"Kóke-jákeni" aıtqannan paıda joq, sebebi munda ondaı júıe jasalmaǵan

2820
Adyrna.kz Telegram
"Dalada túnegen kezim bolǵan". Amerıkaǵa arman qýyp barǵan qazaq jigiti ómiri jaıynda Nurlan Sádibekov. Almatylyq Nurlan Sádibekov Abylaı han atyndaǵy Qazaq halyqaralyq qatynastar jáne álem tilderi ýnıversıtetinen "sınhron aýdarmashy" mamandyǵyn alyp shyqqan. Ol qazirgi tańda Amerıkadaǵy Kolorado shtatynyń astanasy Denver qalasynda turady jáne sol jerde jumys isteıdi. "Shyny kerek, dúnıejúziniń tórt buryshynan Amerıkaǵa kelip jatqan ár adamda óziniń maqsat-armandary, alyp ambıııalary, qulshynystary bar. Amerıkany tym bolmasa bir ret kórý meniń de bala kezden armanym boldy. Tek ekrannan ǵana kóretin álemdegi eń tanymal akterler, ánshiler, dúnıejúziniń eń ataqty, dáýletti adamdary shyqqan, júzdegen ulttyń mádenıetin toptastyrǵan elde bolyp, tanysýdy armandaıtynmyn. Ýnıversıtette oqyp júrgende Amerıkaǵa kelgen dostarymnan Work and Travel baǵdarlamasy jaıly estidim, sóıtip úsh aı jazda bul elge kelý múmkindigi týdy", - dedi ol. Nurlannyń aıtýynsha, Amerıkadaǵy alǵashqy kúnderde qıyndyqsyz bolmaǵan, biraq ýaqyt óte kele armandary júzege asa bastapty. "Eń alǵash kezder áli esimde. Dosym ekeýmiz Breckinridge qalashyǵyna keldik. Túngi saǵat ekiler shamasy. Taý eteginde ornalasqan eken, kún salqyn. Jumys ornymyz jabyq bolǵandyqtan, tańǵa deıin júre turaıyq dep sheshtik. Kóshedegi amerıkalyqtardyń qonaqjaılyǵyna tańǵaldyq, olar tipti 1-2 kún úılerine turýǵa ruqsat berdi. Jumys máselesi durys sheshilmeı, Denver qalasyna attandyq, qaltamyzdaǵy aqsha sanaýly, keı kúnderi kóshege de qondyq, kúndelikti tamaǵymyz bir nan men 3,5 lıtr sút bolatyn", - dep eske aldy ol. Nurlannyń aıtýynsha, sol kezderde oǵan Amerıkadaǵy qazaqtar jolyǵyp, kómek qolyn sozǵan. Birtindep jumysqa ornalasqan ol jat jerdiń kúndelikti ómirine tez úırenip alypty. "Merzim aıaqtalyp, Qazaqstanǵa oralǵannan keıin oqýdy támamdap, Amerıkaǵa qaıta kelip, jumys istep, is bastaýdy josparladym. Sebebi bul jerdegi múmkindikterdi, halyq úshin jasalǵan jaǵdaılardy jáne istegen jumysyńdy qalaı baǵalaıtynyn kórip, qaıta oralǵym keldi. Al til jaǵy óz mamandyǵym bolǵandyqtan qıyndyq týǵyzǵan joq", - dedi ol.
Nurlan qazirgi tańda Amerıkadaǵy eń iri kompanııalardyń birinde kabeldik ornatý salasynyń mamany bolyp jumys isteıdi. Aıtýynsha, qazir oǵan ózge shtattardan jumys usynyp, kompanııalaryna shaqyratyndar da bar. "Bul jaqta jumysty tııanaqty isteýden bólek, qyzmet kórsetý dárejesi baǵalanady. Qyzmet túrin kórsetkennen keıin kompanııa ókilderi klıentke habarlasyp, seniń qyzmet kórsetýińe baǵa suraıdy. Sol sebepti árkim óz jumysyna adal ári tııanaqty. Al eńbekaqysy orta eseppen alǵanda aıyna 3 myń dollar. Qosymsha taksı júrgizetinder bolady, olar aıyna qosymsha, shamamen 1,5 myń dollar tabys tabady. Buǵan deıin úı kóshirisý salasynda aýyr jumys istedim, ol kezde aptasyna 1 myń dollar tabys tabatynmyn. Qazirgi jumysym ózime qatty unaıdy, tabysym da oıdaǵydaı", - dedi ol. Nurlannyń aıtýynsha, ol bolashaqta elge oralady jáne oǵan qatysty josparlary da bar. "Bolashaqqa degen josparym óte kóp, óz isimdi ashyp, keıin Qazaqstannyń damýyna óz úlesimdi qosqym keledi. Amerıkada tájirıbemdi shyńdap, bilimimdi arttyryp, erteń elge barǵanda bir paıdamdy tıgizsem deımin. Ol úshin tabandylyq, eńbekqorlyq jáne sanańdy durys paıdalansań jeterlik, kez kelgen bıznesti dóńgeletip áketýge bolady. AQSh-ta kásipkerdi qyspaqqa almaıdy, teksermeıdi, tek qujatyń túgel, salyǵyń tóleýli bolsa boldy. "Kóke-jákeni" aıtqannan paıda joq, sebebi munda ondaı júıe jasalmaǵan", - dedi ol.
Tengrinews.kz
Pikirler