Búgin Qazaqstan ınjenerlik-tehnologııalyq ýnıversıtetinde Jastar uıymdary komıtetiniń uıymdastyrýymen aqıyq aqyn Muqaǵalı Maqataevtyń týǵan kúnine arnalǵan «Esińe meni alǵaısyń...!» atty ádebı-sazdy jyr keshi ótti.
Keshte jyr padıshasy, sońyna óshpeıtin iz qaldyrǵan Muqaǵalı Maqataevtyń ómiri men shyǵarmashylyǵyna sholý jasalyp, poezııanyń halyqqa keń taralýynyń syry nede ekeni túsindirilip,shyǵarmashylyǵynyń mýzykamen úndesý ereksheligi, aqynnyń sózine jazylǵan ánderin kópshilik nazaryna usynyldy.
Keshtiń ashylý saltanatynda sóz sóılegen Qazaqstan ınjenerlik-tehnologııalyq ýnıversıtetiniń rektory G.Á.Sársenbekova M.Maqataev muralarynyń ómirsheńdigi men óskeleń urpaqty tárbıeleýdegi róline erekshe toqtaldy.
Jıyn barysynda ónerli stýdentter óz shyǵarmashylyǵymen kórermenderdiń erekshe yqylasyna bólenip, aqynnyń ásem ánderi men syrshyl poezııasyn tartý etti.
Talantty stýdentter «Úsh baqytym», «Besik basynda», «Sábı-ana», «Men taýlyqmyn», «Tynyshtyq» atty óleńderin mánerlep oqysa, QazITÝ Ǵylymı kitaphanasynyń meńgerýshisi Z.S.Mahambetova M.Maqataevtyń «Seniń kóziń» ánin tamyljyta oryndady.Sonymen qatar is-shara qonaǵy bolǵan Qurmanǵazy atyndaǵy Qazaq Ulttyq konservatorııasynyń stýdenti Rınat Nurmuhannyń oryndaýynda «Nesine asyǵady?» áni kórermen júreginen jol tapty.
Jınalǵan qaýymǵa aqynnyń ómirin baıandaıtyn derekti fılmder usynylyp, jastardy otansúıgishkikke tárbıeleıtin máni bar óleńderinen úzindi berildi. Erekshe sezim qaldyrǵan sát - aqynnyń ózi jandy daýysta oqyǵan óleńiniń aýdıojazbasy.
Muqaǵalı - máńgilik ómir!
Aqyn murasy, marjan poezııasy - bolashaq urpaqtyń enshisi, qasterlep qadirleıtin murasy, aqyn kókireginen býyrqana aǵylǵan jyr janartaýlary óleńqumar halyqqa taýsylmaıtyn syı, mol qazyna bolyp qala bermek.
Kesh sońyn stýdenttik hor músheleri «Esińe meni alǵaısyń» atty áninmen qorytyndylady.
“Adyrna” ulttyq portaly
