Naýryz túbinde bizdiń jańa jylymyzǵa aınalady - Nursultan Nazarbaev

2169
Adyrna.kz Telegram

ASTANA. QazAqparat -  QR Prezıdenti Nursultan Nazarbaev barsha qazaqstandyqtardy Naýryz meıramymen quttyqtady, dep xabarlaıdy QazAqparat tilshisi.

"Qurmetti otandastar, kele jatqan kóktem men jaqsylyqtyń merekesi - Naýryz meıramy barsha qazaqstandyqtarǵa qutty bolsyn! Bul - uzyn qystan keıin, aıaz ben borannan keıin asyǵa kútetin merekemiz. Meniń Jarlyǵymmen, Naýryzdy úsh kún toılaıtyn bolamyz. Baǵzy zamannan kele jatqan mereke Táýelsizdikpen birge qaıta oraldy. Minekı, Táýelsizdikti alǵaly beri osy Naýryzdy atap kele jatyrmyz. Túbinde bul bizdiń negizgi jańajyldyq merekemiz bolady. 1 qańtardy I Petr Batys Eýropadan alyp kelgen edi. Ony da toılaımyz. Biraq bizdiń negizgi merekemiz - kún men túnniń teńeletin, tabıǵattyń barlyǵy oıanatyn kez", - dep atap ótti N.Nazarbaev "Jańarǵan jer, baq qonǵan nurly el" atty mıýzıkldi tamashalaǵannan keıin  tilshilerge bergen suhbatynda.

Memleket basshysynyń aıtýynsha, Táýelsizdik jyldary ishinde biraz sharýa atqaryldy. Bunyń barlyǵy xalyq birligi arqasynda iske asyp otyr. Álemde bolyp jatqan ózgeristerge baılanysty jańarý, texnologııalyq damý, rýxanı jańǵyrý jáne taǵy basqa baǵdarlamalar qolǵa alyndy. Bes áleýmettik bastama da qarapaıym xalyqtyń jaǵdaıyn jaqsartýǵa arnalǵan. Sebebi onyń ishinde arzan ıpoteka, jataqxana salý, tabysy az adamdardy salyqtan bosatý, gazdandyrý sııaqty mańyzdy máseleler bar.

"Osy ýaqytqa deıin Qazaqstan álemge keńinen tanyldy. Eldiń birligi myqty bolǵandyqtan, memlekettiń abyroıy artyp keledi. Bolashaqta osyny ustanýymyz qajet. Sebebi eldiń birligi, bir judyryq bolyp jumylýy - bolashaq tabystarymyzdyń kózi bolyp sanalady", - dep atap kórsetti Prezıdent.


inform.kz

Pikirler