ۋوررەن بەننيستىڭ «كوشباسشى بولۋ حاقىندا» دەگەن بۇل كىتاپتا كوشباسشىلىق قابىلەتتىڭ دارا سيپاتتارى جان-جاقتى ءسوز بولادى، ياعني كوشباسشىعا ءتان قاسيەتتەردىڭ تابيعاتىنا تەرەڭ تالداۋلار جاسالىنىپ، جەكەلەگەن تۇلعالاردىڭ ۇلگى-ونەگەسى ءھام جالپى تابىسقا جەتۋدىڭ قاراپايىم جولدارى قاراستىرىلادى.
كوشباسشى بولعىڭىز كەلسە، بولاسىز!
كوشباسشىلىق ءىلىمىن قاراپايىم وقىرمانعا تۇسىنىكتى ەتۋ ءۇشىن عىلىم جولىندا ءجۇرىپ ايتۋلى تۇلعالاردى زەرتتەگەن ۋوررەن بەننيس كوشباسشىلىقتىڭ نەبىر ءتۇرىن كورىپ، سودان تۇيگەن ويىن وقىرمانعا جۇيەلەپ جەتكىزەدى. سوندىقتان بۇل كىتاپ – ليدەرلەردىڭ قالىپتاسۋى، ولاردىڭ حالىققا نەمەسە ۇجىمعا قالاي باسشىلىق جاسايتىنى جونىندە جازىلعان ەڭبەك.
جالپى العاندا، ۋوررەن بەننيس كوشباسشىلاردىڭ ءوزارا ۇقساستىقتارىن سالىستىرا وتىرىپ، باسقارۋ ءىسىنىڭ تابىسقا جەتكىزەر باستى سيپاتتارىن سارالاعان.
سونىمەن، كوشباسشىلىق تەورياسىنىڭ ءىزاشارى بولىپ ەسەپتەلەتىن عالىم ءوزىنىڭ كلاسسيكالىق ەڭبەگىندە قاتارداعى قىزمەتكەرلەردى كوشباسشىلىققا باۋليتىن ەۆوليۋتسيالىق ۇدەرىستى زەرتتەگەن. اۆتوردىڭ ايتۋىنشا، قاراپايىم قىزمەتكەر بولساڭىز، توڭىرەگىڭىزگە كوز تاستاپ، ءوز تاجىريبەڭىز بەن دۇنيەتانىمىڭىزعا سۇيەنىپ، سەلقوستىقتى ەڭسەرىپ، بويىڭىزداعى باسقا دا قاسيەتتەردى جەتىلدىرە وتىرىپ، ءسىز دە جاسامپاز ليدەرگە اينالا الاسىز.
دەسە دە اۆتور كوشباسشى بولۋدىڭ وڭاي ەمەس ەكەنىن ايتادى. «ايتپەگەندە ەكىنىڭ ءبىرى كوشباسشى بولىپ كەتەر ەدى» دەيدى. الايدا باسشىلىق ەتۋدى ۇيرەنۋ تالابى بار ادامنىڭ قولىنان كەلەدى، ويتكەنى كەز كەلگەن مەنەدجەردىڭ بويىندا شىنايى كوشباسشى بولۋعا قاجەتتى قاسيەتتەردى دامىتۋعا بولادى.
اركىم كوشباسشى بولا الادى دەگەنىمىز، ارينە، اركىم كوشباسشى بولادى دەگەن ءسوز ەمەس. نەگە؟ سەبەپ: ادامداردىڭ كوبى ەنجارلىقتىڭ تۇتقىنى. [1] ولارعا وزگەرىپ، قارىم-قابىلەتىن دامىتۋعا جىگەر جەتىسپەيدى. شىن ىنتالانىپ، ەنجارلىقتى ەڭسەرگەن جىگەرلى جاندار عانا تۇلعالىق ترانسفورماتسيانى باستان وتكەرەدى. ناعىز كوشباسشى بولىپ قالىپتاسۋ – eرىك-جىگەردىڭ ناق كورىنىس بەرەر تۇسى. [2] ەگەر بويىڭىزدا ەرىك-جىگەر بولسا، كوشباسشىلىقتىڭ جولى اشىق.
كوشباسشىلىق – جەكەلەگەن دارىستەر ارقىلى بويعا قوناتىن ونەر ەمەس، ەۆوليۋتسيا جەمىسى. بۇل پروتسەستىڭ يا باسى، يا ورتاسى، يا اياعى جوق، بىراق ءبىر-بىرىمەن بىتە قايناسقان، رەت-رەتىمەن دامىتۋعا بولاتىن داعدىلاردان تۇرادى. ايتالىق، رەسمي جانە بەيرەسمي بىلىمگە دەگەن قاجەتتىلىك;[3] جىبەرىلگەن قاتەلىكتەردى قايتالاماۋ; العان تاجىريبەنى وي ەلەگىنەن وتكىزۋ; تاۋەكەلگە بەل بايلاۋ [4]جانە قاتەلىك جاساۋدان [5] قورىقپاۋ; الدا تۇرعان مىندەتتى مەڭگەرۋ. [6] وسىلاردىڭ ءبارى دە ءبىر-بىرىمەن بىتە قايناسقان ەۆوليۋتسيالىق ءبىرتۇتاس پروتسەسس.
ءتۇپتىڭ-تۇبىندە جاقسى كوشباسشى بولۋعا ۇمتىلعان ادامنىڭ تالپىنىسى ءوز جەمىسىن بەرەدى. ادام كىم بولعىسى كەلسە، سول بولادى». [7]
كوشباسشىعا ءتان بەس قاسيەت
«كوشباسشىنىڭ بەينەسىن» اڭىزعا اينالدىرۋدىڭ ءوزى – بارىپ تۇرعان اڭىز. كوشباسشىلاردىڭ ءتۇر-ءتۇسى، پوشىم-ءبىتىمى مەن مىنەز-قۇلقى ءارتۇرلى بولعانىمەن، ولارعا مىناداي بەس قاسيەت ورتاق:
- كوشباسشىنىڭ جول نۇسقار باعىت-باعدارى [8] بولادى. جاسامپاز باسشىلار قىزمەتتە دە، ومىردە دە نە ىستەۋ كەرەك ەكەنىن، نەنى قالايتىنىن انىق بىلەدى. قاشىپ قۇتىلماس قۇلدىراۋلار مەن ساتسىزدىكتەرگە قاراماستان، ولاردىڭ بويىندا ءوز مۇراتىنا جەتەردەي تەگەۋرىندى كۇش-قايرات بار;
- كوشباسشى ءوزى اينالىسىپ جاتقان جۇمىسقا قۇشتار. [9] كوشباسشىلار ءوز ءىسىن جاقسى كورەدى جانە سودان ءلاززات الادى. وزدەرى قۇشتار ءىس تۋرالى اڭگىمەلەپ، توڭىرەگىن قىزىقتىرىپ وتىرادى;
- كوشباسشىعا ادالدىق [10] ءتان. ادالدىقتىڭ ءۇش قىرى بار. العاشقىسى – ءوزىن تانىپ-ءبىلۋ. كوشباسشىلار وزدەرىنىڭ مىقتى جانە وسال تۇستارىن جاقسى بىلەدى. نە ىستەپ، نە قويۋ كەرەك ەكەنىن جانىمەن تۇيسىنەدى. وزدەرىن ەشقاشان الدامايدى. سوسىن – تۋراشىلدىق,[11] اشىق وي مەن ءادىل ىسكە دەگەن ادالدىق. سوڭعىسى – جەتىلۋ.[12] كوشباسشىلار جول نۇسقاپ، بۇيرىق جاۋدىرۋدىڭ ورنىنا، وزدەرى جۇرتتان ۇيرەنەدى. ىسكەرلىگى مەن ىزدەنىمپازدىعىنىڭ ارقاسىندا اينالاسىنداعىلارمەن قويان-قولتىق ادال دا جەمىستى جۇمىس ىستەي ءجۇرىپ بيىك مارتەبەگە يە بولادى;
- كوشباسشى سەنىم [13] ۇيالاتادى. سەنىم – كوشباسشىلىقتىڭ قۇرامداس بولىگى ەمەس، ونىڭ تىكەلەي جەمىسى. سەنىم – ەشكىم دە ساتىپ الا المايتىن قاسيەت. سەنىم تەك قانا ەڭبەك ارقىلى كەلەدى;
- كوشباسشىلاردى وزگەلەردەن ەرەكشەلەيتىن قاسيەت – قىزىعۋشىلىق پەن باتىلدىق.[14] كوشباسشىلار ءبىلىم الۋعا قۇشتار، ولار قاشاندا تاۋەكەلگە بەل بۋىپ، ىزدەنىپ، جاڭالىق اشۋعا بەيىل. ولار كەز كەلگەن قاتەلىكتەن جاڭا نارسە ۇيرەنىپ، وي ءتۇيىپ، ساتسىزدىكتەن ساباق الادى.
