Ómir ár sátke qalaı jaýap beretinimizden turady. Stıven Kovıdiń aıtýynsha, ómirde qandaı jaǵdaıǵa tap bolǵanymyz emes, sol jaǵdaıǵa qalaı jaýap qatatynymyz mańyzdy.
Reaktıv adamdarǵa syrtqy jaǵdaı qatty áser etedi, al proaktıv adamdardyń is- áreketine jan-jaqty oılastyrylǵan ári boıǵa sińgen qundylyqtar áser etedi. Demek, reaktıv adamǵa syrtqy jaǵdaı, aıtalyq «aýa raıy» áser etýi múmkin, al proaktıv adamnyń óz aýa raıy óz ishinde.
Sonymen qatar proaktıv bolý úshin bizdiń qolymyzdan keletin birden-bir nárse – óz tilimizge kóńil bólý jáne kináni ózgege aýdara salatyn reaktıv tildi emes, jaýapkershilik alatyn proaktıv tildi qoldaný bolmaq.
👎 reaktıv til: ol meni májbúrledi. Meniń bolmys-bitimim osyndaı. Esh nárse qolymnan kelmeıdi. Eger qolymnan kelse ǵoı...
👍 proaktıv til: óz ómirim óz qolymda. Óz reakııamdy baqylaı alamyn. Tańdaý quqyǵym bar. Meniń qolymnan keledi.
Reaktıv adamdar kóbine yrqynan tys, endi ózgerte almaıtyn dúnıelerge, aıtalyq, ótken shaqqa bas qatyrady. «Durys oqyǵanymda...», «Myna sharýamen jastaıymnan aınalysýym kerek edi...» Sodan baryp qurbandyq sezimi paıda bolady. Iá, biz qatelesýimiz múmkin, biraq proaktıvti adamdar qateligin óz-ózin aqtap alý úshin emes, sol qatelikten sabaq alý úshin paıdalanady.
Máselen, reaktıv adamdardyń oıy san túrli «bolsadan» turady: úıim bolsa, janashyr basshym bolsa, ǵylymı dárejem bolsa... men baqytty bolar edim.
Al proaktıv adamdardyń oıy “bola alamynnan” turady: men tózimdi bola alamyn, parasatty bola alamyn, súıikti bola alamyn... Kovı «bola alamyn» deý úshin minez kerek deıdi.
Proaktıv bolý úshin mynany usynady: ózińizdiń de, ózgelerdiń de aldynda shaǵyn mindetteme alyńyz jáne sony oryndańyz; Jazalaýshy emes, jasampaz bolyńyz; Synshy emes, úlgi bolyńyz; Problema emes, onyń sheshimi bolyńyz.
Qoryta aıtsaq, proaktıv bolý degenimiz:
Bizdiń kúshimiz óz jaýabymyzdy ózimiz tańdaıtyn erkimiz ben qabiletimizde ekenin bilý; Bastamashyl bolý; Ózińe jaýapkershilik alý; Ómirde biz baqylaı alatyn jáne baqylaı almaıtyn dúnıeler bar ekenin eskerip, baqylaı almaıtynǵa qur bas qatyryp, alańdamaı, yqpal ete alatyn dúnıelerge kóbirek kóńil bólý degen sóz.
"Adyrna" ulttyq portaly
