جاز شىعىپ، كۇن جىلىنعالى بۋرابايعا اعىلعان تۋريستەر لەگى كوبەيدى. تابيعاتى كوز سۇرىندىرگەن بۇل ءوڭىر جايلى «قازاقستاننىڭ شۆەيتسارياسى» دەپ بەكەر ايتىلمايدى. كول مەن ورمان، تاۋ مەن ساف اۋاسى بار كۋرورتتىق ايماق سوڭعى جىلدارى ەرەكشە قارقىنمەن دامىپ كەلەدى. بۇل جايلى اۋدان اكىمدىگى ناقتى دەرەكتەرمەن ءبولىستى.
2024 جىلى بۋرابايعا كەلگەن قوناقتار سانى 355 مىڭنان اسىپ، وتكەن جىلمەن سالىستىرعاندا 14 پايىزدان ارتىق بولعان. بۇل — ءتۋريزمنىڭ ەل ىشىندەگى تارتىمدىلىعى ارتىپ كەلە جاتقانىنىڭ بەلگىسى. قازىردىڭ وزىندە اۋداندا 217 تۋريستىك نىسان جۇمىس ىستەپ تۇر. بۇل سان الداعى ۋاقىتتا ارتادى دەپ كۇتىلۋدە، ويتكەنى جاڭا جوبالار قولعا الىنعان.
بيىل جازدا تاعى 5 ءىرى ينفراقۇرىلىمدىق جوبا ىسكە قوسىلادى. ولاردىڭ قاتارىندا بۋراباي كەنتىندە سەرۋەن ايماعى، ششۋچە كولىنىڭ جاعاجايىن جاڭارتۋ، جىلى اجەتحانالار ورناتۋ جانە 119 «اقىلدى» بەينەكامەرا ورناتۋ جۇمىستارى بار. سونىمەن قاتار، ششۋچەدە بايقاۋ (سموتروۆايا) الاڭى اشىلادى.
كۋرورتقا قاتىنايتىن قوعامدىق كولىك ماسەلەسى دە شەشىمىن تاۋىپ كەلەدى. ۆوكزالدان بۋرابايعا دەيىنگى مارشرۋت ىسكە قوسىلىپ، بيلەت باعاسى قولجەتىمدى ەتىلگەن: قالا ىشىندە – 110 تەڭگە، بۋرابايعا – 250 تەڭگە. جولاۋشىلار ءۇشىن جاعداي جاساۋ ماقساتىندا اۆتوپارككە جاڭا اۆتوبۋستار ساتىپ الىنعان: 2024 جىلى – 6, بيىل تاعى 4 اۆتوبۋس قوسىلادى.
تابيعاتتى ايالاۋ — باستى ۇستانىم. وسى جازدا ششۋچەدە قاتتى تۇرمىستىق قالدىقتاردى سۇرىپتاپ، قايتا وڭدەيتىن كەشەننىڭ قۇرىلىسى باستالادى. بۇل جوبا «ەكو-Dump» كومپانياسىمەن بىرلەسە اتقارىلىپ جاتىر. قۋاتتىلىعى – 40 مىڭ توننا. سونىمەن قاتار، 9 زاماناۋي قوقىس كولىگى (ونىڭ ۇشەۋى – ەلەكترلى), 10 كليماتتىق كامەرا مەن ارنايى قالدىق جيناۋ جۇيەسى قاراستىرىلعان.
اۋداندا قازىر 6 مىڭعا جۋىق شاعىن جانە ورتا بيزنەس وكىلى جۇمىس ىستەيدى. 14 مىڭنان استام ادام وسى سالادا ەڭبەك ەتۋدە. بيىلدىڭ وزىندە 450 ميلليون تەڭگەگە 14 جوبا جۇزەگە اسىرىلعان. جىل باسىنان بەرى 15 ميلليارد تەڭگەدەن استام ينۆەستيتسيا تارتىلعان، ونىڭ ىشىندە 12 ميللياردى – جەكە قارجى. قازىر جۇزەگە اسىپ جاتقان 36 جوبا اياسىندا مىڭنان اسا جاڭا جۇمىس ورنى اشىلماق. بۇل جوبالار تۋريزمنەن باستاپ، اۋىل شارۋاشىلىعى، ساۋدا، اۆتوسەرۆيس جانە سپورت سالالارىن قامتيدى.
اۋدان اكىمدىگىنىڭ دەرەگىنشە، سوڭعى ءۇش جىلدا اۋدان بيۋدجەتى ەكى ەسە ۇلعايىپ، 12,8 ميلليارد تەڭگەگە جەتكەن. ال 2025 جىلدىڭ العاشقى 4 ايىنىڭ وزىندە بيۋدجەتكە 23,1 ميلليارد تەڭگە تۇسكەن. ونىڭ ىشىندە اۋدان بيۋدجەتىنە تۇسەتىن تابىس – 4,7 ميلليارد تەڭگە، بۇل بىلتىرعىدان 700 ميلليونعا كوپ.
تۋريزم سالاسىنىڭ اۋدان بيۋدجەتىنە بەرەرى دە زور: بيىل العاشقى توقساندا 1 ميلليارد تەڭگەگە جۋىق كىرىس تۇسكەن. ءبىر تۋريستەن تۇسەتىن سالىق 13 مىڭ تەڭگەدەن اسقان.
بۋراباي مەن ششۋچە جاي عانا دەمالىس ورنى ەمەس، ول ەل ىشىندەگى ەكونوميكالىق قوزعاۋشى كۇشكە اينالعان تۋريزم ورتالىعى. تابيعاتتىڭ سۇلۋلىعىن ساقتاي وتىرىپ، زاماناۋي قىزمەت پەن ينفراقۇرىلىمدى دامىتىپ جاتقان ءوڭىر ناعىز ۇلگى بولا الادى. بۇل ماۋسىمدا جولىڭىز تۇسسە، بۋرابايعا بارىپ كورىڭىز جاڭارعان كۋرورتتىڭ جاڭا كەلبەتى ءسىزدى بەي-جاي قالدىرمايدى.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز