Grýzııada qaıtys bolǵan Ásel Aıtbaevaǵa qatysty ata-anasy jańa dáıek keltirdi. Qyzynyń óler aldynda azaptalǵan sýretterin Tbılısıdegi quqyq qorǵaýshylar oqıǵa bolǵan kúni túsirgen eken. Biraq ata-anasynyń qolyna tek bir jyldan keıin tıipti, dep habarlaıdy "Adyrna" ulttyq portaly "KTK" arnasyna silteme jasap.
Áseldiń denesindegi kúıik izderin kórgen anasy aıtarǵa sóz tappaı otyr.
"Basynda birde-bir qannyń izi joq. Al denesindegi qyzyl jaralar kúıiktiń izi. Qyzymdy kúıdirgen. Qalaısha? Qazaqstan tarapynyń maǵan qulaq aspaıtynyna tańǵalamyn. Nege olar saraptama daıyndaýǵa asyqpaıdy? Kómekteskisi kelmeıdi. Olar ózin-ózi óltirý deıdi. Qarańyzdar, sýretten anyq kórinip tur. Bireý óltirip, osy jerge laqtyryp ketken sııaqty. Meniń nusqam osyndaı. Qyzym eshqaıdan da qulaǵan joq", - deıdi marqum Á. Aıtbaevanyń anasy Aısulý Aıtbaeva.
Sýretpen muqııat tanysyp shyqqan Áseldiń ata-anasy qyzynyń arqasy, qoly men aıaǵyndaǵy kesilgen izderdi baıqaǵan. Ásirese oń jaǵynda kóp. Grýzııanyń sot-medıınalyq sarapshylary marqumnyń denesindegi jaralar kúlbirep ketken dep anyqtama beripti. Mundaı belgi tek kúıikten keıin paıda bolǵanyn aıtady Aısulý Aıtbaeva.
Onyń boljamynsha, boıjetken kópqabatty úıdiń balkonynan qulamas buryn ólýi múmkin. Sondyqtan qyzdyń áke-sheshesi Qazaqstan men Grýzııa tergeýshileriniń "óldi" degen nusqasymen kelispeıdi.
Otandasymyzdyń qazasyna quqyq qorǵaý organdary Grýzııa azamaty Besık Tordýany kinálady. Oǵan qyzdy zorlady degen de aıyp taǵyldy. Alaıda kúdikti ustalǵannan keıin eki aıdan soń ınfarkten túrmede qaıtys boldy.
Qazir Ásel Aıtbaevanyń ólimine qatysy bar degen kúdikpen jezdesi Murat Meıirbekov qamaýda otyr. Oǵan "adam saýdasy" jáne "zorlaý" baby boıynsha is qozǵalǵan. Sotqa deıingi tergeý-tekserýdiń júrip jatqanyna bir jyldan asty. Búgin aldyn ala sot tyńdalymynyń 7 maýsymda ótetini belgili boldy.
"Adyrna" ulttyq portaly.
