qarady. Sasqalaptap, kereýet ústindegi aq jaımany julyp alyp áýretin japqan. Endigide onyń serigi - buıra shashty, keýdesin jún basqan grýzın tektes erkek aımandaı bolyp jatty.
- Ne... ne... ne boldy.., ne kerek? - Dirilge ulasqan tolqymaly daýys.
Serigi men maǵan kezektese qaraǵan. Esine túsken bolýy kerek, dereý júgirip keldi de esikke belindegi aq jaımany tutty.
Artyna bir buryldy da maǵan:
- Eger de aıtyp qoısań jataqhanadan qýylasyń! - dedi. - Biraq... aıtpaıtynyńa senem... - Jáýdiregen janary jalynyshqa tolyp tur.
- Ák-keńdi...! - Aınaldym da kete bardym.
Ol maǵan dym da degen joq. Esigin kóterip jatqanyn sezdim.
Sol túni tań atqansha kóz ilindire almadym. Qańǵybas Kún jer betine jaryǵyn molynan tóge bastaǵansha jylaǵan qos qyzdyń úni júregimdi naızaǵaısha tynymsyz osqylap shyǵyp edi...
II-raýnd.
Ol ortańǵy sheńberdiń ishine eki-aq attap jetti. Ekeýmiz taǵy da ańdys aıqasqa kóshtik. Bir mektepten tálim alǵasyn, sharshy alańda tyńnan túren salý da qıynnyń qıyny. Ashylyp kósile almaısyń.
Onyń osal tusyn tapqan sııaqtymyn. Ázirge tek dolbar. Naqty qoldanyp kórmegen soń tikesinen ketýge de bolmaıdy. Qyrsyq shalǵanda óz qateligiń óz basyna pále bolyp jabysýy da ǵajap emes. Sondyqtan onyń maǵan málim bolyp turǵan bul tusyn ábden tekserip alǵan abzal. Jattyqtyrýshym meni osyndaı sabyrlylyqqa tárbıeleýshi edi. Ashyq ári álsiz tusty utymdy paıdalaný bar da, onyń osy tusqa qorǵanys áreketin kúsheıtý arqyly kóp kúshin jumsaı álsiretý ádisi de bar. Ornymen qoldana bilgen adam ekeýiniń de sátti oraıyn taba alady.
Zaldaǵy kórermender shýlaı bastady. Bizdiń ashyq aıqasqa túskenimizdi qalaıtyn qanshama kóńildiń tilek-talaby zal ishin dúrildetip alyp barady. Osyny quptaǵandaı qarsylasym da qulshyna bastady. Áýeli tik soqqy jasady. Men de óz tarapymnan janama bir soqqy berip óttim. Biraq, ekeýmizdiń de soqqylarymyz tym álsizdeý boldy. Men onyń joıqyn soqqynyń egesi ekenin jaqsy biletinmin.
Qarsylasymnyń oıyn taktıkasyn ózgertýdi qalap, bastapqy tikturysynan oń jaq aıaǵyna aýysa bergeninde oń qolymmen aldaı otyryp oǵan sol qolymmen apperkot1berdim. Dittegen jerine baryp tıgen sol judyryǵym ony eseńgiretip jibergen sııaqty. Shaıqalaqtap baryp qaıta qalpyna keldi. Aýyr soqqydan qarsylasynyń kóz aldynyń tumandanyp ketetinin bokstiń álippesin ótken kez-kelgen bylǵary qolǵap kıgen adam jaqsy biledi, - men de onyń janyna eki attap jettim de, taǵy da sol qolmen jasqaı berip, oń jaq búırekten soqqy jasadym. Qorǵanystaǵy qoldarynan qaýip bola qoımaǵasyn osy soqqyny eki márte qaıtaladym da sol qolmen jaqtyń tusynan janamalaı urdym. Bar denemmen salmaq sala urǵandyqtan bul soqqynyń oǵan jeńil tımegenin oılap úlgergenimshe ol qulap tústi. Qyzyǵy, qulap jatqan jerinen dereý atyp turdy da eseńgirep baryp qaıta sylq etip otyryp qaldy. Nokdaýn! Ornynan tolyq turǵasyn maǵan qaıta shabýyldaýyma zor múmkindik tıgen. Tipti, onyń orynynan eseńgirep atyp turǵan kezinde apperkot nemese hok2berip ony birjolata nokaýtqa jiberýime de bolatyn edi. Oǵan tolyq senimdi bolatynmyn. Biraq ta beıshara boksshylardyń áreketin qoldanǵym kelmedi. Tóreshi onyń qasyna jetip bardy: Wan.., too.., theree.., four.., fife.., six.., seven..! Ol aýyr dem ala ornynan kóterildi. Tereń tynystap alýyna úsh-tórt sekýndtyq mursat berdim de qolymdy qalypty kóterip, jaqyndaı túskenimde gong úni estildi.
Onyń jattyqtyrýshylary dereý rıngke atyp shyqty da ústi-basyn súrte bastady.
