Nazarbaev dáýirinde túrli mınıstrlikterdi basqarǵan eks-sheneýnik, belgili ekonomıst Jaqsybek Qulekeev «Suraýy bar» YouTube arnasyna bergen suhbatynda Nazarbaev otbasynyń qalaı bıznes jasaǵany jáne onyń el ekonomıkasyna keltirgen zııany jaıynda aıtty.
«Mysaly siz ınvestor retinde shetelden úlken qondyrǵy alyp kelip úlken zaýyt ashqyńyz keledi. Dál sondaı zaýytty «semıanyń» músheleri de salǵysy keledi. Siz qondyrǵyny shetelden alyp kelgenge óte kóp salyq tóleısiz, al olar salyq tólemeıdi. Sosyn óndiristi bastaǵannan keıin birinshi kúnnen bastap sizdiń artyńyzda salyq ınspektorlary júredi, janyńyzdy qoımaı barlyq tıisti salyqty tóletedi. Al jańaǵy zattardy arzanǵa alyp kelgen, shıkizattyń barlyǵyn arzanǵa alyp kelip jatqan bedeldi toptyń ókilderi salyqtyń eshqaısysyn tólemeıdi. Sonda siz bıznesińizdi qalaı damytasyz? Ananyń shyǵaryp otyrǵan zaty sizden eki ese arzan bolady. Ekeýińiz naryqqa barǵan kezde siz jumys isteı almaısyz», - dedi Jaqsybek Qulekeev.
Óz kezeginde bundaı ádiletsizdik Nursultan Nazarbaev ózi synaǵan masyldyqqa alyp keldi deıdi ekonomıst.
«Otbasynyń (Nazarbaev otbasy) jasap otyrǵan nársesi bizdiń qoǵamda básekelestiktiń damýyna, kásipkerliktiń damýyna óte úlken zııan tıgizgen zat. Biz zańdy túrde otbasyn, elbasynyń aınalasyndaǵy otbasy músheleriniń barlyǵyn zańnan joǵary qoıdyq. Olar zańǵa baǵynǵan joq. Onyń barlyǵyn zańdastyryp qoıdyq biz. Olar aıtady: «men adam óltirsem de sottalmaımyn», - dep. Sonyń ber jaǵynda salyq tólemeý degen ne? Olar zańnan joǵary bolǵannan keıin ádiletti qoǵam bolýy múmkin emes», - dep pikir bildirdi ol.
Suhbattyń tolyq nusqasyn tómendegi siltemeden kórýge bolady:
