2021 جىلى ءىستى بولعان بۇرىنعى مادەنيەت جانە سپورت ۆيتسە-ءمينيسترى
«ۇوك باس اسسامبلەياسىنىڭ قورىتىندىسى بويىنشا جاڭارتىلعان اتقارۋشى كوميتەت بەكىتىلدى. ۆيتسە-پرەزيدەنتتەر رەتىندە تاعايىندالعاندار:
- سەرىك جاراسباەۆ – وڭىرلەرمەن جۇمىس جونىندەگى ۆيتسە-پرەزيدەنت، قر تۋريزم جانە سپورت ۆيتسە-ءمينيسترى;
- شاحمۇرات ءمۇتالىپ – حالىقارالىق ىنتىماقتاستىق ماسەلەلەرى جونىندەگى ۆيتسە-پرەزيدەنت، قازاقستان بوكس فەدەراتسياسىنىڭ پرەزيدەنتى;
- دانيار ابىلعازين – جازعى وليمپيادا سپورت تۇرلەرى جونىندەگى ۆيتسە-پرەزيدەنت، ۇستەل تەننيسى فەدەراتسياسىنىڭ پرەزيدەنتى;
- ساكەن مۇسايبەكوۆ – قىسقى وليمپيادا سپورت تۇرلەرى جونىندەگى ۆيتسە-پرەزيدەنت، شايبالى حوككەي فەدەراتسياسىنىڭ باس ديرەكتورى;
- عاجي عاجيەۆ – جالپى ماسەلەلەر جونىندەگى ۆيتسە-پرەزيدەنت، اۋىر اتلەتيكا فەدەراتسياسىنىڭ پرەزيدەنتى»، – دەلىنگەن ۇوك حابارلاماسىندا.
ەسكە سالساق، 2021 جىلى قازاقستاننىڭ مادەنيەت جانە سپورت ۆيتسە-ءمينيسترى ساكەن مۇسايبەكوۆتىڭ ۇستالعانى تۋرالى اقپارات تاراعان بولاتىن. سول ۋاقىتتا ول الماتىدا تەرگەۋ شارالارىنا قاتىسىپ جاتقانى بەلگىلى بولدى.
26 اقپاندا مۇسايبەكوۆتىڭ ۇستالعانى رەسمي تۇردە راستالدى. ول 15 مىڭ اقش دوللارى كولەمىندە پارا الدى دەگەن كۇدىككە ىلىنگەن. پارا مەملەكەتتىك-جەكەمەنشىك ارىپتەستىك اياسىندا «ءباس تىگۋ ورتالىعى» جوباسى بويىنشا كەلىسىمشارتقا قول قويۋ ماسەلەسىن شەشۋ ءۇشىن بەرىلگەن.
2021 جىلعى تامىزدا سوت مۇسايبەكوۆتىڭ قىزمەت بابىن پايدالانا وتىرىپ جاسالعان الاياقتىققا بارعانىن انىقتاپ، 62 ميلليون تەڭگە كولەمىندە ايىپپۇل سالۋ تۋرالى ۇكىم شىعاردى.
مۇسايبەكوۆ 2020 جىلدىڭ مامىر ايىندا مادەنيەت جانە سپورت ۆيتسە-ءمينيسترى بولىپ تاعايىندالعان. وعان دەيىن، 2019 جىلدىڭ قاڭتارىنان باستاپ قازاقستان ۇلتتىق وليمپيادا كوميتەتىنىڭ باس حاتشىسى، ال 2015 جىلدىڭ اقپانىنان 2019 جىلدىڭ قاڭتارىنا دەيىن دە مادەنيەت جانە سپورت ۆيتسە-ءمينيسترى قىزمەتىن اتقارعان.