Jyl basynan beri qazaqstandyqtarǵa 234,7 mıllıard teńgeden astam zeınetaqy tólendi. Zeınetaqynyń ortasha mólsheri 105 myń teńgeden asty, dep habarlaıdy "Adyrna" ulttyq portaly.
Eńbek jáne halyqty áleýmettik qorǵaý mınıstrliginiń málimetinshe, bıyl qańtarda respýblıkalyq bıýdjetten zeınetaqy tólemderine 234,7 mıllıard teńgeden astam, onyń ishinde bazalyq zeınetaqyǵa 71,3 mıllıard teńge, yntymaqty zeınetaqyǵa 163,4 mıllıard teńge bólindi.
Vedomstvo habarlaýynsha, 2022 jylǵy 1 aqpandaǵy jaǵdaı boıynsha Qazaqstanda zeınetkerler sany 2 mln 245 myńnan astam adamdy quraıdy.
- 2022 jylǵy 1 aqpandaǵy jaǵdaı boıynsha zeınetaqy tólemderiniń ortasha mólsheri (bazalyq zeınetaqy tólemin eskere otyryp) 105 291 teńgeni qurady, - delingen habarlamada.
2018 jylǵy 1 shildeden bastap memlekettik bazalyq zeınetaqy tólemi, zeınetaqy júıesindegi tájirıbesin eskere otyryp, ár alýshyǵa jeke taǵaıyndalǵanyn eske salaıyq.
Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary (budan ári – MZJ) tólengen kezeńder zeınetaqy júıesindegi eńbek ótiline qosylady.
Sonymen, eger zeınetaqy júıesindegi jumys ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54%-yn quraıdy, sodan keıin 10 jyldan asqan ár jyl úshin onyń mólsheri 2%-ǵa artady. Mysaly, eger siz 20 jyl qatyssańyz, bazalyq zeınetaqy kúnkóris deńgeıi qunynyń 74%-dy, 30 jyl – kúnkóris qunynyń 94%-yn quraıdy. 33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi.
Eger bir aı ishinde MZJ Biryńǵaı jınaqtaýshy zeınetaqy qoryna birneshe ret jasalsa, jınaqtaýshy júıege qatysý merzimi bir aıdy quraıdy.
Osylaısha, mindetti zeınetaqy jarnalary neǵurlym turaqty jáne tolyq salynatyn bolsa, zeınetaqy jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńde alynǵan ortasha aılyq tabysqa baılanysty bolady.
"Adyrna" ulttyq portaly
