Qyrǧyzstandaǧy jaǧdaidy tūraqsyzdandyruǧa baǧyttalǧan kez kelgen äreket sätsız aiaqtalady. Būl turaly el prezidentı Sadyr Japarov aitty, dep habarlaidy «Adyrna» tılşısı.
Ol būrynǧy jemqorlyq shemalary joiylǧannan keiın tabys közınen aiyrylǧan keibır toptyŋ blogerler men arandatuşylar arqyly jalǧan aqparat taratyp, qoǧamda narazylyq tudyruǧa tyrysyp jatqanyn mälımdedı.
«Olardyŋ arasynda ırı sybailas jemqorlyq ısterı boiynşa ūstalyp, sot şeşımımen memleket paidasyna ırı somalar men nysandardy ötkızgen tūlǧalar bar. Sondai-aq köleŋkelı tabys közderın joǧaltqandar jäne qyzmetımen ketken soŋ jeke paidasy üşın öşpendılık tanytyp jürgender de jeterlık. Iаǧni, būlar — jeke müddesı üşın renjıgen adamdar»,- dedı Sadyr Japarov.
Memleket basşysy būrynǧy älsız memlekettıŋ endı joq ekenın atap öttı.
«Bırınşıden, bız eşqandai töŋkerıske jol bermeimız. Ekınşıden, būrynǧy älsız memleket qazır joq, qazır elımız myqty. Üşınşıden, halyq kımge senu kerektıgın, kımnıŋ bilık basynda boluy tiıs ekenın jaqsy bıledı. Endı töŋkerısterdı tek tüsıŋızde ǧana köresızder. Tonau, aşközdık pen töŋkerıs arqyly baiyp ketu — mūnyŋ bärı endı tek tüs bolyp qalsyn»,- dedı prezident.
Japarov halyqqa jasaǧan ündeuınde jürgızuşı kuälıgın aqşa berıp satyp alu mümkın bolmaitynyn da jetkızdı.
«Būdan bylai jemqorlyqqa jol berılmeidı. Aqşa berıp kuälık aluǧa bolatyn kezeŋ ūmytylsyn. Endı jürgızuşı kuälıkterı tek bılım, eŋbek jäne adaldyqtyŋ arqasynda ǧana berıledı. Ärkım mūny öz bılımımen jäne tynymsyz eŋbegımen aluy tiıs»,- dedı prezident.
