Búgin Halyqaralyq «Alash» ádebı syılyǵynyń laýreaty, Qazaqstannyń eńbek sińirgen qaıratkeri Dıdahmet Áshimhanulynyń úsh tomdyq shyǵarmalar jınaǵynyń tusaýkeseri ótti.
Bul úshtomdyqtyń alǵashqysy «Tasqala» dep atalyp, oǵan qalamgerdiń povester men áńgimeler jınaǵy engen. «Aqshoqy» atalǵan ekinshi tomyna áńgimeleri men ádebı esseleri jáne pýblııstıkalyq maqalalary engizilgen. Úshinshi tomdyqqa ár jyldary aýdarylǵan álem ádebıeti klassıkteri Djek Londonnyń «Teńiz qorqaýy» romany men «Kúmán» áńgimesi jáne Djek Golsýorsıdiń «Devondyq adam» atty novellasy kirgen.
Sharada Dıdahmet Áshimhanulynyń úzeńkiles dostary – Nurdáýlet Aqysh, Álibek Asqarov, Naǵashybek Qapalbekov, Qýandyq Túmenbaıuly, Erkin Nurazhan, Nurtóre Júsipter Dıdaǵańnyń azamattyǵy men shyǵarmashylyǵy týraly kóptegen estelikter aıtty.
Nurdáýlet Aqysh, jazýshy:
- 70-shi jyldary bizdiń qatarymyzdaǵy bir top talantty jastar ádebıetke aralasa bastady. Solardyń ishinde Dıdahmet Áshimhanuly óziniń jazý stılimen, oıynyń órnekti obrazdylyǵymen kózge erekshe tústi. Onyń ereksheligi jaıynda men mynany aıtar edim. Birinshiden, ol kisi oıdy túıip aıtady. Árbir shyǵarmasynda taǵylym bar. Oı bar. Ekinshiden, kórkem ádebıettiń ózegi kórkem til desek, Dıdahmet Áshimhanuly sony alǵashqy tyrnaqaldy týyndysynan-aq jete meńgergen jazýshy.
Jasulan NAÝRYZALIEV,
«Adyrna» portaly
