Prezident AQŞ-qa sapary barysynda tanymal analitik, käsıbi ekonomist, professor Rikardo Hauzmanmen kezdestı. Ǧalym bırneşe jyl Garvardtaǧy "Halyqaralyq damu ortalyǧyna" basşylyq etken, dep jazady "Adyrna" ūlttyq portaly.
Garvard professorymen kezdesude qazırgı zamannyŋ özektı problemalary, älemdık damu modelderı men ekonomika ürdısterıne qatysty äŋgıme örbıgen. Qūndylyǧy mol ekı jaqty kezdesuge saiasatker, ekonomist Şyŋǧys Mūqan:
- Memleket basşysy Niu-Iorkte bırqatar kezdesu ötkızıptı. Solardyŋ ışınde professorym Rikardo Hauzmanndy körıp quanyp qaldym. Onyŋ kürdelılık teoriiasy negızınde “Qazaqstan damyǧan elder qataryna qosylu üşın ne ıstemek kerek” degen taqyrypta tezis qorǧaǧam. Öte özektı taqyryp. Damyǧymyz kelse, jalǧyz ǧana jol bar, ol - kürdelılık teoriiasy baǧyttaityn jol. Örkendegen kez kelgen el damudyŋ qūpiiasyn aşqan professor Hauzmannyŋ nūsqap otyrǧan jolymen jürıp ötken. Ekı auyz sözben jetkızer bolsam: Ekonomikamyz ornyqty damu üşın bız kürdelı tauarlardy şyǧaruymyz kerek. Al kürdelı tauar şyǧaru üşın qazaqtardyŋ basynda kürdelı nou-hau (Ybyraişa aitsaq, öner) bolu kerek. Ol önerdı qalai qondyramyz, öz aldyna bölek äŋgıme, - dep baǧa beredı.
Rikardo Hauzman ekonomikalyq ösım diagnostikasy, naryq zaŋdylyqtary, önım öndıru erejesı syndy taqyryptarǧa türen salyp jürgen ǧalym. Onyŋ keŋesıne köptegen memlekettıŋ liderlerı, alpauyt kompaniialar men prezidentter ūdaiy jügınıp otyrady.
- Osy tūrǧydan alsaq, Prezidenttıŋ tehnikalyq mamandyqtarǧa den qoiyp otyrǧany sol Hauzmannyŋ keŋesı bolsa kerek dep topşylap otyrmyn.... Li Kuan Iý de öz kıtabynda ǧalymdarmen köp aqyldasqanyn jazady. Professorlardan aqyl sūrau üşın Amerikada bırneşe ai jüredı. Qasym-Jomart Kemelūlynyŋ ǧalymdarmen kezdesıp jürgenın jaqsylyqqa balaimyn, - dep jazdy Şyŋǧys Mūqan.
