Bilim jáne ǵylym mınıstri Ashat Aımaǵambetov jumys saparymen Almaty qalasyna bardy, dep habarlaıdy «Adyrna» tilshisi.
Mınıstr bilim jáne ǵylym nysandaryn aralap, túrli kezdesý ótkizdi.
«Barlyq bilim berý uıymdary turaqty jáne shtattyq rejımde jumys isteıdi. Men barǵan № 206 mektep-gımnazııa 2021 jyldyń jeltoqsanynda paıdalanýǵa berildi. Bul Memleket basshysynyń tapsyrmasy boıynsha 2025 jylǵa deıin 1000 mekteptiń qurylysy aıasynda salynǵan nysandardyń biri. Janyndaǵy mektepte qabyldaý qorytyndysy boıynsha 1 synyp oqýshylary kóp boldy, «Iý» synybyna deıin. 1800 oqýshyǵa arnalǵan taǵy bir mekteptiń paıda bolýy oqýshy oryndarynyń tapshylyǵyn sheshýge kómektesti»,– dedi ol.
Aımaǵambetov sapar barysynda áriptes-pedagogtermen áńgimelesip, mańyzdy máselelerdi talqylady.
«Sapaly pedagogıkalyq quramy qýantty. Talen Saltanat-hımııa muǵalimi, pedagog - zertteýshi, Balybekova Rabıǵa Jumanazarqyzy - bıologııa muǵalimi, pedogog - zertteýshi, Nııazbekova Aqmaral Qaltaıqyzy - fızıka muǵalimi, pedagog-sheber. Áriptestermen osy pánder boıynsha oqý baǵdarlamalarynyń mazmunyn jáne oqý proesin jaqsartý ıdeıalaryn talqyladyq.
Sonymen qatar, 315 orynǵa shaqtalǵan #186 bóbekjaıynyń jumysymen tanystym. Buryn bul nysan jalǵa berilgen edi. Qazir ǵımarat jóndelip, jańa balabaqsha ashyldy»,– dep jazdy mınıstr.
Sondaı-aq Aımaǵambetov Qanysh Sátbaev atyndaǵy Qazaq Ulttyq tehnıkalyq zertteý ýnıversıtetine de barǵan.
«Jóndeý jumystarymen tanysyp, jataqhanalarǵa baryp keldim. Ýnıversıtet tarapynan ǵylymı jobalar tanystyryldy.
Áriptesterim aıtqan barlyq suraqtar men usynystardy muqııat tyńdap, jataqhanada qalǵan stýdenttermen áńgimelestim.Sapar barysynda qala mektepteriniń dırektorlarymen kezdesý ótkizdim. Mektep basshylarynyń usynystaryn tyńdap, qyzyqtyrǵan suraqtarǵa jaýap berýge tyrystym. Biz «Almaty mektepteri» jobasyn iske asyrý barysyn talqylap, jan basyna qarjylandyrý tetiginiń tıimdiligin arttyrý, synyp jetekshileriniń ınstıtýtyn kúsheıtý máselelerin talqyladyq jáne ata-analarmen ózara is-qımyldy nyǵaıtýǵa baǵyttalǵan jobalar týraly sóz qozǵadyq.
Áriptester qoıylǵan barlyq mindetterdi tıimdi iske asyrýdyń mańyzdylyǵyn túsinetinderine jáne qoldaıtyndaryna kózim jetti»,– dep sózin qorytyndylady ol.
«Adyrna» ulttyq portaly