* * *
Sol oqıǵadan keıin bir aı ótkesin ǵana Jazıranyń sińilisi Názırany jataqhanadan keziktirdim. Emhanadan shyqqanyma eki aptadaı ýaqyt bolǵanda bólmedegi qalǵan zattarymdy alyp qaıtýǵa kelgem.
- Jatqan jeri janattyń tóri bolsyn!
Ol basyn ızegen. Úndemedi. Kózi jasaýrady.
- Úı ishi jaqsy ma? - Suraǵymnyń orynsyz shyqqanyn kesh uqtym. Ózim de yńǵaısyzdanyp qaldym.
- Áıteýir... júr ǵoı.
Ekeýmiz de tómenge qaradyq. Az-kem únsiz, qımylsyz qaldyq.
- Eshteńe jazyp qaldyrmapty ma?
- Iá. - Ol basyn ızegen. - Júrińiz, - dedi óziniń bólmesine qaraı bastap.
Jupyny ǵana bólme. Betine túrli sýrettegi saǵyz oramasy japsyrylǵan aınasy bar syqyrlaýyq esikti eski shıfoner. Buryshta sur kompıýter. Jazıranyń tóseginiń basynda ilýli turǵan ánshi Toqtar Seriktiń sýreti kózime ottaı basyldy. Marqum jaqsy kóretin. Únemi onyń ánderin yńyldap aıtyp júretin. «Tabam dep ádildikti. Soǵyldy tasqa mańdaı. Aryltar aýyr júkti, Qınaldym dos taba almaı...». Bizdiń bólmege kelgen saıyn Nurymǵa osy ándi dombyramen aıtqyzyp qoıyp, muńǵa batyp tyńdaıtyn.
Názıra tósektiń astynda jatqan eski chemodannyń ishki qaltasynan tórtke búktelgen qaǵazdy alyp maǵan usynǵan.
- Qaıtys bolarynyń aldynda bárimizge jeke-jeke hat qaldyrypty. Mynany, - ol hatty nusqady, - ákem maǵan bergen. Sizge jazypty.
Qaǵazdy aýdarystyryp qaradym. Qıyq buryshyna «Alanym» dep oıýlap jazypty. Aqyryn ǵana ashtym. Súırikteı tizilgen qıǵash qara áripter.
«Alan...
Siz meniń kóleńkeli ómirime nurly kúndeı shýaǵyńyzdy jańadan shasha bastaǵanedińiz. Salqar sezimdi lekite jutqan júregim bir jamandyq bolaryn sezgendeı únemiqobaljý ústinde júretin. Men ony sizdiń ómirime engizgen jańalyǵyńyzdyń nátıjesibolar dep shatasyppyn. Átteń, taǵdyrym maǵan ashyq aspandy jazbapty. Qaıǵynyńbulty qashan da seıilgen emes. Tek, sońǵy kezderdegi sizben kezdesýim ǵana janymajylýlyq sılaǵan. Onyń ózin kóp kórgen sııaqty.
Meni nápsiqumar nemeler kúshtep kóterip áketip bara jatqanda artymnan júgiripkele jatqan sizdi kórip qalǵam. Sony kóńilime medet tuttym. Mine, mine, kelip qalardegen úmitimniń ishegi úzilip, dún-dúnıe dóńgelenip sala bergende meni dúleı kúshtensizdiń de qutqara almaǵandyǵyńyzdy sezdim. Biraq, sizdi kinálaýdan aýlaqpyn.
Bári ótti ǵoı... Bolashaq jaryńnyń tósegine taza bara almaǵasyn turmys qurýdyń nekeregi bar? Meni sońǵy kezderi osy oı kóp mazalady. Qabyǵyn jarmaǵan palaqjumyrtqadaı pástenip ómir súrgennen, eldiń azapty sózinen qutylǵandy jón deptaptym. Ózekti janǵa bir ólim ǵoı, Alan. Ata-anam, týǵandarym qaıǵyryp jylar. Biraq ta, ýaqyt óte kele meniń bul jalǵanda ómir súrgenimdi, bar bolǵanymdy báriumytady. Túptiń-túbi umyt bolýǵa jaralǵasyn, búginiń ne, erteńin ne, báribir emespe.
Taýyqqa jumyrtqa týý úlken dáretin sańǵyǵandaı jeńil bolsa adamdarǵa da qylmysjasaý sonshalyqty ońaı eken.
Alan, sizge kóp nárse aıtqym keledi, biraq ýaqyt tapshy. Men sizdi jaqsy kórem, kóre de berem.! Osy sózdi janyńyzda júrgende talaı márte aıtýǵa oqtalǵam. Biraq, aıta almadym. Nege ekenin ózim de bilmeımin. Múmkin... janym...»
Aldymda turǵan ústeldi judyryǵymmen salyp qalǵanda Názıra selk ete túsken. Bos qalǵan kese men tárelke, qasyqtar syldyrlap sala berdi. Qulaǵyma álsiz ǵana shýyl estildi. Qumnyń sýsyly sııaqty.
Buqar jyraý kóshesindegi qalyń aǵash ishimen júgirip kelem. Beıne aldymda Jazıra kútip turǵandaı. Onyń ústine jataqhanadan bir sátke bezip ketkim kelgen. Taýdy ańsadym. Aıqaılap jylaǵym keldi. Eki ókpem qolymda.
Kenet jerge jalp ete tústim. Neden, nege shalynǵanymdy uqpadym. Ońbaı qulaǵanym sonshalyq, murynymnan jyp-jyly qan sorǵalady. Qasqa tisimniń túbi syzdap, mıdaǵy qan tamyrlarymdy bireý qolmen kúshtep tartyp, julyp jatqandaı. Shetki oryndyqta otyrǵan bir top qyz-jigitter áı, kúlsin kelip. Qaryq boldy. Orysshalap meni mazaqtaǵan. «Apańnan adasyp qaldyń ba, balaqaı?» dep syrany syzdyqtata iship otyrǵan jıren shashtysy keketti. Jaryq tóbesine molynan túsip tur eken. «Joq, álde, shákirtaqy alyp, «starshaktaryńnan» qashyp júrgen stýdentsiń be?». Temekisi tolyq tartylyp bitpese de janynda turǵan qoqys jáshigine salýǵa erinip, aıaǵynyń astyna tastaı salǵan jalpaq bet, uzyn shashty semizi de selkildeı kúldi.
Yzaǵa býlyǵyp orynymnan kóterildim de jandaryna jaqyndap bardym. Beımaral. Menen eshqandaı qaýip kútip turǵan joq. Ózderin Almatynyń qojasyndaı sezinedi. Boıymdy bılegen ashýdan sóıleı almaımyn. Jazıranyń ólimine osylar kináli sııaqty. Taıap keldim de jıren shashtynyń qolyndaǵy syra bótelkesin julqı tarttym. Ol oryndyqtyń arqalyǵyna tizesin búge qonaqtap otyrǵandyqtan óz denesin ustaı almaı, ekpinimen shalqalaı qulap tústi. Aınala berip semiz saryny qulaq shekeden syra bótelkesimen perdim. Shısha jerge shashylyp túsken. Syńǵyrlap sala berdi. Semiz eki qadam attady da tizesimen shóge qulady. Qyzdary shyńǵyryp jibergen.
...Eki kún Bostandyq aýdanynyń ishki ister bólimindegi ızolıatorda «qudaıy qonaq» bolyp jatyp shyqqan soń men jataqhanamen birjolata qoshtasyp kettim. Almatynyń shetinde turatyn alystaý týys bolyp keletin aǵamnyń úıine kóshtim de, jattyǵýyma alańsyz kiristim. Sodan qaıtyp Názırany da kórmedim.
III raýnd
- Alan, Alan, saǵan ne boldy. Esińdi jı!
Jattyqtyrýshymnyń qorǵasyndaı aýyr alaqany oıymdy bólip jiberdi.
- Alan, sońǵy raýnd. Kýbalyq ádisti paıdalan, óıtkeni ol áli tyń. Bizge upaı kerek. Qýalama, qashqaqtaı júrip ur!
Jattyqtyrýshym tynbaı sóılep jatyr. Kózine qaradym.
- Saǵan ne boldy? Tereń tynys alshy.
- Rıng degen ómir eken ǵoı, ıá, aǵa?
Jattyqtyrýshym tańyrqap qaldy. Kózinen baıqadym.
- Kózdiń bolǵany qandaı jaqsy, aǵa, bárin kórýge, aıtqysy kelgenin birden uǵýǵa bolady.
- Alan, men seni túsinbeı turmyn.
- Aǵa, men onyń kózinen máńgilik qorqynysh pen senimsizdikti kórdim. Onyń sporttaǵy joly osy raýndpen támam. Jáne...
- Sen meni tyńdashy, Alan. Artyq eshteńe jasama. Bizdiń múmkindigimiz 90 paıyz. Alda Olımpıada kútip tur. Ótinem, tek sheńberden shyqpashy.
- Jáne... meniki de... Keshir Jázók...
Tóreshi ruqsatynan keıin qarsylasym birden shabýylǵa kóshti. Ońdy-soldy jumsaǵan soqqysynan qorǵana sheginshektep, arqanǵa tireldim. Ekpindep kelip, tosylyp qalǵan sátinde joıqyn kúshke ıe sol judyryǵymdy ıeginiń astyna baǵyttadym. Baǵyttadym da Mahmýdtyń osy soqqydan keıin tura almaıtynyn paıymdadym. Bul kezde shyqshyt tusyma tıgen qarsylasymnyń alapat kúshti oń judyryǵy meniń de segiz sekýndtyń ishinde esimdi jınaı almaıtynyma onyń senimin nyqtaı túsken edi.
«Rıng - ómir. Ómir eshkimdi aıaǵan emes».
Sońǵy paıymym sanama sińdi de qarańǵylyq qoınaýyna tarta jóneldi...
"Adyrna" ulttyq portaly
