«Qazaqfilm» kinostudiiasynda qazaq kinosynyŋ abyzy, Keŋes Odaǧynyŋ jäne Qazaqstannyŋ halyq ärtısı, Qazaqstannyŋ Eŋbek Erı Asanälı Äşımovtyŋ 85 jasqa toluyna orai saltanatatty şara öttı, dep habarlaidy «Adyrna» tılşısı.
Jaqynda ǧana mereitoiyn atap ötken daryn iesı ūlttyq kinematografiianyŋ altyn qoryna engen Sūltan Qojyqovtyŋ «Qyz Jıbek», Şäken Aimanovtyŋ «Atamannyŋ aqyry», Mäjıt Begalinnıŋ «Tūlpardyŋ ızı», Huat Ahmetovtyŋ «Ka myrza, Sız kımsız?» jäne basqa da köptegen filmderdı jaryqqa şyǧarǧan qazaq kinosynyŋ qara şaŋyraǧy – «Qazaqfilm» kinostudiiasynda özınıŋ mereitoiyn önerdegı ärıptesterı men jaqyndarynyŋ ortasynda atap öttı.
Saltanatty şarany aşqan «Qazaqfilmnıŋ» prezidentı Aqan Sataev Asanälı Äşımovty 85 jasqa toluymen qūttyqtai otyryp, qazaq kinosynyŋ aŋyzy atanǧan akterdıŋ elımızdıŋ mädenietıne qosqan erekşe ülesı turaly aityp, oǧan ūzaq ǧūmyr, zor densaulyq jäne otbasyna baq-bereke tıledı.
Keş soŋynda qazaqtyŋ salt-dästürı boiynşa Asanälı Äşımovke qūrmet körsetılıp, asyl tūqymdy tūlpar tartu etıldı. Sonymen qatar, mereitoi iesıne rejisser retınde tüsırgen jäne özı tüsken kartinalardan qūralǧan filmder jiyntyǧy syiǧa berıldı. Aita ketsek, olardyŋ qatarynda Asanälı Äşımovtyŋ mereitoiyna orai «Qazaqfilm» kinostudiiasy tüsırgen rejisser Tölegen Nūqytovtyŋ «Ömırım-önerım» atty derektı filmı de bar.
Mereitoi iesın qūttyqtauǧa kinostudiia qyzmetkerlerımen qosa önerdegı ärıptesterı men şäkırtterı, atap aitsaq, belgılı rejisser Bolat Qalymbetov, T.Jürgenov atyndaǧy Qazaq Ūlttyq öner akademiiasynyŋ rektory Azamat Satybaldy, Nomad Stunts kaskaderler tobynyŋ jetekşısı Jaidarbek Künǧojinov, Bauyrjan Qaptaǧai, Aidos Bektemırov syndy akterler kelıp, jyly lebızderı men tılekterın bıldırdı.
