Sońǵy aptada Reseı azamattary Qazaqstannan jappaı kólik satyp alyp jatyr. Dıllerlerdiń esebinshe, suranys 10 esege artqan, dep jazady "Adyrna" ulttyq portaly.
Kórshi el turǵyndarynyń kólik izdep, elimizdiń soltústik óńirlerine kúrt aǵylýyna birneshe sebep bar. Birinshiden, Reseı Federaııasynda sheteldik mashına quraý zaýyttary jumysyn toqtatty. Oǵan Reseı men Ýkraına arasyndaǵy shıelenis sebep boldy. Ekinshiden, daıyn tehnıkalardy da ákelmeıtin boldy.
Sondaı-aq, rýbldiń qunsyzdanýy temir tulpardyń qunyn sharyqtatyp jibergen. Mysaly, Qytaı konerni praıs baǵasyn 50%-ke deıin jańartty. Bul úrdis barlyq derlik brendterde baıqalady.
Al, Qazaqstanda qurastyrylatyn kólikterdiń baǵasy ázirshe sol qalpynda. Eń arzany 5 mln 700 myń teńge. Reseılikterdiń de kóz tigip otyrǵany osy baǵasy arzan otandyq kólikter eken.
– Soltústiktegi kórshilerimiz buryn da bizden kólikter satyp alatyn. Biraq tek lıýks sanatyndaǵy, qymbat kólikterdi tańdaıtyn. Bul joly olar arzan kólikterge qyzyǵyp, ótinimderdi eselep jiberip jatyr. Otandyq mashına qurastyrý zaýyttary baǵany osy qalypta uzaq ýaqyt ustaı almaıdy. Óıtkeni, jabdyqtar shetelden ákelinedi, naryqtaǵy baǵa qymbattap jatyr. Kólik satyp alǵysy keletinderge tezdetip kezekke turýǵa keńes beremiz, – deıdi avtokólik salonynyń satý jónindegi dırektory Evgenıı Bıber.
Ázirge, reseılikter onlaın, oflaın suranymdar jiberýde. Olar jappaı satyp alýdy toqtatpasa, kezekte turǵan otandastarymyz kóligin taǵy da uzaq kútýi múmkin. Munyń ústine, jaqynda elimizde 4 paıyzdyq jeńildetilgen nesıe berý baǵdarlamasy jumysyn bastaıdy. Demek ishki naryqta suranys artady degen sóz.
"Adyrna" ulttyq portaly
