Búgin «AMANAT» partııasynyń Tóraǵasy Erlan Qoshanov Atyraý oblysynyń jurtshylyǵymen kezdesti. Onda óńirlik fılıal janyndaǵy keńes berý ortalyǵynyń qyzmetimen tanysyp, «Quqyqtyq kómek» partııalyq jobasynyń iske qosylǵanyn jetkizdi.
Erlan Qoshanov partııanyń Atyraý oblystyq fılıaly janynan ashylǵan «AMANAT SERVICE» keńes berý ortalyǵynyń qyzmetimen tanysty. Munda bir tereze qaǵıdaty boıynsha memlekettik organdardyń, «Otbasy bankiniń», «E-gov»-tyń ókilderi azamattardyń ótinishterin qabyldaıdy. Sondaı-aq, sáýlet, eńbek, turǵyn úı qatynastary salasy jáne halyqty tolǵandyratyn ózge de máseleler boıynsha zańnamany túsindiredi.
Partııa Tóraǵasy Isataı aýdanynda belgili quqyq qorǵaýshy Abzal Quspanmen birge jergilikti turǵyndarmen kezdesip, azamattardy qabyldady.
Erlan Qoshanov óz sózinde Memleket basshysy Ádiletti Qazaqstandy qurý jolynda adam quqyqtary máselesine basa mán berip otyrǵanyn atap ótti. Máselen, Konstıtýııalyq Sot qurylyp, Bas prokýratýra men Adam quqyqtary jónindegi ýákil konstıtýııalyq mártebege ıe boldy. Halyq arasynda quqyqtyq máseleler óte ózekti. Soǵan baılanysty, óńirde turǵyndardyń quqyǵyn qorǵaıtyn «Quqyqtyq kómek» jańa partııalyq jobasy pılottyq rejımde iske qosyldy.
«Jasyratyny joq, bizdiń qoǵamda azamattardyń quqyqtyq, qarjylyq saýattylyǵy áli de tómen. Sonyń saldarynan, olar sotta nemese basqa da memlekettik organdarda óz múddelerin qorǵaı almaı jatady. Shalǵaıdaǵy aýyl turǵyndarynyń bári birdeı mundaı kásibı kómekke qol jetkize almaı otyrǵandyqtan, jańa partııalyq joba aıasynda zańgerler aýyl-aýyldy aralap, halyqqa arnaıy quqyqtyq kómek kórsetedi. Ádildik pen zańnyń ústemdik qurýy osyndaı naqty isterden bastalady», – dedi partııa Tóraǵasy.
«Quqyqtyq kómek» partııalyq jobasy sheńberinde zańgerler jergilikti jerde azamattarǵa zańgerlik kómek kórsetý úshin oblystaǵy aýdan ortalyqtaryna barady. Iaǵnı, sotta, qylmysty qýdalaý organdarynda jáne taǵy basqa jaǵdaıda azamattarǵa ókilettik etýge, aryz-talap toltyrýǵa, ózin qorǵaýǵa kómek kórsetiledi. Turǵyndarǵa qarjy jáne quqyqtyq máseleler boıynsha túrli keńes beriledi.
Osy kúni Erlan Qoshanov «Aqtóbe-Atyraý-Astrahan» baǵytynda salynyp jatqan respýblıkalyq mańyzy bar jol ýchaskesine bardy.
Merdiger uıymnyń ókilderi oǵan qurylys jumysynyń barysy týraly baıandady. Joba jyl sońyna deıin aıaqtalady dep josparlanyp otyr.
Sondaı-aq, Erlan Qoshanov «AMANAT»-tyń oblystyq aktıvimen kezdesip, partııalyq jobalardyń iske asyrylý barysyn jáne aldaǵy Májilis pen máslıhattar depýtattarynyń saılaýyna daıyndyq máselesin talqylady. Búginde oblysta 106 bastaýysh partııa uıymy biriktirip otyrǵan 23 myńnan astam amanattyqtar bar.
