ÁMIRJAN QOSANOV: Adaı malaı emestigin kórsetti…

7803
Adyrna.kz Telegram

QAŃTAR QANDY QYRǴYNY. QYRYQ KÚN

Qańtar qandy qyrǵynynan keıin bárimiz de ózgerdik dep jatyrmyz. Men de dál sondaı kúı keship júrmin: ne uıqy joq, ne maza joq. Sanany nebir astyrtyn joramaldar jaýlap alǵan. Eń bastysy, oqqa ushqan jáne azaptalyp jatqan beıbit sherýshilerga qatysty ay suraqtarǵa jóndi jaýap joq!

Óleń de týa qoımady. "Almatyny tuman basty" dep bir óleń ǵana jaza aldym. Bar oıymdy maqalalar men suhbattarda aıtyp jatyrmyn. Jyr qalamy bolsa, bul kúnderi qańtarýly kúıde qaldy...

Sondyqtan búgin, Qandy qyrǵyn qurbandarynyń qyrqy kúni, osydan týra 10 jyl buryn, Jańaózen qandy tragedııasynan 40 kún ótkende jazǵan óleńimdi jarııalap otyrmyn.

Ókinishke oraı, tragedııalar qaıtalanýda!

PS. Osy kúngi mıtıngterge qatysty aıtarym mynaý. Qańtar qandy qyrǵyny beıbit sherýler men mıtıngilerdi bılik te, úshinshi kúshter de ózderiniń aram oılaryn júzege asyryp, quıtyrqy arandatýlarǵa bara alatynyn ap-anyq kórsetti. Qanshama adam qyryldy, zardap shekti. Sol qaýiptiń bulty áli de seıilgen joq! Bılik trazıti áli de aıaqtalǵan joq! Antıtoqaevshyl kúshter, keshegi zamanyn ańsap, qaıtarǵysy kelip, kez kelgen sumdyqqa barýy múmkin. Ol úshin beıbit adamdardy paıdalanýy da múmkin! Maǵan bolsa, ár qazaqtyń amandyǵy kerek!

JAŃAÓZEN. QYRYQ KÚN

Qyryq kún!
Kózim jasqa jýylyp tur, tunyp tur,
Keregi joq nasıhat pen úgittiń!
Saıasattan joly bıik árdaıym
Qurbandardy qadir tutar ǵuryptyń!

Qyryq kún!
Qars aırylǵan júregimdi kim uqtyń?
Eı, Aqorda, nege sonsha qunyqtyń?
Qandy koldy qylmeskerdi tabýǵa
Jetpeıdi me saǵan, aıtshy, qyryq kún?!

Qyryq kún!
Men shyndyq pen sherýlerde shynyqtym,
Kishikpin men, kerek bolsa, ulyqpyn.
Elý jylyń ádiram bop qalsynshy,
Eldi búgin jańartty ǵoı qyryq kún!

Qyryq kún!
Saǵan deıin beıshara bop júrippin,
Jatqa syılap basyn maıly jiliktiń!
Qazaǵymnyń qanyn sorǵan súlik kim?
Qazaǵymnyń qanyn tókken júlik kim?

Qyryq kún!
Men de sensiz beımálim kún súrippin
Ortasynda bylyq penen shylyqtyń.
Qazaqylyq degendi men qoldaımyn,
Qursyn túri tek «qazaqbaı-shylyqtyń»!

Qyryq kún!
Úzilmesin altyn jibi úmittiń!
Kúnáhardyń atyn atar bilip kim?
Jesir menen jer daýy bar qazaqta
Qyryq kúnniń artynda tur qyryq qun!

Qyryq kún!
Tótenshe bop tóndi ústińnen qyryq tún.
Sen degende uıqymdy da umyttym.
ÓZENIME bara almasam, migitpin!
ÓZENIME bara qalsam, jigitpin!

Qyryq kún!
Qylmyskerge tabady eken quryq kim?
Qashan atar ÓZENIMDE kúlip Kún?
Qyryq kúnde kózin ashtyń qazaqtyń,
Tanyttyń sen qasıetin bir ulttyń!

Beket ata bátýasy qonsa eken,
O, Qudaıym, elge bostan berse eken!
Adaı malaı emestigin kórsettiń,
Qazaq mazaq emestigin kórsetem.

"Adyrna" ulttyq portaly

Pikirler