Qyzylorda oblysy äkımınıŋ orynbasary Baljan Şamenova Öŋırlık kommunikasiialar qyzmetınıŋ aqparat alaŋynda BAQ ökılderımen baspasöz konferensiiasyn ötkızdı, dep habarlaidy «Adyrna» tılşısı.
«2021 jyldyŋ nauryz aiynan bastap oblys äkımınıŋ orynbasary qyzmetıne taǧaiyndalyp, aimaqtyŋ äleumettık-ekonomikalyq damuyna qyzmet ettım. Äleumettık salaǧa jauapty bolǧandyqtan eŋ äuelı densaulyq saqtau salasynda pandemiiamen betpe-bet keldık. Menıŋ aldymda - adamdardyŋ ömırın saqtau üşın vaksinanyŋ maŋyzdylyǧyn tüsındıru jäne şūǧyl türde ekpe jūmystaryn ūiymdastyru mındetı tūrdy. Şūǧyl şaralardy qabyldaudyŋ nätijesınde Qyzylorda qalasynda 200 tösek orynǧa arnalǧan moduldyq jūqpaly aurular auruhanasy jūmysyn bastady. Negızgı mamandyǧym qarjyger bolǧandyqtan, biudjettı josparlau jäne tiımdı jūmsaluyna erekşe män berdım. Äsırese, auruhanalarǧa qajettı qūral-jabdyq satyp aluǧa köŋıl böldık. Äkım orynbasary retınde negızgı jūmysymnyŋ bırı - eŋbek daularyn şeşu edı. Käsıpodaqpen bırge tiımdı şeşım qabyldau nätijesınde mūnaişylardyŋ eŋbek daularyn retteu maqsatynda jūmysşylardyŋ jalaqysyn ösıru turaly kelıssözderdı sättı jürgızdık. Eŋbek naryǧyna qatysty jastardyŋ jūmyspen qamtyluyna erekşe män berıp, jūmys beruşılerdıŋ sūranysyna säikes oqudy bıtırgen azamattardyŋ 97 paiyzy jūmyspen qamtyldy»,– dedı şeneunık.Sondai-aq ol jūmystan öz erkımen ketkenın de atap öttı.
«Özderıŋız bılesızder, Nūrlybek Maşbekūly Nälıbaev oblys äkımı qyzmetıne taǧaiyndalǧan uaqyttan bastap, maǧan ekonomika, qarjy salasyna jetekşılık etudı qosymşa jüktedı. Degenmen, säuır aiynan bastap tuǧan aǧamnyŋ balasy Asylbek Şämenov qala äkımı retınde qyzmetke keldı. Asylbek Şämenovtyŋ Jalaǧaş audany äkımı bolǧan kezeŋde maǧan tıkelei baǧynystylyǧy joq bolǧandyqtan, būl jerde zaŋǧa qaişy äreketter oryn alǧan joq. Bıraq, säuır aiynan bastap, qarjy salasyna jetekşılık etetındıkten jäne jienımnıŋ qala äkımı qyzmetıne keluı sebeptı men oblys äkımınıŋ orynbasary qyzmetınen ketu turaly şeşım qabyldadym. Degenmen, men qai kezde de Syr elınıŋ damuyna bar küş-jıgerımdı saluǧa daiynmyn»,— dep tüsındırdı Baljan Şamenova.
«Adyrna» ūlttyq portaly