كوشباسشىلاردى الاساپىراننان الىپ شىعىپ،
جەتىستىك جولىنا تۇسىرەر ون قاعيدا
ۋوررەن بەننيس الاساپىراندى ارتقا تاستاپ، وزگەرىس پەن بەلگىسىزدىك جاعدايىندا وركەندەۋ ءۇشىن باسشىلار ەسكەرۋگە ءتيىس ون قاعيدانى ۇسىنادى. بۇل پرينتسيپتەردى ححI عاسىر وتكەلدەرىنەن سۇرىندىرمەي وتكىزەتىن كوپىر دەسەك تە بولادى:
- ارماننىڭ باسشىسى بولىڭىز. [15]ءوز ويىڭىزدى وزگەلەرگە جەتكىزە ءبىلىڭىز، قىزمەتكەردى مۇقيات تاڭداڭىز، ولاردىڭ قىزمەتىن باعالاپ، ءبىلىمىن جەتىلدىرۋگە كوڭىل ءبولىڭىز. سونىمەن قاتار، جاعدايعا بايلانىستى جۇمىستى قايتا قۇرىلىمداپ وتىرىڭىز;
- قاتەلىكتەن قاشپاڭىز. [16] قىزمەتكەرلەر تاۋەكەلگە بەل بۋاتىنداي اتموسفەرا قالىپتاستىرىڭىز. ءسوزىڭىز بەن ءىسىڭىز ارقىلى تاۋەكەل جاساۋدان قورقىپ، تۇك ىستەمەي، ارەكەتسىز وتىرۋدىڭ ءوزى ەڭ ۇلكەن قاتەلىك ەكەنىن ءتۇسىندىرىڭىز;
|
- بايىپتى سىندى باعالاڭىز. [17] ءوز ومىرىڭىزدە جۇبايىڭىز بولسىن، دوسىڭىز بولسىن، شىندىقتى بەتكە ايتاتىن جانداردىڭ قادىرىن ءبىلىڭىز;
- پىكىرى قايشى ادامدى قولداڭىز. [18] ارمان مەن اقيقاتتىڭ اراجىگىن اجىراتىپ، قورىقپاي بەتكە ايتا الاتىن «تۋرا بيلەردى» جانىڭىزعا توپتاستىرىڭىز;
- اينالاعا سەنىم مەن ءۇمىتتىڭ شۋاعىن شاشىپ ءجۇرىڭىز، وپتيميست بولىڭىز. [19] بۇل – «جۇقپالى» قاسيەتتەر. قاراماعىڭىزداعىلار مۇنى «قاعىپ الىپ»، سىزگە ۇقساپ باعاتىن بولادى;
- ءوز ادامدارىڭىزدان ۇزدىك ناتيجە كۇتىڭىز. [20] سوندا عانا ولار وزدەرىنىڭ ءورىسى مەن جاساندى شەكتەۋلەر شەكاراسىنان شىعىپ، ءسىز دە، وزدەرى دە تاڭعالاتىن تابىستارعا قول جەتكىزبەك;
- سەزىم تۇيسىگىن دامىتىڭىز. [21] سىرتقى ورتانىڭ باعىتىن، بولاشاقتا مەكەمەڭىز وركەندەۋ ءۇشىن قالاي وزگەرۋ قاجەت ەكەنىن بولجاي الاتىن كورەگەندىك قابىلەتىڭىزدى جەتىلدىرە ءتۇسىڭىز;
- الىسقا كوز تاستاڭىز. [22] كوكجيەككە ءجيى قاراڭىز، قىسقا مەرزىمدى ءارى ءبىر ساتتىك ناتيجەنى عانا كوزدەيتىن ويلاۋ جۇيەسىنىڭ قۇرساۋىندا قالماڭىز;
- مۇددەلى تاراپتاردى تەڭ ۇستاڭىز. [23] مەكەمەدە وزىندىك مۇددەسى بار ىشكى-سىرتقى باسەكەلەس توپتاردىڭ اراسىندا تەپە-تەڭدىكتى ساقتاڭىز;
- ستراتەگيالىق وداقتاستار مەن سەرىكتەستىكتەر قالىپتاستىرىڭىز. [24] بولاشاقتا ءبىزدىڭ مەكەمەمەن بىرلەسە جۇمىس ىستەيدى-اۋ دەگەن ۇيىمدارمەن بايلانىس ورناتۋدىڭ قۇندىلىعى مەن ارتىقشىلىعىن ەسكەرىڭىز.
كوشباسشى بولۋ وزىندىك تانىمنان باستالادى
كوشباسشىلىقتىڭ بۇلجىماس العىشارتى [25]– بۇل ءوزىن تانىپ-ءبىلۋ. [26] كەمەل كوشباسشىلار وزدەرىنىڭ كىم ەكەنىن جاقسى بىلەدى. ولار ءوز قارىم-قابىلەتىن تارازىلاپ، سوعان قاراي ارەكەت ەتەدى.[27] سونداي-اق وزدەرىنىڭ وسال تۇستارىن مويىنداپ، سونى تۇزەتۋگە تىرىسادى.[28]
ادام ءوزىن تانىپ-ءبىلۋى ءۇشىن ىشكى تۇيسىگىنە قۇلاق ءتۇرىپ، «مەن وسى شىن مانىندە كىممىن» دەگەن سۇراق توڭىرەگىندە تولعانىپ، كوبىرەك وقىپ-ۇيرەنىپ، ءومىر جولىن وي ەلەگىنەن وتكىزىپ وتىرعانى عانيبەت. ءوزىن-ءوزى تانىپ-ءبىلۋ مەن سول تانىمدى تەرەڭدەتە ءتۇسۋ – ومىرلىك پروتسەسس.[29]
ءوزىڭدى تانىپ-ءبىلۋ باتىلدىق پەن شەشىمتالدىقتى [30] قاجەت ەتەدى. ءسىز كىمسىز جانە كىم بولعىڭىز كەلەدى؟ ال اينالاڭىز ءسىزدى كىم دەپ جانە كىم بولادى دەپ ويلايدى؟ ەڭ الدىمەن، وسى ەكى سۇراقتىڭ اراجىگىن اجىراتىپ الۋعا ءتيىسسىز. باليعات جاسقا تولعانعا [31] دەيىن جاقىندار، دوستار، مەكتەپتەگى ۇستازدار، جالپى قوعام سوزبەن دە، ىسپەن دە بىزگە كىم بولاتىنىمىزدى قۇلاققا قۇيادى. ال، شىندىعىندا، ادامدار كىم بولاتىنىن وزدەرى شەشكەن ساتتەن باستاپ، كوشباسشى بولا باستايدى.
بازبىرەۋلەر وزىنە-ءوزى جاقپاعان سوڭ نەمەسە ىستەپ جۇرگەن شارۋالارى كوڭىلدەرىنەن شىقپاعان سوڭ عانا ءوزىن-ءوزى تانۋعا تالپىنىپ، ءوزىن-ءوزى ىزدەۋگە كىرىسەدى. وزىندىك تانىمعا نە سەبەپ بولسا دا، وزىندىك تانىم ادامنىڭ ءوزىن دە، ءىسىن دە وزگەرتەدى. ال ءىسىڭىز وزگەرمەسە، ناتيجە دە وزگەرمەيدى.
