| Belgili sportshy, aýyr atletıkadan burynǵy Olımpıada chempıony Ilıa Ilınnyń aǵasy para berdi degen kúdikpen ustaldy, dep habarlaıdy “Adyrna” ulttyq portaly Orda.kz saıtyna silteme jasap. |
Bul týraly jýrnalıst Mıhaıl Kozachkov óziniń Telegram-arnasynda habarlady.
«Sybaılas jemqorlyqqa qarsy qyzmet Qyzylordada ótken jyly 6 mıllıon teńge alyp jatqan jerinde ustalǵan qalalyq prokýratýranyń qoǵamdyq múddeni qorǵaý bóliminiń bastyǵy Álıhan Bazarbaevtyń kúrdeli shıelenisterin ashýda. Belgili bolǵandaı, qadaǵalaý organynyń qyzmetkeri 5 balalar sport mektebiniń jumysyna oń qorytyndy berý úshin aqshany alǵan. Al oǵan aqshany bes sport jetekshisi – Imanbek Jumabaev, Abylaıhan Aqbergenov, Serik Seksembaev, Erbol Kıkbaev jáne aýyr atletıkadan burynǵy Olımpıada chempıony Ilıa Ilınniń aǵasy Alekseı Ilın jınady» dep jazady Mıhaıl Kozachkov.
Ol jaqynda bul is boıynsha úkim jarııalanǵanyn atap ótti. Bazarbaev kináli dep tanylyp, para berýshilerdiń jaýapkershiligi týraly másele kóterildi.
«16 aqpanda beseýi de ýaqytsha ustaý ızolıatoryna qamaldy. Erteń bultartpaý sharasyn tańdaý máselesi sheshiledi» dedi ol.
Orda.kz tilshisimen telefon arqyly sóılesken Ilın Alekseı degen aǵasy joq ekenin aıtty. «Mende ondaı joq, siz qatelestińiz» dedi Ilıa Ilın jáne telefondy qoıdy.
Biraq, Kozachkov Alekseı Ilın Olımpıada chempıonynyń aǵasy ekenin dáleldeı aldy.
”Adyrna” ulttyq portaly
