Memleket basshysy Qasym-Jomart Toqaev Ortalyq Azııaǵa sapary aıasynda Qazaqstanǵa kelgen BUU Bas hatshysynyń birinshi orynbasary Amına Muhammedti qabyldady, dep habarlaıdy "Adyrna" ulttyq portaly "akorda.kz"-ke silteme jasap.
Kezdesý barysynda Qazaqstan men BUU arasyndaǵy yntymaqtastyqtyń basym baǵyttary qarastyryldy. Ornyqty damý maqsattaryna qol jetkizý, klımattyń ózgerýine qarsy kúres, pandemııaǵa qarsy is-qımyl jáne genderlik teńdik pen adam quqyqtaryn qamtamasyz etý jónindegi birlesken kúsh-jigerge erekshe nazar aýdaryldy.
Qasym-Jomart Toqaev Amına Muhammedke iltıpat bildire otyryp, laýazymdy qyzmetke qaıta saılanýymen quttyqtady. Onyń bul sapary elimizdiń tarıhyndaǵy betburys kezeń – jalpyulttyq referendým ótkizýmen tuspa-tus kelgenin atap ótti. Sondaı-aq referendým qorytyndylary Jańa Qazaqstandy qurý isine kirisýge múmkindik beretinin aıtty.
Prezıdent kópjaqtylyq qaǵıdaty men halyqaralyq dıplomatııany qalyptastyryp, damytýda dúnıejúzilik uıymnyń erekshe ról atqaratynyn atap ótti. Qasym-Jomart Toqaev Qazaqstannyń BUU-men aradaǵy yntymaqtastyqty odan ári jan-jaqty nyǵaıtýǵa beıildi ekenine toqtalyp, onyń jahandyq problemalardy sheshý jónindegi kún tártibin tolyq qoldaıtynyn jetkizdi.
Qazaqstan Prezıdenti BUU Bas hatshysy Antonıý Gýterrıshtiń beıbitshilik pen jahandyq qaýipsizdik máseleleri jónindegi jańa kún tártibin ázirleý úshin 2023 jyly joǵary deńgeıdegi «Bolashaqtyń sammıtin» shaqyrý týraly bastamasyn quptady.
Memleket basshysy qazirgi zamannyń kúrdeli syn-qaterleri jaǵdaıynda ornyqty damý salasyndaǵy maqsattarǵa qol jetkizý úshin kezek kúttirmeıtin jáne aýqymdy sharalar qabyldaýdyń mańyzdy ekenin atap ótti.
Sonymen qatar Memleket basshysy azyq-túlik qaýipsizdigin qamtamasyz etý, muqtaj elderge gýmanıtarlyq kómek kórsetý úshin Qazaqstan tarapynan qabyldanyp jatqan sheshimder týraly aıtty.
Qasym-Jomart Toqaev áıelder men qyzdarǵa qatysty zorlyq-zombylyqtyń barlyq túrin joıý jónindegi Ortalyq Azııa men Aýǵanstanǵa arnalǵan SpotLight Initiative óńirlik baǵdarlamasyn júzege asyrý isindegi Amına Muhammedtiń kóshbasshylyǵyn joǵary baǵalady.
Óz kezeginde Amına Muhammed Memleket basshysyna BUU Bas hatshysynyń júrekjardy sálemin jetkizdi. Sondaı-aq Qasym-Jomart Toqaevtyń basshylyǵymen elimizde júzege asyrylyp jatqan aýqymdy reformalardy qoldaıtynyn aıtyp, referendýmnyń sátti ótýimen quttyqtady.
BUU Bas hatshysynyń birinshi orynbasary Qazaqstan men BUU-nyń 30 jyl ishinde ornatqan kópjaqty seriktestiginiń deńgeıine joǵary baǵa berdi.
Sonymen qatar áńgimelesý barysynda Aýǵanstan máselesi qarastyryldy. Amına Muhammed Aýǵanstandy áleýmettik-ekonomıkalyq turǵydan qaıta qalpyna keltirýge baılanysty problemalardy sheshýde halyqaralyq kúsh-jigerdi jandandyrýdyń mańyzdy ekenin aıtty.
"Adyrna" ulttyq portaly