ءوزىن-ءوزى تانۋدا مىقتى ليدەرلەر مىناداي ءتورت تاعىلىمدى باسشىلىققا الادى ەكەن:
- ىشكى تۇيسىگىڭىزدى تىڭداڭىز. [32] ىشكى تۇيسىگىڭىزگە قۇلاق تۇرمەۋ – ءوز قابىلەتىڭىز جوعارى بولا تۇرا ازعا قاناعات ەتۋمەن تەڭ. زەرەك قىزمەتكەرلەر ءوز قابىلەتىن تولىق پايدالانباي جۇرگەنىن تەز اڭعارادى. ولار جاڭانى بىلمەكتىڭ تىعىرىقتان شىعار جول ەكەنىن بىلەدى.
- ءوز بولمىسىڭىزدىڭ جاۋاپكەرشىلىگىن ءوز قولىڭىزعا الىڭىز.[33] ءوزىڭىزدى تانىپ-بىلۋدەگى باستى كەدەرگىلەر – تەرىسكە شىعارۋ[34] مەن كىنالاۋ.[35] سوندىقتان ەشكىمگە كىنا تاقپاڭىز. ءوز ءومىرىڭىزدىڭ جاۋاپكەرشىلىگىن ءوز قولىڭىزعا الۋ دەگەن – جەتىستىكتەر مەن ساتسىزدىكتەرىڭىز ءۇشىن دە ءوزىڭىز جاۋاپتى بولۋ. ال ەگەر ءبىر ماسەلەگە قاتىستى ءبىلىمىڭىز جەتپەي جاتسا، بارىڭىز دا وقىپ الىڭىز. ال ەگەر تاجىريبەڭىز جەتپەي جاتسا، ىزدەنىپ، ۇيرەنىپ الۋ ءوز قولىڭىزدا.
- كوپشىلىككە قاراعاندا تەرەڭىرەك ءبىلىم الىڭىز.[36] ءوزىن تانىپ-ءبىلۋدىڭ بۇل قاعيداسى قۇر وقي بەرۋ مەن ءبىر ءپاندى جەتە مەڭگەرۋدەن اۋقىمدى. بۇل – الەمنىڭ قانداي ەكەنىن جانە قانداي بولۋى مۇمكىن ەكەنىن كورە ءبىلۋ، كورگەندى ءتۇسىنىپ، سول تۇسىنىككە سۇيەنىپ ارەكەت ەتۋ. سوندىقتان وقىعاندا قۇرعاق اقپاراتتى ەستە ساقتاۋمەن شەكتەلمەگەن ءجون.
- دۇرىس تۇسىنىك تاجىريبەنى سارالاعاننان تۋادى. اكادەميالىق ەرەجە بويىنشا ءتۇسىنۋ ءۇش دەڭگەيدەن تۇرادى. ءبىرىنشى دەڭگەيدە – ءوزىڭىز ۇيرەنەسىز. كەلەسى دەڭگەيدە – وزگەگە ۇيرەتەسىز. سوڭعى ءارى جوعارعى دەڭگەيدە ءپان جايىندا وزىڭىزشە وي قورىتىپ، ەڭبەك جازاسىز. ءار قادام سايىن ءتۇسىنۋ دە تەرەڭدەي تۇسەدى.
كوشباسشى ءوزىن قالاي تانىسا، مىنا الەمدى دە سولاي تانۋى ءتيىس
قازىرگى تاڭدا كۇللى الەم ۋىستان شىعىپ كەتكەندەي. بۇگىنگى ۇرپاق باستان كەشىپ جاتقان تۇبەگەيلى وزگەرىستەر بارلىق سالانى دا شارپىپ وتكەن. ويىن ەرەجەسى عانا ەمەس، ويىننىڭ ءوزى دە تۇبىرىمەن وزگەرىپ سالا بەردى. سوندىقتان كوشباسشىلىق سىرىنا قانىقپاس بۇرىن اۋەلى ءوزىمىز ءومىر ءسۇرىپ وتىرعان وسىناۋ جاڭا دا «توسىن» الەمدى تولىق تانىپ الۋعا ءتيىسپىز. ويتپەگەن جاعدايدا، باسشىلىق جاساۋ بىلاي تۇرسىن، سونىڭ ىقپالىنا ءتۇسىپ، ىرقىنان شىعا الماي قالۋىمىز ابدەن ىقتيمال.
سوندىقتان ناعىز كوشباسشىلار وزدەرىن تانۋعا قانشالىقتى قۇشتار بولسا، الەمدى تانۋعا دا سونشالىق جان-تانىمەن قۇمارتادى.[37] دۇنيە تۋرالى ءىلىم [38] ومىرلىك تاجىريبەمەن كەلەدى. ساپارلارعا شىعۋ ارقىلى، باياندى ءومىر ارقىلى، ۇستازدارمەن جانە ءوز ورتاڭىزبەن تىعىز بايلانىس ورناتۋ ارقىلى، سونداي-اق ۇزدىكسىز ءبىلىم الۋ ارقىلى الەمدى تاني الاسىز.
الەم تانۋدا وقۋ ورىندارى بەرەتىن بىلىممەن شەكتەلمەگەن ءجون. كوپتەگەن ۋنيۆەرسيتەت ادام بولۋدى ەمەس، اقشا تابۋدى كوبىرەك كۇيتتەيتىن «تارماڭداي» ماماندار [39] توبىرىن تۇلەتۋدەن ءارى اسا الماي جاتىر. ولارعا نە ىستەۋ كەرەك ەكەنىن وقىتادى، ال قانداي ادام بولۋ قاجەتتىگىن ۇيرەتپەيدى. سوندىقتان بۋحگالتەرلىك ەسەپ، ماركەتينگ نەمەسە كومپيۋتەرلىك باعدارلامالاۋ كۋرستارىنا قاراعاندا، فيلوسوفيا، تاريح پەن ادەبيەت دارىستەرى – دامۋ مەن شابىتتانۋدىڭ قاينار كوزى.
الەم تانۋعا دەگەن تالپىنىس – تىرشىلىكتى ءار قىرىنان كورۋگە دەگەن ىزدەنىس. الايدا مەملەكەتتىك ۇيىمدار مەن جەكەمەنشىك كومپانيالار، جالپى، تۇتاس قوعام حالىقتىڭ ادەپكى تۇرمىستا، ساياسات پەن يدەولوگيادا دا بەلگىلەنگەن شەڭبەردەن شىقپاعانىن قالايدى. ارينە، بۇل جاڭالىق ەمەس. جەتىستىككە جەتكەن ادامداردىڭ قاتارىندا اعىسقا قارسى جۇزگەندەر ەمەس، بەيىمدەلگىش جولبيكەلەردىڭ كوپ ەكەنىن ءوزىڭىز دە كورىپ جۇرگەن بولارسىز.
الەمدى تانۋعا بەلگىلى ءبىر دەڭگەيدە تاۋەكەل دە كەرەك. ناعىز كوشباسشى قاتەلىكتى دامۋ مەن پروگرەستىڭ بالاماسى سانايدى. ولار قاتەلىككە سيرەك ۇرىناتىن ادامداردىڭ كوپ جاعدايدا تاۋەكەلگە بارمايتىنىن، ءوز بەتىنشە شەشىم قابىلدامايتىنىن جاقسى بىلەدى. وگىزدى دە ولتىرمەيتىن، اربانى دا سىندىرمايتىن ونداي ساق قىزمەتكەرلەردىڭ جۇمىسى دا ورتاڭقول بولماق.
شيرلي حافستەدلەر دەگەن بەلگىلى زاڭگەر: «ەگەر ءالى كۇنگە دەيىن ساتسىزدىككە ۇشىراپ كورمەسەڭىز، دەمەك، جۇمىسقا ءالى بارىڭىزدى سالماعانسىز»، – دەگەن ەكەن.
