Dalanyń tákappary qumnan týǵan,
Asqaqtap kórinedi alys qyrdan.
Jalǵyz taý – jazyqtaǵy saqshydaı bir,
Qyryna qaraýyldap qarap turǵan.
Ulytaý, tańdanamyn saǵan qarap:
Aınalań – qumdy dala, adyrly alap.
Myń-myń san, myj-myj bolǵan tóbelerge
Kim qoıǵan qorǵan etip seni qalap?
Qaraımyn seniń jasyl munaryńa,
Ulylyq bar ma seniń shyńdaryńda?
Bir taýsyń atyń – uly, tulǵań – kishi,
Sulý ma álde tasyń syr alýǵa?
Túksiz tas órtelgendeı jap-jalańash,
Sulý ma qur melshıgen qý qara tas?
Bolmasa qumynda gúl, sýynda nur,
Taýlardyń ıemiz be dańqyna bas?
Qalaısha uly dańq saǵan aýdy,
Qarasam kelbetińe atyń daýly.
Uly dep ataǵan ba álde bireý
Kórmegen Kókshetaý men Alataýdy?
Murasy etkenińniń jalǵyz ǵana –
Tas tóbe, shyń basynda qalǵan mola.
Álde syr, álde altyn saqtady ma,
Bilmeımin, tóńiregiń tolǵan oba.
Bilýge sol bir syryn uly atyńnyń –
Alystan ańsap, qumar bolatynmyn.
Alaıda aqtarmaımyn oba syryn,
Emespin arheolog, men – aqynmyn.
Qý mola qulazyp bir qumda qalǵan,
Artqyǵa saqtady eken qandaı arman?
Nemene, qýrap qalǵan basty jınap,
Kórneki jer qazýǵa qumarlanǵan?
Qaı Joshy qaldy eken dep qaı beleste,
Solardy júremiz be saqtap eske?
Oba bop ólip qalǵan ótkeni emes,
Taý-daǵy tirligimen uly emes pe?
Ne syr bar qum jamylǵan tóbelerde?
Gaýhar ma túbindegi álde kór me?
Súńgisin shyńnan yrǵyp shyńyraýǵa,
Taýym, sen ash qoınyńdy ınjenerge!
Men-daǵy ınjenermin, biraq jannyń,
Dosymyn, syrlasymyn tiri adamnyń.
Mola emes, oba da emes, taý túrlentken
Jurttyń men júreginen syr alamyn.
Qalıjan BEKHOJIN,
Halyq jazýshysy, Qazaq KSR Memlekettik syılyǵynyń laýreaty 1913
Baba taýym – Baq taýym. Óleńder.
Qurast.: T. Búkirov, Q. Qurmanseıit.
