Şyǧys Qazaqstannyŋ qasiettı jerınde, körıktı Ūlan audanynyŋ tabiǧatymen üilesken alaŋynda V halyqaralyq «Şyǧys Salburyny-2025» festivalı aiaqtaldy. Būl şara jyl saiyn dästürlı qazaqtyŋ aŋşylyq önerın därıptep qana qoimai, halyqaralyq deŋgeide mädeni bailanys pen dostyqty nyǧaituǧa qyzmet etedı.
«Şyǧys Salburyny» halyqaralyq festivalınıŋ basty maqsaty – qazaqtyŋ dästürlı bürkıtşılık jäne sokolşylyq önerın saqtau, damytu jäne nasihattau bolyp tabylady. Būl şara arqyly ūlttyq mädeni mūrany jaŋǧyrtu jäne jastar arasynda därıpteu közdelgen. Festival Qazaqstannyŋ ärtürlı öŋırlerınen jäne şetelden qatysuşylardy bırıktırıp, ūlttyq bırlıktı nyǧaituǧa yqpal etedı. Sonymen qatar, halyqaralyq qatysuşylardyŋ keluı mädeni almasudy damytyp, Qazaqstannyŋ mädenietın älemge tanytuǧa mümkındık beredı. Şaranyŋ ötkızıluı turistık qyzyǧuşylyqty arttyryp, öŋırdıŋ ekonomikalyq äleuetıne oŋ äserın tigızedı. Festival jastardy tärbieleuge jäne olardyŋ ūlttyq sana-sezımın qalyptastyruǧa baǧyttalǧan. Osylaişa, «Şyǧys Salburyny» qazaq mädenietın saqtau, damytu jäne halyqaralyq arenada körsetu maqsatynda maŋyzdy röl atqarady.
Festivaldıŋ jabylu räsımıne Şyǧys Qazaqstan oblysynyŋ äkımı Nūrymbet Saqtaǧanov, Qazaqstan Respublikasy turizm jäne sport ministrı Erbol Myrzabosynov qatysty. Sonymen qatar, «Qūsbegılık» respublikalyq federasiiasynyŋ vise-prezidentterı Baǧdat Müptekeqyzy men Janjıgıt Omarhan jeŋımpazdardy marapattady.
Şyǧys Qazaqstan oblysynyŋ äkımı Nūrymbet Saqtaǧanov atap ötkendei:
«Būl oqiǧa tek öŋır üşın ǧana emes, bükıl elımız üşın maŋyzdy. Üş kün boiy «Bürkıt töbe» alaŋy sporttyq saiystardyŋ, dostyq pen bırlıktıŋ ainasyna ainaldy. Düniejüzınde moiyndalǧan sokolmen aŋşylyq önerı Qazaqstannyŋ ūlttyq brendınıŋ bıregei körınısıne ainalyp otyr».
«Qūsbegılık» federasiiasynyŋ vise-prezidentı Janjıgıt Omarhan besınşı jyl qatarynan ūiymdastyrylyp kele jatqan aituly şaraǧa arnaiy kelıp qatysyp, Qazaqstannyŋ Respublikalyq Qūsbegılık federasiiasynyŋ prezidentı, Abai oblysynyŋ äkımı Berık Uäliūlynyŋ qūttyqtau hatyn räsımdep tabystady. Festivalge 10 myŋnan astam körermen qatysty, al 100-den asa bürkıtşı Qytai, Resei, İspaniia, Vengriia, Moŋǧoliia, Qyrǧyzstan jäne Qazaqstannyŋ är öŋırınen kelgen qatysuşylardyŋ arasynan öz şeberlıkterın körsettı. «Bürkıt töbe» etnoaumaǧynda 40 qazaq üiı (jūrt) tıgılıp, keluşıler üşın şeberlık sabaqtary, qolöner körmelerı ūiymdastyryldy. Sonymen qatar, dästürlı qazaq salt-dästürlerı körsetıldı: betaşar, tūsaukeser, besıkke salu siiaqty räsımder erekşe körınıs tapty. Festivaldıŋ konserttık baǧdarlamasynda Kenjebek Janäbılov, Dosymjan Taŋatarov, «Alatau serılerı» toby jäne basqa da tanymal önerpazdar öner körsettı.
Festivaldıŋ basty bölımı – sokolmen aŋşylyq jarystary boldy. Būl jarystarda qatysuşylardyŋ şeberlıgı men batyldyǧy joǧary baǧalandy. Saiystyŋ nätijesı boiynşa jeŋımpazdar mynandai bölınıster boiynşa anyqtaldy: bırınşı oryndy Aqmola oblysynan kelgen Erlan Kenjetaev sokolmen aŋşylyq boiynşa ielense, Almaty oblysynyŋ ökılı Ömırhan Baetbai «Bürkıt» jäne «Qarşyǧa» kategoriialary boiynşa bırınşı orynǧa şyqty. Ekınşı oryn Jambyl oblysynan qatysqan Berıkbolsyn Babajanǧa būiyrsa, üşınşı oryn Jetısu oblysynyŋ Salimhan Erǧazyūly men Moŋǧoliiadan kelgen Kenjebek Baidoldaūly Kenjebekke berıldı. Barlyq jeŋımpazdar qarjylai syilyqtarmen marapattaldy. 
«Şyǧys Salburyny-2025» festivalı ūrpaqtan ūrpaqqa jalǧasyp kele jatqan dästürlerdı saqtaudyŋ, halyqtar arasyndaǧy dostyqty nyǧaitudyŋ jäne Ūly Dalanyŋ bai mädeni mūrasyn därıpteudıŋ airyqşa simvolyna ainaldy. Būl halyqaralyq mädeni şara qazaqtyŋ ruhani mūrasyna degen qūrmettıŋ jäne ūlttyq brend retınde sokolmen aŋşylyq önerınıŋ älemdık arenada tanyluynyŋ körınısı bolyp otyr.