قاتەلەسپەيتىن جان جوق، دەگەنمەن قاتەلىكتەر دە ءسىزدىڭ ءوسىپ-وركەندەۋىڭىز بەن دامۋىڭىزعا سەپتىگىن تيگىزەدى.
كوشباسشىلار تۇيسىككە جۇگىنەدى
ءومىردى قاراپايىم ەتەمىز دەپ ءجۇرىپ، ونىڭ كوپقىرلىلىعىن بىرەر سوزدەن تۇراتىن تاق-تۇق قاعيدا دەڭگەيىنە ءتۇسىرىپ، قارابايلاندىرىپ جىبەرۋگە تىنىمسىز تىرىسامىز. [40] قاراپايىمدىلىقتى [41] جاقتاۋشىلار شىندىقتى [42] قۇددى ءبىر سىر-جۇمباقسىز، بولشەكتەنەتىن، قولعا ۇستايتىن زات سەكىلدى كورەدى. ال شىن مانىندە، شىندىق دەگەنىمىز – تابيعي، تۇتاس ءارى قالىپقا سىيمايتىن قۇبىلىس.
كورنەكتى كوشباسشىلار لوگيكالىق ءھام اناليتيكالىق قابىلەتپەن قاتار، تۇيسىك پەن كونتسەپتۋالدى داعدىلارعا دا ارقا سۇيەيدى. باسشىلارعا باسقارۋشىلىق قابىلەتكە قوسا، شىعارماشىلىق قارىم دا قاجەت. وكىنىشكە قاراي، كومپانيا باسشىلارىنىڭ ىلۋدە ءبىرى عانا قابىلەتتى مەنەدجەردەن ناعىز كوشباسشىعا اينالا الادى. سەبەبى كورپوراتيۆتىك مادەنيەت، ءتىپتى تۇتاس قوعام، تەك ساندىق، ءداستۇرلى تابىستاردى، ياعني ميدىڭ سول جاق جارتى شارىنا ءتان جەتىستىكتەردى [43] عانا بايقايدى، سولاردى عانا باعالايدى. وسىنداي جەتىستىكتەرگە قول جەتكىزگەن ادامدار عانا قىزمەتتە وسەدى. [44] ال جاڭا دۇنيەلەر ميدىڭ وڭ جاق جارتى شارىنا ءتان جەتىستىكتەر, [45] ولار ادەتتە ەلەۋسىز قالادى. سوندىقتان دا كرەاتيۆكە، شىعارماشىلىققا ءبىر تابان جاقىن جاندار قىزمەتكەردى وسىرەردە ەسكەرۋسىز قالادى.
جازۋشى، پروديۋسەر، باس ديرەكتور نورمان لير بولاشاق كوشباسشىلارعا ىشكى تۇيسىككە قۇلاق اسۋ كەرەكتىگىن ايتادى. «... ءبىز ءوز وي-پىكىرىمىزدەن باس تارتساق، سول ويلار ءبىراز ۋاقىت وتكەن سوڭ باسقا ءبىر ادامداردىڭ اۋزىمەن ايتىلىپ جاتقانىن ەستيمىز. سوندىقتان بابىمدا تۇرعان كەزىمدە ىشكى تۇيسىگىمنىڭ ايتقانىنا ەردىم»، – دەيدى ول. سوندىقتان «جۇرت مىنانىڭ ەسى دۇرىس ەمەس شىعار دەپ ايتادى عوي» دەپ ويىڭىزدى بۇگىپ قالماڭىز. «قوعام قابىلدامايدى-اۋ» دەپ ءۇنسىز قالماڭىز.
كوشباسشىلار جارىققا شىعاردا جاسار ءتورت قادام
ەندى عانا كورىنىپ كەلە جاتقان كوشباسشىلار الدارىنا ناقتى ءارى ايقىن ماقسات قويۋى ءتيىس. ناقتىلانباعان ماقساتتان پايدا جوق. كوشباسشىلاردىڭ جاڭا تولقىن وكىلى بولساڭىز، جارىققا شىعۋ ءۇشىن، ءوز-ءوزىڭىزدى كورسەتۋ ءۇشىن مىناداي ءتورت قادام جاساۋعا ءتيىسسىز.
- نە قالايتىنىڭىزدى جانە قولىڭىزدان نە كەلەتىنىن انىقتاپ الىڭىز. قالاۋىڭىز بەن قابىلەتىڭىزدىڭ اراسىندا قانداي ايىرماشىلىق بار؟ مۇنى تارازىلاپ الۋ اسا قيىن ەمەس. ءبارىمىز دە ومىر بويى وز قالاۋىمىز بەن قابىلەتىمىزدى ۇشتاستىرۋعا [46] ءتيىسپىز، كەيدە بەلگىلى ءبىر دەڭگەيدە ىمىراعا كەلۋگە تۋرا كەلەدى. ماسەلەن، الاسا بويلى سپورتشىلار ترەنەر بولۋعا كونەدى، داۋىسى شامالى انشىلەر ءان جازىپ كەتەدى دەگەندەي.
- قانداي جۇمىستان راقات الاتىنىڭىزدى انىقتاپ الىڭىز. قالايدا جەتىستىككە جەتۋدى [47] كوزدەگەن باسشىلاردىڭ كوبى – ومىردەن ءوز ورنىن تاپپاعان، شەكتەۋلى جاندار. [48] ابىرويدى بايگەگە تىكپەي-اق، جەتىستىككە جەتىپ، راقاتقا بولەنۋگە ابدەن بولادى. بىراق ول ءۇشىن نە قالايتىنىڭىزدى جانە سول قالاۋىڭىزدىڭ تەك ماڭداي تەرمەن كەلەتىنىن تارازىلايتىنداي بويىڭىزدا دانالىق پەن ادالدىق بولۋى ءتيىس.
- جەكە باسىڭىز بەن ءوزىڭىز ىستەيتىن مەكەمە ءۇشىن نە قۇندى، نە ماڭىزدى ەكەنىن انىقتاپ الىپ، ولاردى سالىستىرىڭىز. قۇندىلىقتار اراسىندا ايىرماشىلىق بار ما؟ بۇل سۇراققا جاۋاپ بەرمەس بۇرىن، الدىمەن ءوزىڭىز دە، مەكەمەڭىز دە قانشالىقتى يكەمدى، سول جاعىن مۇقيات زەردەلەپ الىڭىز. كورپوراتيۆتىك مادەنيەتى قاتاڭ كەيبىر مەكەمەلەر كومپانيانىڭ ۇستانىمىنا ءسوزسىز بويسۇنۋدى تالاپ ەتەدى, [49] ال كەيبىر مەكەمەلەر ەركىن جانە بەيىمدەلگىش. [50] ءوزىڭىز بەن مەكەمەنىڭ قانشالىقتى يكەمدى ەكەنىن زەردەلەپ العان سوڭ، ءوزىڭىزدى كورسەتكىڭىز كەلىپ جۇرگەن ورتا قولايلى ما، ءسىزدى قابىلداي ما، جوق پا، الدە قۇندىلىعى مەن پريوريتەتتەرى جانىڭىزعا جاقىن باسقا مەكەمەدەن جۇمىس تابۋ كەرەك پە، سونى شەشىپ العانىڭىز ءجون.
- العاشقى ءۇش قادامنان سوڭ، وزىڭىزگە سۇراق قويىڭىز: الدىڭىزدان شىعار كەدەرگىلەرگە توتەپ بەرە الاسىز با، جالپى، سوعان دايىنسىز با؟ بۇل تۇستا ءوز مۇمكىندىگىڭىزدى قارقىندى تەكسەرۋ [51] مەن سارالاۋدى قاجەت ەتەدى. ءوزىڭىزدى كورسەتۋ جولىنداعى كەدەرگىلەردى ەڭسەرۋگە [52]دايىنسىز با، وسىنى تۇسىنگەن ءجون. بۇل شەشىم قازىرگى باعىتىڭىزبەن جۇرە بەرەسىز بە، الدە باسقا سالاعا نەمەسە باسقا مەكەمەگە اۋىساسىز با، سوعان اسەر ەتەدى.
