Qazaqstan üşın ǧaryş keŋıstıgı öte maŋyzdy. Sebebı alǧaş ret ǧaryşty igeru däl bızdıŋ elden bastaldy. Adamnyŋ ǧaryşqa alǧaş ūşuy da Qazaqstan jerınen bastau aldy. Mıne, sol uaqyttan berı 60 jyl zymyrap öte şyqty. Adamzat ǧaryşty igerudı jalǧastyryp, tolaǧai jetıstıkterge jettı. Tıptı Marsqa qonystanu, Aiǧa kezektı ekspedisiia jıberu men özge planetalardy ızdestıru jūmystary jürıp jatyr. Memleketter türlı sputnikterdı auyl şaruaşylyǧy, aua raiyn baqylau, äskeri salada qoldanyp keledı.
Ǧaryşty igerudı nasihattau maŋyzdy. Jas ūrpaqtyŋ aspan älemıne qyzyǧyp ösuı - bolaşaqta ǧaryş salasynyŋ damuyna da äser etedı. Būl Qazaqstan üşın maŋyzdy. Sebebı üş ǧaryşker şyǧaryp, älemdegı eŋ ırı ǧaryş keşenınıŋ bırıne ie Qazaqstan aldaǧy uaqytta ǧaryş salasyn qarqyndy damytuǧa niettı. Sol maqsatta oquşylar men studentter arasynda tiıstı tüsındıru jūmystary da jürgızıledı.
Qazaqstan Respublikasy täuelsızdıgınıŋ 30 jyldyǧyna jäne adamnyŋ ǧaryşqa alǧaş ūşqanyna 60 jyl toluyna orai arnaiy «KazakhstanSmartSpace» ǧaryştyq tehnika jäne tehnologiialar boiynşa halyqaralyq baiqauy ūiymdastyryluda. Baiqaudyŋ basqy maqsaty jas ūrpaqty ǧaryş älemıne qyzyqtyru, olarǧa qoldau bıldıru jäne būl salany damytudyŋ maŋyzdylyǧyn tüsındıru. Baiqaudy «Ūlttyq ǧaryştyq zertteuler men tehnologiialar ortalyǧy» AQ, «EurasianSpaseVentures» JŞS, «Qazaqstandyq jobalardy
basqaru instituty» QQ ūiymdastyruda.
Baiqauǧa qatysuǧa 50-den astam JOO-ry ötınış bıldırgen. Olardyŋ arasynda Qazaqstannan bölek Resei, Qyrǧyzstan qatysuşylary da bar.
Ūiymdastyruşylar tarapy: "Baiqau biyl bırınşı märte ūiymdastyrylyp otyr. Baiqaudyŋ ötu barysyna bailanysty mümkın ony jyl saiynǧy dästürlı baiqauǧa ailandyratyn şyǧarmyz. Qazır ol jaǧyn da oilanu üstındemız. Qatysuşylardy tek qana baǧaly syilyqpen marapattap qoimai, sonymen bırge "Baiqoŋyr" ǧaryş ailaǧyna aparudy da josparlap otyrmyz", - dedı.Eurasian Space Ventures jeke ǧaryştyq kompaniiasynyŋ bas direktory, Euraziialyq banktıŋ direktorlar keŋesınıŋ müşesı Şuhrat İbragimov atalmyş baiqau talantty jastar arasynda özderın körsetu mümkındıgımen bırge, käsıpkerler üşın bılıktı kadrlardy tabudyŋ joly ekenın de aita kettı.
"Bız bügın eŋ aldymen aimaqtar boiynşa ǧaryş salasyna qyzyǧyp, öz ömırın, bolaşaǧyn ǧaryşty igeru, sol boiynşa jobalar jasaudy qalaityn jastardy tapqymyz keledı. Būl baiqau sondai jastarǧa ülken mümkındık berıp, öz ideialaryn ıske asyruǧa jol aşady. Bız qazırdıŋ özınde aeroǧaryştyq tehnologiialardy damytu üşın ESV ǧaryş habynyŋ inkubatoryna halyqaralyq startaptar men kompaniialardy tartyp jatyrmyz. Bügınde sifrlandyru qarqyny öte joǧary jäne ol prosess toqtamaidy. Ǧaryştyq industriia salasy da qaryştap damuda. Būl baiqau älemge Qazaqstan men aimaqtyq mamandardyŋ blıktılıgın körsetetın bolady", - deidı İbragimov.Şuhrat İbragimov baiqau aiasynda jeŋımpazdardy anyqtap, olardyŋ jobalaryn damytyp, halyqaralyq därejede şyǧaru, tanystyru jaǧyn da qarastyryp otyrǧanyn aitty. Baiqauǧa qatysuşylar üş topqa bölınedı. 12 jasqa deiıngı balalar, olar ata-analarymen bırge komanda jasaqtauyna bolady. 16 jasqa deiıngı balalar, olardyŋ da ata-analarymen bırge komanda jasaqtauyna bolady jäne üşınşı top 16 jastan asqandar. Jarysqa qatysuşylarǧa arnaiy sertifikattar, al jeŋımpazdarǧa baǧaly qarjylai syilyqtar men estelık jädıgerler tabystalady. Baiqauǧa qatysuşylar tört nominasiia boiynşa baq synaidy: Maket; belsendı model, önım, beinerolik; ǧylymi-zertteu jobasy; bäsekege qabılettı robottar. 15-nauryzǧa deiın qatysuǧa joba ūsynuǧa mümkındık bar. Qatysudyŋ erejelerı men şarttary körsetılgen qaǧidalar baiqaudyŋ www.kzsmart.space saitynda jariialanǧan. Baiqaudyŋ finaly 2022 jyldyŋ 8-10 säuırı G. Däukeev at. Almaty Energetika jäne bailanys universitetınde ötedı.
"Adyrna" ūlttyq portaly
