Sońǵy úsh kúnde barsha Alash óz Ábesin joqtap jatyr. Búgin Altaı men Atyraýdyń, Qarataý men Alataýdyń, Syr men qyrdyń arasynan jınalǵan qalyń jurt abyz aqsaqalymyzdy máńgilik mekenine jaıǵastyryp, sońǵy paryzyn ótedi.
Ábeniń ómirine tutas bir ǵasyr syıyp ketetin.Sondyqtan búgin biz Ábeńmen ǵana emes, tutas bir dáýirmen qoshtastyq. Qazaq qoǵamynyń ǵasyrlyq kýágerin, ult ádebıetiniń shejiresin baqıǵa attandyrdyq.
Ábdijámil Nurpeıisov tik sóılep, týra kesse de, eldikke, memleketshildikke qyzmet etti. Ol osy ómirden ótip bara jatyp ta bizdi birlikke shaqyrǵandaı.
Óıtkeni Qazaqstannyń ár túkpirindegi qarapaıym azamattardan bastap, el aldynda júrgen qaıratkerlergedeıin Ábdijámil aǵamyzdy sońǵy saparǵa shyǵaryp salý rásimin aýyzbirshilikpen atqardy. Eldigimiz kóringen, birligimiz tanylǵan is boldy.
Qosh bolyńyz, abyz aǵa! Jatqan jerińiz jaryq, jaıyńyz jumaq bolsyn!
"Adyrna" ulttyq portaly