كوشباسشىلار ءۇشىن الاساپىران اراسىنداعى ارپالىس قالىپتى جاعداي
كرەاتيۆ كوشباسشىلىق ورتالىعىنىڭ مىنەز-قۇلىقتى زەرتتەيتىن عالىمدارى مايكل لومباردو مەن مورگان ماككوللدىڭ ايتۋىنشا، كوشباسشىنىڭ ومىرىندە باق تا، سور دا كەزدەيسوق ءارى ءجيى كەزدەسىپ تۇرادى. سەبەبى مارتەبە مەن لاۋازىم كوشباسشىلاردى تارتىمدى «نىساناعا» اينالدىرادى. ۇجىم ىشىندە دە، سىرتىندا دا كوشباسشىلىققا ۇمتىلعانداردىڭ سانىن كوبەيتەدى. وعان قوسا، دۇنيەنىڭ تۇتقاسىن ۇستاپ تۇرعان كەزدە ەلدىڭ ءبارى سىزگە قارۋىن كەزەنىپ جۇرگەندەي كورىنەدى.
قىزمەتتە ءوسۋدىڭ، باسشى بولۋدىڭ قالىپتاسقان بەلگىلى ءبىر ءتارتىبى جوق. قىزمەت باسپالداعىندا توپ-مەنەدجەرلەر ساتسىزدىكتەر، قىزمەتتەن تومەندەپ قالۋ، مەكەمەلەردى ماجبۇرلەپ بىرىكتىرۋ مەن جۇتىلۋ، قايتا قۇرۋ جانە كەڭسە ويىندارى سياقتى نەبىر قيتۇرقى قيىندىقتارمەن بەتپە-بەت كەلەدى. مۇنداي كەدەرگىلەر كوشباسشى ءومىرىنىڭ اجىراماس بولىگى سانالادى. ءسىز مۇنداي وتكەلدەن ءوتىپ قانا قويماي، ءار كەدەرگىدەن ساباق الىپ، جاڭانى ۇيرەنىپ، تۇلەپ وتىرۋعا ءتيىسسىز.
كوشباسشىلارعا الاساپىراننىڭ ورتاسىندا، بولجاپ بولمايتىن جاعدايدا [53]جۇمىس ىستەۋگە تۋرا كەلەدى. سوندىقتان كوشباسشىلار ۇنەمى وزگەرىس ۇستىندە بولعانى ءجون. سەبەبى كوشباسشىلىق ومىردەگى ەشقاشان وزگەرمەيتىن ءبىر قۇبىلىس – بۇل ۇزدىكسىز وزگەرىس.[54] وزگەرىسسىز كوشباسشىنىڭ ەڭبەگى ەش، تۇزى سور، ياعني كۇنى قاراڭ دەگەن ءسوز. سول سەبەپتى دامىلسىز قوزعالىس پەن ۇزدىكسىز وزگەرىسكە تولى ورتاعا بەيىمدەلۋ مەن كەزدەيسوق جاعدايلارعا يكەمدەلۋگە [55] تۋرا كەلەدى. وسىنداي قاربالاستاردا قابىلەتىڭىز شىڭدالادى، قيىن سىناقتاردان نەعۇرلىم كوبىرەك وتسەڭىز، سوعۇرلىم جاقسى باسشى بولاسىز. كەز كەلگەن پروتسەستىڭ اجىراماس بولىگى سانالاتىن ساتسىزدىكتەردىڭ [56]ءوزى ادامدى ەسەيتەتىن سىندارلى تاجىريبە بولىپ ەسەپتەلەدى.
وزگەرىسكە بەيىمدەلۋ ءۇشىن كوشباسشىلار جۇمىس ۇستىندە ارپالىسىپ ءجۇرىپ ۇيرەنۋگە ءتيىس. ونى قالىپتى جاعداي دەپ قابىلداۋ قاجەت. ناقتىراق ايتقاندا، ولار توسىن سىناقتان، جۇيەلەنبەگەن جۇمىستان، بۇرىن-سوڭدى ىستەپ كورمەگەن ىستەن ۇيرەنەدى.
ناعىز كوشباسشىلاردىڭ كوبى مىنە وسىنداي نەبىر كۇردەلى سىناقتاردى باستان وتكەرگەن. باستان وتكەن ءار سىناق جاقسى كوشباسشى بولۋعا ءبىرتابان جاقىنداتا ءتۇسۋى ىقتيمال.
ەرنەست حەمينگۋەي ايتقانداي، الەم ءبىزدى تالقانداپ تاستايدى، ال ءبىز ۇيىندىلەردىڭ اراسىنان كۇشەيىپ قايتا تۇرامىز. بۇل ءسوز كوشباسشىلارعا دا قاتىستى. قۇلاسا دا سىلكىنىپ، قايتا تۇرا الاتىن ادامدار عانا ءوز باعدارىنا بەرىك بولىپ، ءوز مۇراتىنا جەتەدى.
سەنىمگە يە بولۋ ءۇشىن كوشباسشىعا ءتورت قاسيەت قاجەت
باسشىلاردىڭ جەتىستىگى قاراماعىنداعىلاردىڭ [57] جەتىستىگىمەن ولشەنەدى. ماقساتقا بەرىك بولىپ، ادالدىق تانىتىپ، جۇرت ارقا سۇيەيتىن ازامات بولعاندا عانا ءسىز قاراماعىڭىزداعىلاردىڭ سەنىمىنە يە بولاسىز. [58] ال باز بىرەۋلەر سەنىم تۋدىرۋ ءۇشىن حاريزما كەرەك دەپ ويلايدى. شىن مانىندە، كوشباسشى بولۋ ءۇشىن بويىڭىزدا حاريزمانىڭ بولۋى مىندەت ەمەس. كوشباسشىلاردىڭ كوبىنىڭ حاريزماسى جوق بولعانىنا قاراماستان، وزگەلەردىڭ سەنىمىنە يە بولىپ، اينالاسىنداعىلاردىڭ ىقىلاسىنا بولەنىپ، سول ارقىلى ماقساتتارىنا جەتىپ ءجۇر.
سونىمەن قاتار، سەنىم تۋدىرۋ ءۇشىن كەيبىر كوشباسشىلار ەمپاتياعا [59]كوپ كوڭىل بولەدى. كوپتەگەن ليدەر بۇل قاسيەتتىڭ جوقتىعىنا قاراماستان جەتىستىككە جەتەدى. ارينە، ونداي قاسيەتكە يە ادامدار توڭىرەگىنەن كوبىرەك قولداۋ كورمەك.
ەمپاتيامەن قاتار ىسكەر كوشباسشىلار ءوزى بەت العان باعىت-باعداردى بەتكە ۇستاۋدى ناسيحاتتاپ، جۇرت قولداعان جاعدايدا بارلىعى دا ولجالى بولاتىنىنا ۇجىمدى سەندىرەدى.
Lucky Stores-دىڭ باسشىسى دون ريچي بىلاي وي تۇيەدى: «كوشباسشى ەڭ باستىسى، ادامداردى شامادان تىس جۇمىس ىستەۋگە ماجبۇرلەي المايتىندىعىن ەسكەرگەنى ءجون. ولار وزدەرى قۇلشىنۋعا ءتيىس. دەسە دە، مەنىڭ ويىمشا، كوپ جاعدايدا ادامدار ءوز باسشىسىن قۇرمەتتەسە ءارى ونىڭ كومپانيانى وركەندەتەتىندەي مۇمكىندىگى بار دەپ سەنسە عانا ۇجىمدا قۇلشىنىس پايدا بولادى».
