Áskerden esinen aljasyp oralǵan 19 jastaǵy Renat Jetkergenovtiń jaǵdaıy ońaldy. Ol Qyzylorda psıhıalyq-densaýlyq ortalyǵynan emdelip shyǵyp, qazirgi tańda esin jınaǵan, dep habarlaıdy “Adyrna” ulttyq portaly.
Orda.kz málimetinshe, Renat ortalyqtan shyqqannan keıin alǵash ret ata-anasyn tanyǵan. Anasy Aıǵanym Izbasarova ulynyń derti qaıta kele me dep, oǵan artyq suraq qoımaıtynyn jasyrmady.
«Aýrýhanadan shyqqanyna 5 kún boldy. Aýrý kúsheıip kete me dep odan eshteńe suramaımyz, mazalaýdan qorqamyz. Dári-dármegin beremiz. Basynan ótken sumdyqty eske túsirmeýge tyrysamyz» dedi Renattyń anasy Aıǵanym.
Renattyń jaǵdaıyna qatysty qylmystyq is qozǵalǵan. Endi ol saraptamalardan ótýi kerek.
«Renatqa sot tergeýi aıasynda birqatar saraptama taǵaıyndaldy, biri Almatyda ótedi. Ol úshin Renat Jetkergenovti Qyzylordadan Almatyǵa alyp barý qajet. Biraq oǵan 500 myń teńge kerek. Buǵan jol júrý, Almatyda turý, tamaq kiredi. Ata-anasynda mundaı aqsha joq» deıdi Jetkergenovtar otbasynyń advokaty Nurjamal Baıanova.
19 jastaǵy jigittiń ata-anasy saraptama shyǵynyn kináli tarap óz moınyna alsa dep nıet bildirdi.
«Otbasymyzda ne bolǵanyn, qandaı qıyn jaǵdaıda tap bolǵanymyzdy bári biledi. 3-4 aı boıy aqysyz demalystamyn, mektepte muǵalim bolyp jumys isteımin. Kúıeýim jumyssyz. Shynymdy aıtsam, Araldan Qyzylordaǵa barý úshin kóp qarajat ketti. Renat aýrýhanada jatqan oblys ortalyǵynda turý da qymbat boldy. Sondyqtan saraptamaǵa barý úshin ulym boryshyn ótegen 25744 áskerı bólimi shyǵyndy óteýi kerek. Sol jerde ol osy jaraqattardy aldy» dedi Aıǵanym Izbasarova.
Otbasynyń advokaty Baıanova osyndaı usynys boıynsha QR Qarýly Kúshteri Bas shtabynyń bastyǵy Marat Qusaıynovtyń qabyldaýyna jazylǵan.
Eske salsaq, 19 jastaǵy Renat áskerge baryp, Otan aldyndaǵy boryshyn ótep kelgennen keıin ata-anasyn tanymaı qalǵan.
“Adyrna” ulttyq portaly
