Ishki ister mınıstrligi Aqjarqyn Turlybaıdyń isi boıynsha kúdikke ilingen Nıgerııa azamatynyń ustalǵanyn rastady, dep habarlaıdy «Adyrna» tilshisi.
«20 maýsymda Interpoldyń ortalyq ulttyq bıýrosynyń suraýyna sáıkes, Qazaqstannyń Qylmystyq kodeksiniń 297-baby, 2-bóligi ("Iri mólsherde esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý") boıynsha halyqaralyq izdeýde júrgen Adındo Nonso Fortýne Nıgerııada ustaldy. Qazirgi kezde ony qamaýǵa alý jáne Qazaqstanǵa ekstradıııalaý boıynsha Interpolǵa qajetti materıaldar jiberildi",– dep túsindirdi vedomstvo.