دەمەك، ءوز ىنتاسىمەن كوشباسشىعا ىلەسۋشىلەر وعان سەنۋى ءتيىس، الايدا سەنىمگە بۇيرىق جۇرمەيدى.[60] ەگەر ءسىز كوشباسشى رەتىندە كەلەسى ءتورت قاسيەتتى بويىڭىزعا ۇيالاتا الساڭىز، قاراماعىڭىزداعىلاردىڭ سەنىمىنە يە بولاسىز:
ءبىرىنشى قاسيەت – تۇراقتىلىق.[61] باعىتىڭىزدان اۋىتقىماي، باعدارىڭىزعا بەرىك بولىڭىز;
ەكىنشى قاسيەت – سايكەستىك.[62] قۇندىلىقتارىڭىز، تەوريالارىڭىز بەن نانىمدارىڭىز ءار سوزىڭىزدەن كورىنىس تاۋىپ، ولاردى ءىس-ارەكەتىڭىزبەن دالەلدەپ وتىرىڭىز;
ءۇشىنشى قاسيەت – سەنىمدىلىك.[63] قىزمەتتەس ادامداردى قاجەتتى ساتتە قولداي ءبىلىڭىز. ماڭىزدى ساتتەردە قاسىنان تابىلىڭىز;
ءتورتىنشى قاسيەت – ادالدىق.[64] موينىڭىزعا العان مىندەتتەر مەن بەرگەن ۋادەنى ورىنداڭىز. ءسوزىڭىز ىسىڭىزگە كەپىل بولسىن.
تۇپتەپ كەلگەندە، قىزمەتتەستەرىڭىزدىڭ قولداۋى مەن قۇرمەتىنە يە بولۋ-بولماۋىڭىز – ءوز بولمىسىڭىزدى قانشالىقتى جاقسى بىلەتىنىڭىزگە، قاسىڭىزداعى ادامداردىڭ مۇقتاجدىعىن قانشالىق جاقسى تۇسىنەتىنىڭىزگە جانە جوعارىدا جازىلعان قاعيدالى ءتورت قاسيەت ارقىلى ولاردىڭ سەنىمىنە يە بولۋىڭىزعا تىكەلەي بايلانىستى.
كوشباسشىلاردى قالىپتاستىرۋ مەكەمەلەر مىندەتى
تەحنولوگيالار، عالامدىق ءوزارا تاۋەلدىلىك, [65] بىرىگۋ مەن جۇتىلۋ, [66] نارىقتى ىرىقتاندىرۋ، دەموگرافيالىق كورسەتكىشتەر مەن قۇندىلىقتاردىڭ وزگەرۋى بۇگىندە بيزنەستى جۇرگىزۋ ءتاسىلىن تۇبەگەيلى وزگەرتىپ جىبەردى. تەك وزگەرۋ ارقىلى عانا مەكەمەلەر عالامدىق باسەكەلەستىك ورتادا [67] دۇرىس جولعا تۇسە الماق.
ال وزگەرىستىڭ باسى ادامداردى باعالاۋدان باستالماق. قىزمەتكەرلەر – مەكەمەنىڭ باستى قۇندىلىعى، دەگەنمەن باسشىلار ولاردى كوبىنە اكتيۆ رەتىندە ەمەس، مىندەتتەمە [68]رەتىندە قابىلدايدى. مۇنداي ەسكى كوزقاراس مەكەمەنىڭ باستى رەسۋرسىن – مەكەمەنى وزگەرتۋ ءۇشىن قولدانۋعا كەدەرگى جاسايدى.
تەك ساناۋلى عانا مەكەمەلەر «ادام كۇشىن» [69] باعالاي باستادى. كوبى كەرى باعىتتى ۇستانىپ، قىزمەتكەرلەردىڭ مەكەمەگە دەگەن نيەتىنە نەمقۇرايدى قاراپ، قامقور بولۋدىڭ ورنىنا قىسقارتىپ, [70] بار كۇشتەرىن تەك ناتيجەگە جۇمىلدىرادى.
سوندىقتان مەكەمە باسشىلارى قىزمەتكەرلەردىڭ ءبىلىم الىپ، كوشباسشى بولارلىقتاي تاجىريبە جيناقتاۋىنا جاعداي جاساۋى ءتيىس. سەبەبى مەنەدجەرلەردى جۇمىستا العان تاجىريبەسى كوشباسشى ەتەدى. قىزمەتكەرلەرگە جۇمىس ىستەۋ ارقىلى ۇيرەنۋگە مۇمكىندىك بەرگەن [71] ءجون. ول ءۇشىن قالىپتى جاعدايدا وزگەرىسكە جول اشاتىن، شاراسىز قاتەلىكتەرگە توزەتىن [72]ورتا كەرەك. ۇيرەنۋ مەن ءوسۋ كەزىندە ادامدار، ادەتتە، ءوز شەڭبەرىنەن شىعىپ كەتىپ وتىرادى.
«مۇمكىندىك بەرۋ» دەگەنىمىز قىزمەتكەرلەرگە باسشىلىق ەتۋگە، باسشىلىق قىزمەتتە ءوز-ءوزىن سىناپ كورۋگە جول اشۋ دەگەن ءسوز. مۇنداي مۇمكىندىكتەرگە مىنالار جاتادى: دەپارتامەنتتەر مەن بولىمشەلەر اراسىنداعى كادر الماسۋ، قىزمەتكەرلەردىڭ جەلىلىك الماسۋى، ارنايى جوبالارعا جۇمساۋ، نىسانالى توپتاردىڭ مىندەتتەرى مەن اقاۋلاردى انىقتاپ، تۇزەتۋ جاۋاپكەرشىلىگىن جۇكتەۋ، سونداي-اق فيليالدارعا قىزمەتكە جولداۋ.
كوپتەگەن كومپانيا وسىنداي ستاندارتتى تاسىلدەردى ءساتتى قولدانىپ جۇرسە، وزگەلەرى شەڭبەردەن شىعىپ، جاس باسشىلارعا ۆەنچۋر كاپيتال نەگىزىندە جاڭا كومپانيالار قۇرۋعا، تيىمدىلىگى تومەن شاعىن ەنشىلەس كاسىپورىندى باسقارۋعا, [73] قيىن جاعدايعا تاپ بولعان بولىمشەلەردى ساتۋدىڭ ورنىنا، جاس باسشىلاردى تىعىرىقتان شىعار جول ىزدەۋگە مۇمكىندىك بەرەدى.
كوشباسشىنىڭ جولى قيقالاڭ
كوشباسشىنىڭ قالىپتاسۋى – ءومىر بويعى قىم-قيعاش ىزدەنىس ساپارى. [74] بەننيستىڭ سوزىنە سۇيەنسەك، ناعىز كوشباسشى بولۋ ءۇشىن باسشىلىق جاسايتىن ورتانىڭ جاي-جاپسارىن ەگجەي-تەگجەيلى مەڭگەرىپ، كوشباسشىلىقتىڭ نەگىزگى قاعيدالارىن ۇيرەنىپ، ونى ىستە قولدانىپ، ءوزىڭىزدىڭ شىنايى بولمىسىڭىزعا ەتەنە جاقىنداپ، ايتۋلى ومىرلىك وقيعالاردى وي ەلەگىنەن وتكىزىپ سارالاپ، ءومىر ءسۇرىپ جۇرگەن الەمىنىڭ شەكاراسىن بەلگىلەۋ كەرەك.
كوشباسشىلار ىشكى تۇيسىگى مەن داعدىلارىنا ءجيى سۇيەنەدى، بۇل دەگەنىمىز – ءوز تۇيسىگىڭىزگە سەنۋ ءھام سول سەنىمدى ءتۇرلى جۇمىس جاعدايىندا ەسكەرىپ وتىرۋدى داعدىعا اينالدىرۋ دەگەن ءسوز. وندايدا تاپتاۋرىن جولمەن جۇرە بەرمەي، جاڭا سوقپاقتاردى ىزدەگەنىڭىز ءجون.
