Qazaqstannyń juptyq syndaǵy birinshi raketkasy Anna Danılına Varshava WTA-250 týrnıriniń jeńimpazy atandy. Bul týraly QTF baspasóz qyzmeti málimdedi.
Anna Danılına germanııalyq Anna-Lena Frıdzammen birge fınalda jarystyń 2-raketkalary, kort ıeleri Katajına Kava - Alısııa Rosolskamen óner kórsetti.
Birinshi partııa barysynda K.Kava men A.Rosolska 3:1 esebimen alǵa shyqqanymen, qazaqstandyq-germanııalyq jup tarazy basyn aýdara bildi - 6:4.
Ekinshi sette esep 4:5 bolǵan kezde de Danılına men Frıdzam breık jasaı aldy - 5:5.
Biraq qarsylastary qaıyra breık jasap, setti óz esepterine jiberdi - 7:5.
Sýper taı-breıkte qazaqstandyq-germanııalyq jup 8:0 esebimen alǵa ketti. Budan keıin K.Kava men A.Rosolska esepti qysqartty, biraq Danılına men Frıdzam múmkindigin jibermedi - 10:5.
Eki saǵatqa sozylǵan tartysty matchta qazaqstandyq-germanııalyq dýet 12 breık-poınttyń beseýin paıdalana bildi. Polshalyq jup ta 5 breıkpen (7 breık-poınt) kózge tústi.
“Adyrna” ulttyq portaly
