Memleket basşysy Qasym-Jomart Toqaev Qūryltai sailauynan keiın Ükımettıŋ otstavkaǧa ketetının jäne qūramynda bırqatar özgerıs bolatynyn aitty. Būl turaly Aqorda jazdy, dep habarlaidy “Adyrna”.
Prezident mūndai kadrlyq şeşımderdıŋ maqsaty – bıreudı qyzmetten bosatu emes, Ükımet jūmysyna tyŋ serpın beru ekenın aitty.
"Zaŋǧa säikes, Qūryltai sailauynan soŋ Ükımet jūmysyn toqtatuǧa tiıs. Soǧan sai Ministrler kabinetı jasaqtalady. Jaŋa Ükımettıŋ baǧyt-baǧdary men mındetterı jönınde ne aitasyz?" – dep sūraq qoidy jurnalist Täuelsızdık saraiynda ötken brifingte.
Öz jauabynda Prezident Ükımettıŋ barynşa tabandy, jedel jūmys atqaryp, Memleket basşysy qoiǧan mındetterdı oryndap otyrǧanyn aitty.
"Dünie jüzındegı bäsekelestık küşeiıp keledı. Naryqtyŋ syn-qaterlerıne mūqiiat nazar audaryp, eŋ bastysy, tiıstı deŋgeide tötep beruımız kerek. Älbette, Ükımet otstavkaǧa ketedı. Ükımet qūramynda bırqatar özgerıs bolady. Aşyǧyn aitqanda, däl bügın Ükımet jūmysyna alaŋdauǧa nemese oǧan syn aituǧa qandai da bır negız joq. Ministrler de, Ükımet jetekşısı de qoldan kelgenşe mındetterın atqaryp jatyr. Bıraq kadrlyq özgerıster ärdaiym bolady. Öitkenı būl Ükımettıŋ jūmysyna qan jügırtedı", – dedı Memleket basşysy.
Onyŋ aituynşa, mäsele bıreudı ornynan bosatuda emes.
"Men jai syltaumen jūmystan şyǧaruǧa qaşanda qarsymyn. Äsırese, qazırgı tılmen aitqanda, mediadaǧy kontent nemese mazmūn üşın auys-tüiıs jasaudyŋ qajetı joq. Kadrlyq şeşım şyn mänınde jūmysqa tyŋ serpın beruı kerek. Bärımız aityp jürgen jaŋǧyru üderısı üzdıksız jürgızıluge tiıs. Öitkenı būl kürdelı prosestı alǧa jetelep otyru qajet. Būl ıste Ükımet maŋyzdy röl atqarady", – dedı Qasym-Jomart Toqaev.
Aita keteiık, bügın elımızdıŋ barlyq öŋırınde Qūryltai deputattaryn sailau bastaldy. Dauys beru 10 423 sailau uchaskesınde ötedı.