قاتارداعى قىزمەتكەردىڭ كوشباسشىعا اينالۋى – ايرىقشا قۇبىلىس. ءوز قالاۋىڭىزدى، قابىلەتىڭىزدى، امبيتسياڭىزدى، وڭ تاجىريبەڭىزدى، سونداي-اق جەكە جانە كورپوراتيۆتىك قۇندىلىقتار مەن پريوريتەتتەرىڭىزدى ايقىنداۋ ارقىلى شىنايى بولمىسىڭىزدى بارىنشا جارقىراتىپ كورسەتە الاسىز. وسىنداي بىلىك-بىلىممەن قارۋلانعان شىن پاراسات يەسى عانا ءوزىن دە، اينالاسىنداعى جاعدايدى دا تۇبەگەيلى وزگەرتۋگە قاۋقارلى. ال ەگەر كورپوراتيۆتىك مادەنيەت ولاردىڭ ۇستانىمىنا قايشى كەلىپ جاتسا، كوشباسشىلار ەڭبەك ورنىن، ءتىپتى ءوزىنىڭ كاسىبي سالاسىن وزگەرتۋدەن تايسالمايدى.
وسىدان از ۋاقىت بۇرىن كىسى ءسوزى بۇلجىماس شارت [75]بولىپ سانالاتىن. ول كەزدە دىنىنە بەرىك ادامدار ءسوزدى سەرت دەپ ۇستاپ، ايتقانىنان تايمايتىن. ەگەر جوعارى لاۋازىمداعىلار وتىرىك ايتسا، الاياقتىق جاساسا، ولار قىزمەتىمەن قوشتاسىپ، ءتىرى ولىككە اينالاتىن. ال بۇگىندەرى، وكىنىشكە قاراي، ادامدار وتىرىك ايتۋدان ۇيالمايدى. كەرىسىنشە، وتىرىگىم مەن الاياقتىعىم اشكەرە بولىپ قالماسا ەكەن دەپ الاڭدايدى. ايعاعىڭىز قانشا جەردەن دالەلدى بولسا دا، وركوكىرەكتىك پەن ارسىزدىق [76] ار مەن ۇياتتى [77] بەلدەن باسا سالادى. اشكوزدىك, [78] جالتاقتىق پەن وي-ءورىستىڭ تارلىعى سياقتى جاعىمسىز قاسيەتتەر – قازىرگى قاپتاعان سۇرقاي باسشىسىماقتارعا، پسەۆدوليدەرلەر توبىنا ءتان قۇبىلىس. بىزگە مۇنداي پاسىق ولشەمدەردەن جوعارى بولاتىن ليدەرلەر اسا قاجەت.
ەگەر كوشباسشى بولۋدى ارمانداعان بولساڭىز، كىتاپ اۆتورىنىڭ ايتۋىنشا، ءدال قازىر سول ارماندى اقيقاتقا اينالدىرۋعا [79] تالپىنىس جاسايتىن ءسات تۋدى دەپ ەسەپتەڭىز. سەبەبى ادامنىڭ ءومىر ساپاسى [80] كوشباسشىلار ساپاسىنا تىكەلەي بايلانىستى. بولاشاق بۇگىنگى كوشباسشىلار قالدىرار مۇراعا [81] ءزارۋ، الايدا بۇل سىناققا توتەپ بەرەر ادامداردىڭ سانى تىم از. سونىڭ ءبىرى ءسىز بولۋىڭىز مۇمكىن. كوشباسشىلىققا ۇمتىلىپ، باعىڭىزدى سىناپ كورىڭىز.
|
اعىلشىن تىلىندەگى سوزدىك:
[1] ەنجارلىقتىڭ تۇتقىنى – prisoners of their own inertia – زالوجنيكي سوبستۆەننوي ينەرتنوستي
[2] ەرىك-جىگەردىڭ ناق كورىنىس بەرەر تۇسى – ultimate act of free will – ۆىسشەە پروياۆلەنيە سۆوبودنوي ۆولي
[3] قاجەتتىلىك – need – پوترەبنوست
[4] تاۋەكەلگە بەل بايلاۋ – take risks – ريسكوۆات
[5] قاتەلىك جاساۋ – make mistakes – سوۆەرشات وشيبكي
[6] الدا تۇرعان مىندەتتى مەڭگەرۋ – master the task at hand – رەشات ۆوزنيكايۋششيە زاداچي
[7] ادام كىم بولعىسى كەلسە، سول بولادى – people become what they seek to be – ليۋدي ستانوۆياتسيا تەمي، كەم وني سترەمياتسيا ستات
[8] جول نۇسقار باعىت-باعدار – guiding vision – ستراتەگيچەسكوە ۆيدەنيە
[9] قۇشتارلىق – passion – ستراست
[10] ادالدىق – integrity – چەستنوست
[11] تۋراشىلدىق – candor – وتكروۆەننوست
[12] جەتىلۋ – maturity – زرەلوست
[13] سەنىم – trust – دوۆەريە
[14] قىزىعۋشىلىق پەن باتىلدىق – curiosity and daring – ليۋبوپىتستۆو ي وتۆاگا
[15] ءوز ارمانىڭىزدى باسقارا ءبىلۋ – manage the dream – ۋپراۆليات مەچتوي
[16] قاتەلىكتەن قاشپاۋ – embrace error – پريۆەتستۆوۆات وشيبكي
[17] بايىپتى سىندى باعالاۋ – encourage reflective back talk – پووششريات كونسترۋكتيۆنۋيۋ كريتيكۋ
[18] پىكىرى قايشى ادامدى قولداۋ – encourage dissent – پووششريات يناكومىسليە
[19] اينالاعا سەنىم مەن ءۇمىتتىڭ شۋاعىن شاشىپ ءجۇرۋ، وپتيميست بولۋ – display optimism, faith, and hope – دەمونستريروۆات وپتيميزم، ۆەرۋ ي نادەجدۋ
[20] ءوز ادامدارىڭىزدان ۇزدىك ناتيجە كۇتۋ – expect the best from your people – وجيدات لۋچشەگو وت سۆويح ليۋدەي
[21] سەزىم تۇيسىگىن دامىتۋ – develop a sense of «touch» – رازۆيۆات چۋۆستۆو «وسيازانيا»
[22] الىسقا كوز تاستاۋ – take the long view – پروياۆليات دالنوۆيدنوست
[23] مۇددەلى تاراپتاردى تەڭ ۇستاۋ – maintain stakeholder symmetry – سوحرانيات بالانس زاينتەرەسوۆاننىح ستورون
[24] ستراتەگيالىق وداقتاستار مەن سەرىكتەستىكتەر قالىپتاستىرۋ – create strategic alliances and partnerships – سوزداۆات ستراتەگيچەسكيە اليانسى ي پارتنەرستۆا
[25] العىشارت – prerequisite – پرەدۆاريتەلنوە ۋسلوۆيە
[26] ءوزىن تانىپ-ءبىلۋ – self-knowledge – ساموپوزنانيە
[27] قارىم-قابىلەتىن تارازىلاپ، سوعان قاراي ارەكەت ەتۋ – recognize and exercise their strengths– ۋچيتىۆات ي يسپولزوۆات سۆوي سلابىە ستورونى
[28] وزدەرىنىڭ وسال تۇستارىن مويىنداپ، سونى تۇزەتۋگە تىرىسۋ – acknowledge and com-pensate for their weaknesses – وسوزناۆات ي كومپەنسيروۆات سۆوي سلابىە ستورونى
[29] ومىرلىك پروتسەسس – lifetime process – پروتسەسس دلينويۋ ۆ جيزن
[30] باتىلدىق پەن شەشىمتالدىق – courage and determination – مۋجەستۆو ي رەشيتەلنوست
[31] باليعات جاسقا تولۋ – reach puberty – دوستيجەنيە پولوۆوي زرەلوستي
[32] ىشكى تۇيسىگىڭىزدى تىڭداۋ – listen to your inner self – پريسلۋشيۆايتەس ك ۆنۋترەننەمۋ يا
[33] ءوز بولمىسىڭىزدىڭ جاۋاپكەرشىلىگىن ءوز قولىڭىزعا الۋ – accept responsibility for what you are – ۆوزميتە نا سەبيا وتۆەتستۆەننوست زا تو، كەم ۆى ياۆلياەتەس
[34] تەرىسكە شىعارۋ – denial – وتريتسانيە
