QR Bas prokýratýrasy qyz alyp qashqan jaǵdaıda qandaı jaza qarastyrylǵanyn aıtty, dep habarlaıdy «Adyrna» ulttyq portaly.
«Qyz alyp qashý – salt-dástúr me, qylmys pa, muny ajyratýdyń bir joly bar, ol – qalyńdyqtyń kelisim berýi jáne alyp qashqan adamdardyń osyndaı kelisimniń baryn túsinýi. Basqasha aıtqanda, kelisim bermegen qyzdy erkinen tys alyp qashsa, kúshtep ustap, basqa jerge aparsa, alyp qashqandar osy mán-jaıdy bilse – bul aýyr qylmys sanalady. Qylmystyq kodekstiń 125-baby – adam urlaý boıynsha 4 jyldan 7 jylǵa deıin bas bostandyǵynan aıyrý jazasy qarastyrylǵan. Al eger kámeletke tolmaǵan qyzdy urlasa, bul jaǵdaıda 7 jyldan 12 jylǵa deıin sottalýy múmkin jáne múlki tárkilenedi»- dedi Bas prokýratýra.
Vedomstvonyń habarlaýynsha, bul qylmys úshin eń qatal jaza – 15 jylǵa sottalady. Onyń ishinde top bolyp alyp qashsa, jábirlenýshini abaısyzda óltirip alý jáne basqa aýyr jaǵdaılarǵa ákep soqsa, urlanǵan adamdy qanaý maqsatynda jasalsa, osyndaı aýyr jaza qoldanylýy múmkin.
«Eger sizdi alyp qashsa nemese kóz aldyńyzda osyndaı jaǵdaı bolsa, dereý 102 qyzmetine qońyraý shalyńyz. Polıııaǵa múmkindiginshe kóliktiń markasy, túsi, nómiri, alyp qashqandardyń túr-álpeti, kıimi sekildi erekshe belgilerdi habarlańyz. Bul jaǵdaıda jaı ǵana kýáger bolsańyz da, aryz jazylmasa da qylmystyq is qozǵalyp, tergeý bastalady. Eger urlaǵan adam jábirlenýshini bosatsa jáne onyń áreketinde qylmystyq quram bolmasa, ol qylmystyq jaýapkershilikten bosatylady» -delingen habarlamada.
Qazirgi tańda elimizdiń ońtústiginde qyzdy alyp qashý derekteri áli de kóp. Tipti, zorlyqpen ustaý deregi de kezdesedi.
«Adyrna» ulttyq portaly.