[35] كىنالاۋ – blame – وبۆينەنيە
[36] تەرەڭىرەك ءبىلىم الۋ – learn at a deeper level – يزۋچات نا بولەە گلۋبوكوم ۋروۆنە
[37] جان-تانىمەن قۇمارتۋ – be obsessed with – بىت چەم تو ودەرجيمىم
[38] دۇنيە تۋرالى ءىلىم – world-knowledge – زنانيا و ميرە
[39] «تارماڭداي» ماماندار – narrow-minded specialists – ۋزكولوبىە سپەتسياليستى
[40] تىنىمسىز تىرىسۋ – doggedly attempt – ناستويچيۆو پىتاتسيا
[41] قاراپايىمدىلىق – simplicity – ۋپروششەنيە، پروستوتا
[42] شىندىق – reality – رەالنوست
[43] ميدىڭ سول جاق جارتى شارىنا ءتان جەتىستىك – left-brain achievements – دوستيجەنيا، سۆويستۆەننىە لەۆومۋ پولۋشاريۋ موزگا
[44] قىزمەتتە ءوسۋ – get the promotions – پرودۆيگاتسيا پو سلۋجبە
[45] ميدىڭ وڭ جاق جارتى شارىنا ءتان جەتىستىك – right-brain accomplishments – دوستيجەنيا، سۆويستۆەننىە پراۆومۋ پولۋشاريۋ موزگا
[46] قالاۋىمىز بەن قابىلەتىمىزدى ۇشتاستىرۋ – reconcile wants with capabilities – سوگلاسوۆىۆات پوترەبنوستي س ۆوزموجنوستيامي
[47] قالايدا جەتىستىككە جەتۋ – succeed at all costs – دوبيتسيا ۋسپەحا ليۋبوي تسەنوي
[48] ومىردەن ءوز ورنىن تاپپاعان، شەكتەۋلى جاندار – unfulfilled, one-dimensional people – وگرانيچەننىە ليۋدي
[49] ءسوزسىز بويسۇنۋدى تالاپ ەتۋ – demand absolute obedience – ترەبوۆات ابسوليۋتنوگو پودچينەنيا
[50] ەركىن جانە بەيىمدەلگىش – laid-back and adaptable – نەپرينۋجدەننىي ي اداپتيۆنىي
[51] ءوز مۇمكىندىگىڭدى قارقىندى تەكسەرۋ – intense introspection – ينتەنسيۆنىي سامواناليز
[52] كەدەرگىلەردى ەڭسەرۋ – tackle the obstacles – پرەودولەۆات پرەپياتستۆيا
[53] بولجاپ بولمايتىن جاعداي – unpredictable environments – نەپرەدسكازۋەمايا وبستانوۆكا
[54] وزگەرىس – change – يزمەنەنيە، پەرەمەنا
[55] كەزدەيسوق جاعدايلارعا يكەمدەلۋ – adjusting to serendipity – پريسپوسوبليۆانيە ك نەوجيداننوي سلۋچاينوستي
[56] ساتسىزدىكتەر – adversity – نەۋداچي
[57] قاراماعىنداعىلار – subordinates – پودچينەننىە
[58] سەنىمگە يە بولۋ – earn the trust of – زاسلۋجيت دوۆەريە
[59] ەمپاتيا – empathy – ەمپاتيا
[60] سەنىمگە بۇيرىق جۇرمەيدى – trust cannot be mandated – دوۆەريە نە موجەت بىت پرەدپيساننىم
[61] تۇراقتىلىق – constancy – پوستويانستۆو
[62] سايكەستىك – congruity – پوسلەدوۆاتەلنوست
[63] سەنىمدىلىك – reliability – نادەجنوست
[64] ادالدىق – integrity – چەستنوست
[65] عالامدىق ءوزارا تاۋەلدىلىك – global interdependence – گلوبالنايا ۆزايموزاۆيسيموست
[66] بىرىگۋ مەن جۇتىلۋ – mergers and acquisitions – سليانيا ي پوگلوششەنيا
[67] عالامدىق باسەكەلەستىك ورتا – globally competitive environment – ۋسلوۆيا گلوبالنوي كونكۋرەنتسي
[68] مىندەتتەمە – liabilities – وبيازاتەلستۆا
[69] ادام كۇشى – people power – چەلوۆەچەسكي رەسۋرس
[70] قامقور بولۋدىڭ ورنىنا قىسقارتۋ – pruning rather than nurturing – سوكراششايا، ا نە زابوتياس
[71] مۇمكىندىك بەرۋ – offer opportunities – پرەدلوجەنيە ۆوزموجنوستەي
[72] شاراسىز قاتەلىكتەرگە ءتوزۋ – tolerate the inevitable mistakes – دوپۋسكات نەيزبەجنىە وشيبكي
[73] تيىمدىلىگى تومەن شاعىن ەنشىلەس كاسىپورىندى باسقارۋ – operate smaller, low-margin subsidiaries – ۋپراۆليات نەبولشيمي نيزكورەنتابەلنىمي دوچەرنيمي كومپانيامي
[74] ءومىر بويعى قىم-قيعاش ىزدەنىس ساپارى – lifelong adventure of discovery – دوروگا دلينويۋ ۆ جيزن، پولنايا پريكليۋچەني ي وتكرىتي
[75] بۇلجىماس شارت – binding contract – دوگوۆور، وبلادايۋششي وبيازاتەلنوي سيلوي
[76] وركوكىرەكتىك پەن ارسىزدىق – arrogance and bald-faced denials – ۆىسوكومەريە ي ناگلوە وتريتسانيە
[77] ار مەن ۇيات – shame and embarrassment – ستىد ي سمۋششەنيە
[78] اشكوزدىك – greed – جادنوست
[79] ارماندى اقيقاتقا اينالدىرۋ – make dreams reality – ۆوپلوتيت مەچتى ۆ رەالنوست
[80] ءومىر ساپاسى – quality of life – كاچەستۆو جيزني
[81] مۇرا – legacy – ناسلەديە
كىتاپتىڭ اعىلشىن تىلىندەگى اتاۋى:
On becoming a leader
Warren Bennis
اۆتور تۋرالى دەرەك:
ۋوررەن بەننيس كوشباسشىلىق تۋرالى زاماناۋي زەرتتەۋلەردىڭ نەگىزىن سالۋشى عالىم رەتىندە كەڭىنەن تانىمال. Wall Street Journal ونى مەنەدجمەنت مايتالماندارىنىڭ وزىق وندىعىنا قوستى. ال Forbes جۋرنالى ونى «كوشباسشىلىقتىڭ باس ۇستازى» اتاسا، Financial Times باسپاسى ۋوررەن بەننيستى «كوشباسشىلىق تەورياسىن تولىققاندى عىلىمي سالا دارەجەسىنە كوتەرگەن عالىم» دەپ باعالادى.
"مازمۇنداما" جوباسىنىڭ اۆتورى جانە رۋحاني جەتەكشىسى -
شىڭعىس مۇقان.
"مازمۇنداما" جوباسى شىعارعان كىتاپتاردى Kaspi gold موبيلدىك قوسىمشاسى ارقىلى ساتىپ الۋعا بولادى:
"مازمۇنداما" كىتاپتارى ەندى Kaspi.kz دۇكەنىندە قولجەتىمدى!
ول ءۇشىن سىلتەمەنى باسىڭىز:
https://kaspi.kz/shop/search/?q=%3AallMerchants%3AMazmyndama&at=2
قازاقستاننىڭ كەز-كەلگەن جەرىنەن تاپسىرىس بەرۋگە بولادى!
كىتاپتاردى ءبولىپ تە تولەي الاسىز!
ەگەردە 5 000 تەڭگەگە تاپسىرىس بەرسەڭىز، كىتاپتى جەتكىزۋ تەگىن!
#Mazmundama #Qazaqsha100Bestseller #وقۋعاتيىس10كىتاپ
